ಹೊನ್ನಾವರದ ಗಣೇಶ ಮಂದಿರದಲ್ಲಿ ಲಕ್ಷಾಹುತಿ ದೂರ್ವಾಹವನ


ನಂದನ ಸಂವತ್ಸರ ಅಧಿಕ ಭಾದ್ರಪದ ಮಾಸದ ಪ್ರಯುಕ್ತ ಹೊನ್ನಾವರದ ರಾಯಲಕೇರಿ ಶ್ರೀ ಗಣೇಶ ಮಂದಿರದಲ್ಲಿ ಸೆ.1ರಿಂದ 11ರ ವರೆಗೆ 'ಲಕ್ಷಾಹುತಿ ದೂರ್ವಾಹವನ' ಕಾರ್ಯಕ್ರಮ ನಡೆಯಲಿದೆ.
ಸೆ.1ರಿಂದ 11ರವರೆಗೆ ಶ್ರೀ ಅಷ್ಟೌಮಹಾಮಂತ್ರ, ಶ್ರೀ ಕೃಷ್ಣ, ಶ್ರೀ ವೆಂಕಟೇಶ ಮಂತ್ರ ಹವನ, ಶ್ರೀ ಆದಿತ್ಯ ಹೃದಯ ಹವನ, ರುದ್ರ ಹವನ, ಶ್ರೀ ಷಡ್ಬೀಜ ಮಂತ್ರ, ಬ್ರಹ್ಮಣಸ್ಪತಿಸೂಕ್ತ, ಗಣಹೋಮ, ಶ್ರೀ ಪುರುಷೋತ್ತಮ ಯೋ ಹವನ, ಶ್ರೀ ದ್ವಾದಶ ಸ್ತೋತ್ರ ಹವನ, ಶ್ರೀ ಹಿರಣ್ಯ ಸೂಕ್ತ ಹವನ, ಶ್ರೀ ಹರಿವಾಯುಸ್ತುತಿ ಹವನ, ಶ್ರೀ ಮನ್ಯುಸೂಕ್ತ ಹವನ, ಶ್ರೀ ಭಾಗ್ಯೈಕ್ಯ ಸೂಕ್ತ ಹವನ, ಶ್ರೀ ಮಹಾಯಜ್ಞದ ಪೂರ್ಣಾಹುತಿಯೊಂದಿಗೆ ಕಾರ್ಯಕ್ರಮ ಸಂಪನ್ನಗೊಳ್ಳಲಿದೆ. ಅಧಿಕ ಪುಣ್ಯಲ ನೀಡುವ ಈ ಕಾರ್ಯಕ್ರಮಗಳನ್ನು ಲೋಕಕಲ್ಯಾಣಾರ್ಥ ಕೈಗೊಳ್ಳಲಾಗಿದೆ. 'ಎಲೈ ದೂರ್ವೆಯೇ ರೋಗನಿವಾರಣೆಯಲ್ಲಿ ಅಮೃತದಂತಿರುವ, ನೂರಾರು ಬೇರು, ಚಿಗುರುಗಳನ್ನುಳ್ಳ ನೂರಾರು ಪಾಪಗಳನ್ನು ನಾಶ ಮಾಡುವ, ನೂರು ವರ್ಷ ಆಯುಷ್ಯ ಬೆಳೆಸುವ ನಿನಗೆ ಪ್ರಣಾಮ' ಎಂಬುದು ಶಾಸದಲ್ಲಿ ದೂರ್ವೆಯ ಬಗ್ಗೆ ಹೇಳಲಾಗಿರುವ ಉಕ್ತಿ.


ಡೋಂಟ್ ವರಿ, ಸೆಪ್ಟಂಬರ್ನಲ್ಲಿ ಉತ್ತಮ ಮಳೆಯಾಗಲಿದೆ


ಮಳೆ ಮಾರುತಗಳಿಗೆ ತಡೆಯಾಗಿರುವ ಎಲ್ನಿನೋ ಹವಾಮಾನದ ಸಾಧ್ಯತೆಗಳು ಕ್ಷೀಣಗೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಸೆಪ್ಟಂಬರ್ ತಿಂಗಳಲ್ಲಿ ದೇಶದಲ್ಲಿ ಉತ್ತಮ ಮಳೆಯಾಗಲಿದೆ ಎಂದು ಕೃಷಿ ಇಲಾಖೆ ಆಶಾವಾದ ವ್ಯಕ್ತಪಡಿಸಿದೆ. ದೇಶದಲ್ಲಿ ಮುಂಗಾರು ಮಳೆ ವ್ಯಾಪಕವಾಗಿ ಸುರಿಯದಿರುವುದರಿಂದ ಕರ್ನಾಟಕ ಸೇರಿದಂತೆ ಹಲವು ರಾಜ್ಯಗಳು ಬರಗಾಲಕ್ಕೆ ಈಡಾಗಿದ್ದು, ಇದೀಗ ಈ ಹಿಂದಿನ ಎಲ್ಲ ಮುನ್ಸೂಚನೆಗೆ ವ್ಯತಿರಿಕ್ತವಾಗಿ ಮುಂದಿನ ತಿಂಗಳಲ್ಲಿ ಮಳೆ ಉತ್ತಮಗೊಳ್ಳುವ ನಿರೀಕ್ಷೆ ಇದೆ ಎಂಬ ಕೃಷಿ ಖಾತೆಯ ಮುನ್ಸೂಚನೆ, ದೇಶದ ರೈತರ ಮೊಗದಲ್ಲಿ  ಸಂತಸ ಮೂಡಿಸಿದೆ.
ಆಗಸ್ಟ್  ತಿಂಗಳಾರಂಭದಲ್ಲಿ ಭಾರತೀಯ ಹವಾಮಾನ ಇಲಾಖೆ ಶಾಂತ ಸಾಗರದಲ್ಲಿ ಉಷ್ಣತೆಯ ಪ್ರಮಾಣ ಹೆಚ್ಚುತ್ತಿರುವುದರಿಂದಾಗಿ ಎಲ್ನಿನೋ ಹವಾಗುಣದ ಪರಿಣಾಮವಾಗಿ ಸೆಪ್ಟಂಬರ್ನಲ್ಲಿ ಸಾಮಾನ್ಯಕ್ಕಿಂತ ಕಡಿಮೆ ಮಳೆ ಸುರಿಯುವ ಸಾಧ್ಯತೆಗಳಿವೆ ಎಂದು ಮುನ್ಸೂಚನೆ ನೀಡಿತ್ತು. ಆದರೆ ಇಲಾಖೆಯ ಹೊಸ ಮುನ್ಸೂಚನೆಯ ಪ್ರಕಾರ, ಶಾಂತ ಸಾಗರದಲ್ಲಿನ ಉಷ್ಣತೆಯ ಪ್ರಮಾಣ ಸಾಮಾನ್ಯವಾಗಿದ್ದು, ಎಲ್ನಿನೋ ಭೀತಿಯ ಛಾಯೆ ನಿವಾರಣೆಯಾಗಿದೆ. ಸೆಪ್ಟಂಬರ್ನಲ್ಲಿ  ಈ ಹಿಂದಿನ ನಿರೀಕ್ಷೆಗಿಂತ ಹೆಚ್ಚಿನ ಪ್ರಮಾಣದಲ್ಲಿ ಮಳೆ ಸುರಿಯಲಿದೆ ಎಂದಿದ್ದಾರೆ ಕೃಷಿ ಖಾತೆಯ ಕಾರ್ಯದರ್ಶಿ ಆಶೀಷ್ ಬಹುಗುಣ.
ಪ್ರಸಕ್ತ ಮುಂಗಾರು ಋತುವಿನಲ್ಲಿ ಈ ವರೆಗೆ ದೇಶದಲ್ಲಿ  ಶೇ. 14ರಷ್ಟು  ಕಡಿಮೆ ಮಳೆ ಸುರಿದಿದೆ. ಮಳೆಯ ಕೊರತೆಯಿಂದಾಗಿ ಕರ್ನಾಟಕ, ಮಹಾರಾಷ್ಟ್ರ, ರಾಜಸ್ಥಾನ ಹಾಗೂ ಗುಜರಾತ್ನಲ್ಲಿ ಬಿತ್ತನೆ ಕಾರ್ಯಕ್ಕೆ ಭಾರೀ ಅಡಚಣೆ ಎದುರಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ದೇಶದಲ್ಲಿ  34.2 ದಶಲಕ್ಷ  ಹೆಕ್ಟೇರ್ಗಳಷ್ಟು ಪ್ರದೇಶದಲ್ಲಿ ಬಿತ್ತನೆ ಕಾರ್ಯ ನಡೆದಿದ್ದರೆ, ಈ ಬಾರಿ 32.9 ದಶಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಮಾತ್ರ ಬಿತ್ತನೆ ಕಾರ್ಯ ನಡೆದಿದೆ. ಒಟ್ಟಾರೆಯಾಗಿ ಮಳೆಯ ಕೊರತೆಯಿಂದಾಗಿ ಬಿತ್ತನೆ ಪ್ರದೇಶದಲ್ಲಿ ಶೇ. 5ರಷ್ಟು ಇಳಿಕೆಯಾಗಿದೆ. ಮುಂದಿನ ತಿಂಗಳು ದೇಶದಲ್ಲಿ ಉತ್ತಮ ಮಳೆಯಾಗುವ ನಿರೀಕ್ಷೆ ಇರುವುದರಿಂದ ಈ ಕೊರತೆ ಸಾಧ್ಯವಾದಷ್ಟು ಮಟ್ಟಿಗೆ ತುಂಬುವ ಆಶಾಭಾವವಿದೆ.
ಸದ್ಯ ದೇಶದಲ್ಲಿ ಮಳೆ ತನ್ನ ತೀವ್ರತೆಯನ್ನು ಕಂಡುಕೊಳ್ಳುತ್ತಿರುವುದರಿಂದಾಗಿ ದೇಶದ ಹಲವೆಡೆ ಕೃಷಿ ಕಾರ್ಯಗಳು ಚುರುಕುಗೊಂಡಿವೆ. ಕಳೆದ ವರ್ಷ ಜುಲೈ-ಜೂನ್ ಅವಧಿಯಲ್ಲಿ 257.44 ದಶಲಕ್ಷ ಟನ್ಗಳಷ್ಟು ಆಹಾರ ಉತ್ಪಾದನೆಯಾಗಿದ್ದು, ಈ ಬಾರಿ ಉತ್ಪಾದನೆಯ ಪ್ರಮಾಣದಲ್ಲಿ ಕೊಂಚ ಕುಸಿತ ಕಂಡು ಬರಲಿದೆ ಎಂಬುದು ಇಲಾಖೆಯ ಹೇಳಿಕೆ.

ಮಾಣಿಗಳಿಗೆ ದೆಹಲಿ ಕನ್ಯೆಯರ ಹುಡುಕಾಟ


ಬ್ರಾಹ್ಮಣ ಸಮುದಾಯದ ಗಂಡು ಮಕ್ಕಳು ಎದುರಿಸುತ್ತಿರುವ ಕನ್ಯಾಮಣಿಗಳ ಕೊರತೆಯ ಸಮಸ್ಯೆಯನ್ನು ಬಗೆಹರಿಸುವ ದೃಷ್ಟಿಯಿಂದ ಉತ್ತರ ಭಾರತ ಮತ್ತು ದಕ್ಷಿಣ ಭಾರತವನ್ನು ವೈವಾಹಿಕ ಸಂಬಂಧದಲ್ಲಿ ಬೆಸೆಯಲು ನಿರ್ಧಾರವೊಂದನ್ನು ಕೈಗೊಳ್ಳಲಾಗಿದೆ.
ಅ. 7ರಂದು ದೆಹಲಿಯಲ್ಲಿ ಮೊದಲ ಬಾರಿಗೆ ಉತ್ತರ ಮತ್ತು ದಕ್ಷಿಣ ಭಾರತದ ಬ್ರಾಹ್ಮಣ ಮುಖಂಡರ ಸಭೆಯು ಉಡುಪಿ ಶ್ರೀಗಳ ನೇತೃತ್ವದಲ್ಲಿ ನಡೆಯಲಿದೆ.
ಉತ್ತರ ಭಾರತದಲ್ಲಿ ಸಾಕಷ್ಟು ಸಂಖ್ಯೆಯಲ್ಲಿ ವಿಪ್ರ ಹೆಣ್ಣು ಮಕ್ಕಳು ಇದ್ದು, ಇವರನ್ನು ಇಲ್ಲಿನ ವಿಪ್ರ ಸಮಾಜದ ಯುವಕರಿಗೆ ಮದುವೆ ಮಾಡಿಕೊಡುವ ಸಂಬಂಧ ಮಾತುಕತೆಯ ಯತ್ನವೊಂದು ಆರಂಭಗೊಂಡಿದೆ. ಮುಖ್ಯವಾಗಿ ನಿರಾಶ್ರಿತರಾಗಿ ಕಾಲ ಕಳೆಯುತ್ತಿರುವ ಕಾಶ್ಮೀರಿ ಪಂಡಿತರ ಸಮುದಾಯದಲ್ಲಿ ದೊಡ್ಡ ಸಂಖ್ಯೆಯಲ್ಲಿ ಹೆಣ್ಣು ಮಕ್ಕಳಿದ್ದಾರೆ ಎನ್ನಲಾಗಿದ್ದು, ಅವರನ್ನು ಇಲ್ಲಿಗೆ ಕರೆತರುವ ಪ್ರಯತ್ನವೊಂದು ಸದ್ದಿಲ್ಲದೆ ಶುರುವಾಗಿದೆ. ಇದಕ್ಕೆ ಮಠಾಧೀಶರು ಕೈಜೋಡಿಸಿದ್ದಾರೆ.
ಮುಖ್ಯವಾಗಿ ಮಲೆನಾಡು ಮತ್ತು ಕರಾವಳಿ ತೀರ ಪ್ರದೇಶದ ವಿಪ್ರ ಸಮಾಜದಲ್ಲಿ ಯುವಕರಿಗೆ ಸಮುದಾಯದ ವಧುಗಳು ಸಿಗುತ್ತಿಲ್ಲ. ಹೆಣ್ಣು-ಗಂಡು ಅನುಪಾತದ ಕೊರತೆ ಒಂದೆಡೆಯಾದರೆ, ಬಹುತೇಕ ಎಲ್ಲ ಹೆಣ್ಣು ಮಕ್ಕಳು ಉನ್ನತ ವ್ಯಾಸಂಗ ಮಾಡುತ್ತಿದ್ದು, ಸಾಮಾನ್ಯ ಮಟ್ಟದ ಶಿಕ್ಷಣ ಪಡೆದ ಯುವಕರನ್ನು ಮದುವೆಯಾಗಲು ನಿರಾಕರಿಸುತ್ತಿದ್ದಾರೆ. ಜೊತೆಗೆ ನಗರದ ವ್ಯಾಮೋಹದಿಂದಾಗಿ ಗ್ರಾಮೀಣ ಪ್ರದೇಶದ ಯುವಕರಿಗಂತೂ 40 ಕಳೆದರೂ ಕಂಕಣ ಭಾಗ್ಯವೇ ಇಲ್ಲವಾಗಿದೆ. ಹೀಗಾಗಿ ಯುವಕರು ಕೂಡ ಹಳ್ಳಿಯಲ್ಲಿ ಉಳಿಯಲು ಒಪ್ಪುತ್ತಿಲ್ಲ. ಆದರೆ ಸಮಾಜದ ಶೇ. 50ಕ್ಕಿಂತ ಹೆಚ್ಚು ಜನರು ಕೃಷಿ ಜೀವನ ನಡೆಸುತ್ತಿದ್ದು, ಈ ಬೆಳವಣಿಗೆಯಿಂದಾಗಿ ಹಳ್ಳಿಗಳು ವೃದ್ದಾಶ್ರಮಗಳಾಗುತ್ತಿವೆ.
ಇತ್ತೀಚೆಗೆ ಶಿವಮ್ಗದಲ್ಲಿ ನಡೆದ ವಿಪ್ರಜಾಗೃತಿ ಸಮಾವೇಶದಲ್ಲಿ ಕೂಡ ಸಮಾಜದ ಗಂಡು ಮಕ್ಕಳು ಎದುರಿಸುತ್ತಿರುವ ವೈವಾಹಿಕ ಜೀವನದ ಸಮಸ್ಯೆ ಕುರಿತು ಚರ್ಚಿಸಲಾಗಿತ್ತು. ಇದಕ್ಕೆ ಪರಿಹಾರ ಕಂಡು ಕೊಳ್ಳುವ ಬಗ್ಗೆ ಕೂಡ ಗಂಭೀರ ಚಿಂತನೆ ನಡೆಸಲಾಗಿತ್ತು. ಇದೀಗ ಅಖಿಲ ಕರ್ನಾಟಕ ಬ್ರಾಹ್ಮಣ ಮಹಾಸಭಾ ಹಾಗೂ ಜಿಲ್ಲಾ ಬ್ರಾಹ್ಮಣ ಮಹಾಸಭಾ, ಜಿಲ್ಲಾ ವಿಪ್ರ ನೌಕರರ ಸಂಘದ ಪದಾಧಿಕಾರಿಗಳು ಹಾಗೂ ನಗರದ ಕೃಷ್ಣಮೂರ್ತಿ ಬಾಯರ್ ನೇತೃತ್ವದಲ್ಲಿ 25ಕ್ಕೂ ಹೆಚ್ಚು ಯುವಕರ ತಂಡ ಇತ್ತೀಚೆಗೆ ಮೈಸೂರಿನಲ್ಲಿ ಚಾರ್ತುಮಾಸ ಕುಳಿತಿರುವ ಉಡುಪಿ ಪೇಜಾವರ ಅಧೋಕ್ಷ ಮಠದ ಕಿರಿಯ ಶ್ರೀಗಳಾದ ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದಂಗಳವರನ್ನು ಭೇಟಿ ಮಾಡಿ, ಸಮಸ್ಯೆ ಕುರಿತು ಚರ್ಚೆ ನಡೆಸಿ, ಶ್ರೀಗಳ ಸಹಕಾರವನ್ನು ಕೋರಿದ್ದರು.
ಈ ಸಂದರ್ಭದಲ್ಲಿ ಉತ್ತರ ಭಾರತದಲ್ಲಿರುವ ವಧುವಿನ ಪೋಷಕರು ಹಾಗೂ ಬ್ರಾಹ್ಮಣ ಸಮಾಜದ ಮುಖಂಡರ ಜೊತೆಗೆ ಚರ್ಚಿಸಿ ಉತ್ತರ ಹಾಗೂ ದಕ್ಷಿಣ ಭಾರತದ ನಡುವೆ ಸಂಬಂಧ ಬೆಸೆಯುವ ಕುರಿತು ಮಾತುಕತೆ ನಡೆಸಲಾಯಿತು. ಇದಕ್ಕೆ ಶ್ರೀಗಳು ಪೂರಕವಾಗಿ ಸ್ಪಂದಿಸಿ, ಸಮಸ್ಯೆ ಬಗೆಹರಿಸುವ ನಿಟ್ಟಿನಲ್ಲಿ ತಾವು ಸಂಪೂರ್ಣ ಸಹಕಾರ ನೀಡುವುದಾಗಿ ಭರವಸೆ ನೀಡಿದರು.
ಚರ್ಚೆಯ ಲವಾಗಿ ಅ. 7ರಂದು ನವದೆಹಲಿಯ ವಿದ್ಯಾಪೀಠದಲ್ಲಿ ಉತ್ತರ ಭಾರತ ಹಾಗೂ ದಕ್ಷಿಣ ಭಾರತದ ಬ್ರಾಹ್ಮಣ ಸಮಾಜದ ಮುಖಂಡರ ಸಭೆಗಳನ್ನು ಶ್ರೀಗಳ ಸಾನ್ನಿಧ್ಯದಲ್ಲಿ ನಡೆಸುವ ತೀರ್ಮಾನ ಕೈಗೊಳ್ಳಲಾಯಿತು. ಸಮಸ್ಯೆ ಬಗೆಹರಿಸುವ ಕುರಿತು ವಿವಿಧ ಸಮಾನ ಮನಸ್ಕ ಮಠಾಧೀಶರನ್ನು ಸಂಪರ್ಕಿಸುವ ಜವಾಬ್ದಾರಿಯನ್ನು ಅಖಿಲ ಕರ್ನಾಟಕ ಬ್ರಾಹ್ಮಣ ಮಹಾಸಭಾದ ಸಂಘಟನಾ ಕಾರ್ಯದರ್ಶಿ ಮಾ.ಸ. ನಂಜುಂಡಸ್ವಾಮಿ ಅವರಿಗೆ ವಹಿಸಲಾಗಿದೆ.
ಅ. 7ರಂದು ನಡೆಯುವ ಈ ಸಭೆಯಲ್ಲಿ ಪಾಲ್ಗೊಳ್ಳಲು ಆಸಕ್ತಿ ಹೊಂದಿರುವವರು ಮಾ.ಸ. ನಂಜುಂಡಸ್ವಾಮಿ (ಮೊ. 9448721572) ಸಾಗರ ಅಥವಾ ಕೃಷ್ಣಮೂರ್ತಿ ಬಾಯರ್ ನಗರ (ಮೊ. 9480566790) ಇವರನ್ನು ಸಂಪರ್ಕಿಸಬಹುದಾಗಿದೆ. ಕಳೆದ ಎರಡು ವರ್ಷಗಳಿಂದ ಶೃಂಗೇರಿ ಶ್ರೀಮಠದ ನೇತೃತ್ವದಲ್ಲಿ ಹೊರ ರಾಜ್ಯದಲ್ಲಿರುವ ಬ್ರಾಹ್ಮಣ ಕನ್ಯೆಯರನ್ನು ಸಂಬಂಧ ಮಾಡಿಕೊಳ್ಳುವ ಕುರಿತಂತೆ ಮುಂದಡಿ ಇಡಬೇಕು ಎಂಬ ಆಗ್ರಹ ಭಕ್ತರಿಂದ ಕೇಳಿ ಬಂದಿತ್ತು. ಇದರ ನೇತೃತ್ವ ವಹಿಸಲು ಮಠದ ಮುಖ್ಯಸ್ಥರು ಕೂಡ ಒಪ್ಪಿದ್ದರು.

ಸ್ಟಾರ್ ಆಸ್ಪತ್ರೆಗಳ ದಿನದ ಬೆಡ್ ಬಾಡಿಗೆಯೇ ಒಂದು ಲಕ್ಷ


ಐಷಾರಾಮಿ ಹೋಟೆಲ್ಗಳಲ್ಲಿ ಒಂದು ದಿನದ ರೂಮಿನ ಬಾಡಿಗೆ 75,000 ರೂ. ಆಸುಪಾಸು ಇರುವುದು ಸಾಮಾನ್ಯ. ಆದರೆ ಇತ್ತೀಚಿನ ದಿನಗಳಲ್ಲಿ ಹೈಟೆಕ್ 5 ಸ್ಟಾರ್ ಆಸ್ಪತ್ರೆಗಳ ಒಂದು ದಿನದ ಬೆಡ್ ಶುಲ್ಕವೂ ಹೆಚ್ಚು ಕಡಿಮೆ 1 ಲಕ್ಷ ರೂ.ವರೆಗೆ ತಲುಪಿ ನಿಂತಿದೆ. ದಿಲ್ಲಿಯಲ್ಲಿರುವ ಫೋರ್ಟಿಸ್ ಹಾರ್ಟ್ ಇನ್ಸಿಟಿಟ್ಯೂಟ್ನ ಪ್ರೆಸಿಡೆನ್ಷಿಯಲ್ ಸೂಟ್ಸ್ (ಕೊಠಡಿ)ನ ಒಂದು ದಿನದ ಬೆಡ್ ಶುಲ್ಕ 75,000 ರೂ., ಇನ್ನು ಗುಡಂಗಾವ್ನಲ್ಲಿ ಶೀಘ್ರವೇ ಆರಂಭವಾಗಲಿರುವ ಇದೇ ಫೋರ್ಟಿಸ ಸಂಸ್ಥೆಯ 7 ಸ್ಟಾರ್ ಆಸ್ಪತ್ರೆಯಲ್ಲಿ 1 ದಿನದ ಬೆಡ್ ಶುಲ್ಕ ಹೆಚ್ಚು ಕಡಿಮೆ 1 ಲಕ್ಷ ರೂ. ಆಸುಪಾಸಿನಲ್ಲಿದೆ. ಅಂದಹಾಗೆ ಈ ಶುಲ್ಕದಲ್ಲಿ ಯಾವುದೇ ವೈದ್ಯಕೀಯ ಸೇವೆಯ ಶುಲ್ಕ ಸೇರಿಲ್ಲ. ಇದೇನಿದ್ದರೂ ಐಷಾರಾಮಿ ಸೇವೆ, ಭದ್ರತೆ, ರಹಸ್ಯ ವಾತಾವರಣ ಕಾಪಾಡಿಕೊಳ್ಳುವುದಕ್ಕೇ ನೀಡಬೇಕಾದ ಹಣ.
ಇದರ ಜೊತೆಗೆ ವಿಶ್ವವಿಖ್ಯಾತ ಬಾಣಸಿಗರು ರೋಗಿಗಳಿಗೆ ಕೊಡಬಹುದಾದ ಬಾಯಿಯಲ್ಲಿ ನೀರೂರಿಸುವ ಔತಣ ತಯಾರಿಸಿ ಕೊಡುತ್ತಾರೆ. ಕೊಠಡಿಯಲ್ಲೇ ಎಲ್ಸಿಡಿ ಟೀವಿ, ವೈಫೈ ಸಂಪರ್ಕ, ರೆಫ್ರಿಜಿರೇಟರ್, ಭೇಟಿಗೆ ಬಂದವರಿಗೆ ವಿಶ್ರಾಂತಿಗೆ ಪ್ರತ್ಯೇಕ ಸ್ಥಳ, ರೂಫ್ಟಾಪ್ ಗಾರ್ಡನ್... ಹೀಗೆ ಹತ್ತು ಹಲವು ಸೌಕರ್ಯಗಳು ರೋಗಿಗಳಿಗೆ ಲಭ್ಯ.
ಹೀಗಾಗಿಯೇ ಹಣಕ್ಕೆ ಕೊರತೆ ಇಲ್ಲದವರು ಇತ್ತೀಚಿನ ದಿನಗಳಲ್ಲಿ ಇಂತಹ ಆಸ್ಪತ್ರೆಗಳತ್ತ ಮುಖ ಮಾಡುತ್ತಿದ್ದಾರೆ. ಪರಿಣಾಮ ಇಂತಹ ದುಬಾರಿ ಸೇವೆ ನೀಡುವ ಆಸ್ಪತ್ರೆಗಳ ಸಂಖ್ಯೆಯೂ ಹೆಚ್ಚಾಗುತ್ತಿದೆ. ಇದರ ಜೊತೆಗೆ ಈ ಆಸ್ಪತ್ರೆಗಳಲ್ಲಿ ಸಿಗುವ ನುರಿತ ವೈದ್ಯರ ಸೇವೆ ಕೂಡಾ ರೋಗಿಗಳನ್ನು ದುಬಾರಿ ವೆಚ್ಚದ ಹೊರತಾಗಿಯೂ ಈ ಆಸ್ಪತ್ರೆಗಳತ್ತ ಬರುವಂತೆ ಮಾಡುತ್ತಿದೆ.


ಇದಕ್ಕೆ ಉದಾಹರಣೆ ನಟ ರಜನಿಕಾಂತ್ ಅವರ ಪುತ್ರಿ ಐಶ್ವರ್ಯಾ. ಅವರು ತಮ್ಮ ಎರಡನೇ ಹೆರಿಗೆಯನ್ನು ಚೆನ್ನೈನಲ್ಲಿರುವ ಅಪೋಲೋ ಆಸ್ಪತ್ರೆಯಲ್ಲಿ ಮಾಡಿಸಿಕೊಂಡಿದ್ದು. ಈ ಆಸ್ಪತ್ರೆ ಕೂಡಾ ಅತ್ಯಾಧುನಿಕ ಸೇವೆಯ ಜೊತೆಗೆ ದುಬಾರಿ ಶುಲ್ಕಕ್ಕೆ ಖ್ಯಾತಿ ಹೊಂದಿರುವಂತಹದ್ದು. ಜೇಬು ತುಂಬಿರುವ ಶ್ರೀಮಂತರಿಗೆ ಹಣಕ್ಕಿಂತ ಶುಚಿತ್ವ, ಐಷಾರಾಮಿ ಸೇವೆ, ಭದ್ರತೆ ಹೆಚ್ಚು ಆಪ್ತವಾಗಿರುವುದರಿಂದ ಫೈವ್ಸ್ಟಾರ್ ಆಸ್ಪತ್ರೆಗಳ ಸಂಖ್ಯೆ ಹೆಚ್ಚುತ್ತಿದೆ ಎನ್ನುವುದು ವೈದ್ಯರ ಅಭಿಪ್ರಾಯ.
ಇನ್ನು ಐಶ್ವರ್ಯಾ ರೈ ಮುಂಬೈನ ಸೆವೆನ್ ಹಿಲ್ಸ್ ಆಸ್ಪತ್ರೆ ಅತ್ಯಂತ ಬಿಗಿ ಭದ್ರತೆ ಹೊಂದಿದೆ ಎಂಬ ಕಾರಣಕ್ಕಾಗಿಯೇ ಹೆರಿಗೆಗಾಗಿ ಅಲ್ಲಿಗೆ ದಾಖಲಾಗಿದ್ದರು. ಅಲ್ಲಿದ್ದಷ್ಟೂ ದಿನ ಅವರಿಗೆ ಅಲ್ಲಿ ಸಿಕ್ಕ ಸೇವೆಯಿಂದ ತೃಪ್ತಿ ಹೊಂದಿದ್ದ ನಟ ಅಮಿತಾಭ್ ಬಚ್ಚನ್, ಇತ್ತೀಚೆಗೆ ತಮ್ಮ ಹರ್ನಿಯಾ ಶಸ್ತ್ರಚಿಕಿತ್ಸೆಗೂ ಸೆವೆನ್ ಹಿಲ್ಸ್ಗೆ ದಾಖಲಾಗಿದ್ದರು.

ಇಲಿ ಜ್ವರ ಹೇಗೆ ಬರುತ್ತದೆ?


ಇಲಿ ಜ್ವರ ಒಬ್ಬರಿಂದ ಒಬ್ಬರಿಗೆ ಹರಡುವ ಕಾಯಿಲೆ. ಮುಖ್ಯವಾಗಿ ಈ ಜ್ವರ ಕಂಡು ಬರುವುದು ಇಲಿ, ಹೆಗ್ಗಣ ಹಾಗೂ ಕಾಡು ಪ್ರಾಣಿಗಳಲ್ಲಿ. ಅವುಗಳಿಂದ ನೀರಿನ ಮೂಲಕ ಹರಡುವ ರೋಗಾಣುಗಳು ಮಾನವನ ದೇಹದಲ್ಲಿರುವ ಗಾಯಗಳ ಮೂಲಕ ಅಥವಾ ಆ ಕಲುಷಿತ ನೀರಿನಲ್ಲಿ ಕಣ್ಣು ತೊಳೆದಾಗ ಮಾನವ ದೇಹವನ್ನು ಪ್ರವೇಶಿಸುತ್ತವೆ.

ಲೆಪ್ಟೊಸ್ಟೈರೋಸಿಸ್ ಎಂದು ಕರೆಯಲಾಗುವ ಈ ರೋಗ ಸೆರೋಕಿಟಾ ಎಂಬ ಸೂಕ್ಷ್ಮಾಣು ಜೀವಿಗಳಿಂದ ಉಂಟಾಗುವ ಸಾಂಕ್ರಾಮಿಕ ರೋಗ. ರೋಗವನ್ನು ಹರಡಬಹುದಾದ ರೋಗಾಣುಗಳು ಪ್ರಾಣಿಗಳ ಮೂತ್ರದಲ್ಲಿದ್ದು, ಇಂತಹ ಸೋಂಕು ದೇಹವನ್ನು ಸೇರಿ ಮನುಷ್ಯರಿಗೆ ಈ ಕಾಯಿಲೆ ಕಾಣಿಸಿಕೊಳ್ಳುತ್ತದೆ.
ಮನೆಯ ಪರಿಸರದಲ್ಲಿ ಇರುವ ಇಲಿ, ಹೆಗ್ಗಣ, ಬೆಕ್ಕು, ನಾಯಿ ಹಾಗೂ ಕೆಲವು ಕಾಡು ಪ್ರಾಣಿಗಳ ದೇಹದಲ್ಲಿ ರೋಗದ ಸೂಕ್ಷ್ಮಾಣುಗಳು ಇರುತ್ತವೆ. ಸೋಂಕು ಹೊಂದಿರುವ ಇಂತಹ ಪ್ರಾಣಿಗಳ ಮಲ, ಮೂತ್ರ ಮೂಲಕ ರೋಗಾಣುಗಳು(ಸ್ಟೈರೋಕಿಟಾ) ನೀರಿನಲ್ಲಿ ಸೇರಿಕೊಳ್ಳುತ್ತದೆ. ಇಂತಹ ಕಲುಷಿತ ನೀರನ್ನು ಮನುಷ್ಯ ಕುಡಿದಾಗ, ಇಲ್ಲವೇ ಇಂತಹ ನೀರು ದೇಹ ಸಂಪರ್ಕ ಹೊಂದಿದಾಗ ಶರೀರದಲ್ಲಿ ಇರಬಹುದಾದ ಗಾಯಗಳ ಮೂಲಕ ರೋಗಾಣುಗಳು ದೇಹವನ್ನು ಸೇರಿಕೊಳ್ಳುತ್ತವೆ. ಅಲ್ಲದೆ ಬಾಯಿ, ಮೂಗು, ಮತ್ತು ಕಣ್ಣುಗಳ ಒಳ ಭಾಗದ ಮೂಲಕವೂ ದೇಹವನ್ನು ಪ್ರವೇಶಿಸುವ ಸಾಧ್ಯತೆ ಇದೆ. ಈ ರೋಗಾಣುಗಳು ದೇಹವನ್ನು ಸೇರಿದ 4-19 ದಿನಗಳಲ್ಲಿ ರೋಗ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ.
ರೋಗ ಲಕ್ಷಣಗಳು:
ಜ್ವರ, ಮಾಂಸ ಖಂಡಗಳ ನೋವು, ಮೈ ಕೈ ನೋವು ಹಾಗೂ ತಲೆನೋವು ಕಾಣಿಸಿಕೊಳ್ಳುವುದು ರೋಗದ ಲಕ್ಷಣಗಳಲ್ಲಿ ಒಂದು. ಕೆಲವರಲ್ಲಿ ಪಿತ್ತ ಕಾಮಾಲೆ(ಜಾಂಡೀಸ್)ಯ ಲಕ್ಷಣಗಳೂ ಕಂಡು ಬರುವ ಸಾಧ್ಯತೆ ಇದೆ. ಬಾಯಿ, ಮೂಗು, ಕದಲ್ಲಿ ರಕ್ತ ಸ್ರಾವವನ್ನು ಕಾಣಬಹುದು. ಮೂತ್ರ ಪಿಂಡ ಹಾಗೂ ಹೃದಯದ ಸೋಂಕು ಉಂಟಾಗಬಹುದು.
ಚಿಕಿತ್ಸಾ ಮಾಹಿತಿ:
ಕ್ರಮ ಬದ್ಧವಾದ ಚಿಕಿತ್ಸೆಯಿಂದ ರೋಗವನ್ನು ಸಂಪೂರ್ಣ ಗುಣಪಡಿಸಬಹುದು. ಹೃದಯ, ಶ್ವಾಸಕೋಶ, ಮೂತ್ರಪಿಂಡ ಸೋಂಕು ಬಹಳ ವಿರಳವಾಗಿದ್ದರೂ ಅವುಗಳ ಸೋಂಕು ಕಾಣಿಸಿಕೊಂಡಲ್ಲಿ, ಚಿಕಿತ್ಸೆ ಸಕಾಲಕ್ಕೆ ದೊರಕದಿದ್ದಲ್ಲಿ ದುಷ್ಪರಿಣಾಮ ಉಂಟಾಗಬಹುದು. ಶೀಘ್ರ ರೋಗಪತ್ತೆ ಹಾಗೂ ಕ್ರಮಬದ್ಧ ಚಿಕಿತ್ಸೆಯಿಂದ ರೋಗವನ್ನು ಸಂಪೂರ್ಣವಾಗಿ ಗುಣಪಡಿಸಬಹುದಾಗಿದೆ. ರೋಗಿಯನ್ನು ಇತರರಿಂದ ಪ್ರತ್ಯೇಕಿಸುವ ಅಗತ್ಯವಿಲ್ಲ. ಸೋಂಕು ರೋಗಿಯಿಂದ ಆರೋಗ್ಯವಂತ ವ್ಯಕ್ತಿಗಳಿಗೆ ರೋಗ ಹರಡುವುದಿಲ್ಲ.
ಮುಂಜಾಗ್ರತಾ ಕ್ರಮಗಳು:
* ನೀರಿನ ಸಂರಕ್ಷಣೆ ಅತೀ ಅಗತ್ಯವಾಗಿದ್ದು, ಸ್ನಾನ ಮತ್ತು ಕುಡಿಯಲು ಉಪಯೋಗಿಸುವ ನೀರಿನಲ್ಲಿ ಪ್ರಾಣಿಗಳ ಮೂತ್ರ ಸೇರದಂತೆ ನೀರಿನ ಶೇಖರಣಾ ತೊಟ್ಟಿಗಳಿಗೆ ಭದ್ರವಾಗಿ ಮುಚ್ಚಳವನ್ನು ಮುಚ್ಚಿರಬೇಕು.
* ಸಾಕು ಪ್ರಾಣಿ ಹಾಗೂ ಕಾಡು ಪ್ರಾಣಿಗಳಲ್ಲಿ ಈ ರೋಗ ಹರಡುವ ರೋಗಾಣುಗಳು ಇರುವ ಸಾಧ್ಯತೆ ಇರುವುದರಿಂದ ಕೊಳ, ಹೊಂಡ ಹಾಗೂ ನಿಂತ ನೀರಿನಲ್ಲಿ ಸ್ನಾನ ಮಾಡಬಾರದು ಹಾಗೂ ಈ ನೀರನ್ನು ಸೇವಿಸಬಾರದು.
* ಆಹಾರ ಪದಾರ್ಥಗಳು, ಹಣ್ಣು, ತರಕಾರಿ ಇತ್ಯಾದಿಗಳು ಇಲಿಗಳಿಗೆ ಸಿಗದಂತೆ ದಾಸ್ತಾನು ಮಾಡಬೇಕು. ಮನೆ, ಗೋದಾಮು, ಅಂಗಡಿ, ಚರಂಡಿ ಹಾಗೂ ಹೊಲ ಗದ್ದೆ ಪರಿಸರದಲ್ಲಿ ಇಲಿಗಳು ವಾಸ ಮಾಡದಂತೆ ಹಾಗೂ ಸಂತಾನ ವೃದ್ಧಿಯಾಗದಂತೆ ಬಿಲ, ಕಿಂಡಿಗಳನ್ನು ಮುಚ್ಚಬೇಕು. ಪರಿಸರ ನೈರ್ಮಲ್ಯದಿಂದ ರೋಗ ಹರಡುವ ಸಾಧ್ಯತೆಗಳು ಕಡಿಮೆಯಾಗುತ್ತದೆ.
* ಇಂತಹ ಪ್ರಾಣಿಗಳು ಇರಬಹುದಾದ ವಾಸ ಸ್ಥಳಗಳಲ್ಲಿ ಬರಿಗಾಲಿನಲ್ಲಿ ಓಡಾಡದೆ ಚಪ್ಪಲಿ ಧರಿಸಿ ನಡೆಯುವುದು. ಹೆಚ್ಚಿನ ಮಾಹಿತಿ ಹಾಗೂ ಚಿಕಿತ್ಸೆಗಾಗಿ ಹತ್ತಿರದ ಆರೋಗ್ಯ ಕೇಂದ್ರಗಳ ವೈದ್ಯಾಧಿಕಾರಿಗಳ ಸಲಹೆ ಪಡೆಯಬೇಕು.
* ಮುಖ್ಯವಾಗಿ ಇಲಿಗಳು ಓಡಾಡುವ ಪ್ರದೇಶಗಳಲ್ಲಿ ಕೆಲಸ ಮಾಡುವವರು ಹೆಚ್ಚಿನ ಮುಂಜಾಗ್ರತೆ ವಹಿಸಬೇಕು.
* ರೋಗ ಕಾಣಿಸಿಕೊಂಡ ಪ್ರದೇಶದ ಕೃಷಿಕರು ಹಾಗೂ ಕಾರ್ಮಿಕರು ಖಾಲಿ ಕಾಲಿನಲ್ಲಿ ಓಡಾಡಬಾರದು. ಚಪ್ಪಲಿ ಅಥವಾ ಗ್ಲೌಸ್ ಹಾಕಬೇಕು.
* ರೋಗ ಲಕ್ಷಣ ಕಂಡು ಬಂದಾಕ್ಷಣ ವ್ಯಕ್ತಿ ವೈದ್ಯರನ್ನು ಭೇಟಿ ಮಾಡಿ, ಸೂಕ್ತ ಚಿಕಿತ್ಸೆ ಪಡೆದುಕೊಳ್ಳುವುದು ಒಳ್ಳೆಯದು.
* ರೋಗ ಪತ್ತೆಗಾಗಿ ಸ್ಕ್ರೀನಿಂಗ್ ಟೆಸ್ಟ್ (ಪರೀಕ್ಷೆ) ಮಾಡಿಸಿ ಅನುಮಾನದ ಮಟ್ಟದಲ್ಲಿದ್ದರೆ ಸೂಕ್ತ ಚಿಕಿತ್ಸೆ ಪಡೆದುಕೊಳ್ಳುವುದು ಒಳ್ಳೆಯದಿ.
* ಇಲಿ ಜ್ವರಕ್ಕೆ ಎಲ್ಲ ಸರಕಾರಿ ಆಸ್ಪತ್ರೆಗಳಲ್ಲಿ ಔಷಧಿ ಲಭ್ಯವಿದ್ದು, ಚಿಕಿತ್ಸೆ ಪಡೆಯ ಬಹುದಾಗಿದೆ ಎನ್ನುತ್ತಾರೆ ವೈದ್ಯರು. ರೋಗ ಉಲ್ಬಣಗೊಂಡರೆ ಚಿಕಿತ್ಸೆ ಕಷ್ಟವಾಗಿದ್ದು, ಜ್ವರದ ಲಕ್ಷಣಗಳು ಕಂಡು ಬಂದ ತತ್ಕ್ಷಣ ವೈದ್ಯರನ್ನು ಕಾಣಬೇಕು ನ್ನುವುದು ಆರೋಗ್ಯ ತಜ್ಞರ ಅಭಿಮತ.

ಅಶ್ಲೀಲ ಎಸ್ಎಂಎಸ್ ಕಳುಹಿಸುವುದರಲ್ಲಿ ಭಾರತೀಯರೂ ಮುಂದೆ


ಅಶ್ಲೀಲ ಎಸ್ಎಂಎಸ್, ಎಂಎಂಎಸ್ ಕಳುಹಿಸುವ ವಿಪರೀತ ಚಾಳಿ ಏನಿದ್ದರೂ, ವಿದೇಶೀಯರೇ.. ಭಾರತೀಯರೇನಿದ್ದರೂ, ತೀರಾ ತೀರಾ ಪರಮ ಪವಿತ್ರರು ಎಂದುಕೊಂಡಿದ್ದರೆ, ನಿಮ್ಮ ಊಹೆ ತಪ್ಪು. ಭಾರತದಲ್ಲೂ ಅಶ್ಲೀಲ ಎಸ್ಎಂಎಸ್ಗಳನ್ನು, ಚಿತ್ರಗಳನ್ನು ಕಳುಹಿಸುವ ಚಾಳಿ ಹೆಚ್ಚಾಗುತ್ತಿದ್ದು, ಶೇ.54ರಷ್ಟು ಮಂದಿ ಇಂತಹುವುಗಳಲ್ಲಿ ನಿರತರಾಗಿರುತ್ತಾರೆ ಎಂದು ಸಮೀಕ್ಷೆಯೊಂದು ಹೇಳಿದೆ.
ಟೈಮ್ ಮ್ಯಾಗಝೀನ್ ನಡೆಸಿದ "ವೈರ್ಲೆಸ್ ಇಷ್ಯೂ" ಎಂಬ ಸಮೀಕ್ಷೆಯಲ್ಲಿ ಈ ವಿಚಾರ ಬಯಲಾಗಿದೆ. ಸಮೀಕ್ಷೆಗಾಗಿ 8 ದೇಶಗಳನ್ನು - ಭಾರತ, ಅಮೆರಿಕ, ಬ್ರಿಟನ್, ದಕ್ಷಿಣ ಕೊರಿಯಾ, ದಕ್ಷಿಣ ಆಫ್ರಿಕಾ, ಇಂಡೋನೇಷಿಯಾ ಮತ್ತು ಬ್ರೆಝಿಲ್ನ 5 ಸಾವಿರ ಮಂದಿಯನ್ನು ಸಂದರ್ಶಿಸಲಾಗಿದೆ.
ಇವುಗಳಲ್ಲಿ ಅಶ್ಲೀಲ ಎಸ್ಎಂಎಸ್ ಕಳುಹಿಸುವ ಪ್ರಮಾಣ ಬ್ರೆಝಿಲ್ನಲ್ಲಿ ಶೇ.64ರಷ್ಟಿದ್ದರೆ, ಶೇ.45 ಅಮೆರಿಕ ಮತ್ತು ಶೇ.54ರಷ್ಟು ದಕ್ಷಿಣ ಆಫ್ರಿಕಾದ ಮಂದಿಯಿದ್ದಾರೆ.
ಸಮೀಕ್ಷೆ ಪ್ರಕಾರ, ಆಧುನಿಕ ಯುಗದಲ್ಲಿ ಫೋನ್ನಂತಹ ಮಾಧ್ಯಮಗಳು ಬಂದ ಮೇಲೆ ಸಂಬಂಧಗಳು ಬಹುಬೇಗ ಸಾಧ್ಯವಾಗುತ್ತವೆ.ಬಹುತೇಕ ರಾಷ್ಟ್ರಗಳಲ್ಲಿ ಶೌಚಾಲಯ, ನೀರನ್ನು ಬಳಸುವುದಕ್ಕೂ ಹೆಚ್ಚು, ಜನ ಮೊಬೈಲ್ ಬಳಸುತ್ತಾರೆ ಎನ್ನಲಾಗಿದೆ. ಸಮೀಕ್ಷೆಗೊಳಪಟ್ಟವರಲ್ಲಿ ಶೇ.84ರಷ್ಟು ಮಂದಿ ಮೊಬೈಲ್ ಇಲ್ಲದಿದ್ದರೆ, ಒಂದು ದಿನ ಕಳೆಯಲೂ ಸಾಧ್ಯವಿಲ್ಲ ಎಂದಿದ್ದಾರೆ. ಇಂಥವರು ಪ್ರತಿ 30 ನಿಮಿಷಕ್ಕೊಮ್ಮೆ ಮೊಬೈಲ್ ಹಿಡಿಯುತ್ತಾರೆ. ಇವರಲ್ಲಿ ಐವರಲ್ಲೋರ್ವ, ಪ್ರತಿ ಹತ್ತು ನಿಮಿಷಕ್ಕೆ ಮೊಬೈಲ್ ನೋಡುತ್ತಾರೆ ಎಂದು ಹೇಳಲಾಗಿದೆ.

ಸ್ವಾತಂತ್ರ್ಯವೆಂಬುದು ಹಲವರು ಮಾಡಿದ ಬಲಿದಾನದ ಫಲ


ನಮ್ಮ ಹೆಮ್ಮೆಯ ತಾಯ್ನಡಾದ ಭಾರತವು ಸುಮಾರು ಮೂರು ಶತಮಾನಗಳ ದಾಸ್ಯದ ಸಂಕೋಲೆಯಿಂದ ಬಿಡುಗಡೆಗೊಂಡು ಇಂದು ಅರುವ್ತೈದನೆಯ ಸ್ವಾತಂತ್ರ್ಯೋತ್ಸವ ಆಚರಿಸುತ್ತಿರುವ ಸಂಭ್ರಮದ ಹಿಂದೆ ಭಾರತಕ್ಕೆ ಸ್ವಾತಂತ್ರ್ಯ ದೊರಕಿಸಿಕೊಟ್ಟ ಅದೆಷ್ಟು ಧೀರ, ವೀರ, ತ್ಯಾಗಿಗಳ ಬಲಿದಾನಗಳಿವೆ ಎಂಬುದನ್ನು ಇಂದಿನ ಯುವಜನತೆ ಒಮ್ಮೆಯಾದರೂ ನೆನಪಿಸಿಕೊಂಡರೆ ಚೆನ್ನ. ನಮ್ಮ ಮೊಗದಲ್ಲರಳುವ ಹೂ ನಗುವಿನ ಹಿಂದೆ ಸಾವಿರಾರು ಸ್ವಾತಂತ್ರ್ಯ ಹೋರಾಟಗಾರರ ಕಣ್ಣೀರ ಕಥೆಗಳಿವೆ ಎಂಬುದನ್ನು ಈ ಸಂದರ್ಭದಲ್ಲಿ ನಾವಿಲ್ಲಿ ಸ್ಮರಿಸಲೇಬೇಕು.
ನಮ್ಮ ನೆಲದಲ್ಲಿ ನಾವೇ ಗುಲಾಮರಾದೆವು:
ತನ್ನ ಅನನ್ಯ ಪರಂಪರೆಯಿಂದ, ಸಕಲ ಸಂಪದ್ಭರಿತ ರಾಷ್ಟ್ರವಾಗಿ ವಿಶ್ವದ ಗಮನ ಸೆಳೆಯುತ್ತಿದ್ದ ಭಾರತಕ್ಕೆ ವ್ಯಾಪಾರಕ್ಕೆಂದು ಬಂದ ಪರಕೀಯರು ಇಲ್ಲಿ ತಮ್ಮ ಆಳ್ವಿಕೆಯನ್ನು ಸ್ಥಾಪಿಸಿ ನಮ್ಮವರನ್ನೆಲ್ಲ ಗುಲಾಮರನ್ನಾಗಿಸಿದರು. ವಿದೇಶೀಯರ ದಾಳಿಗೆ ಸಿಲುಕಿ ತಾಯ್ನಡಿನಲ್ಲೇ ಪರಕೀಯರಾಗುವ ಸ್ಥಿತಿ ಭಾರತೀಯರದ್ದಾಗಿತ್ತು.
ಬ್ರಿಟಿಷ್ ಆಡಳಿತವು ಭಾರತದ ಆರ್ಥಿಕತೆಯನ್ನು ಅಸ್ತವ್ಯಸ್ತಗೊಳಿಸಿತು. ಅವರ ಬಿಗು ಧೋರಣೆಗಳು ಜನರ ಬದುಕನ್ನೇ ಬುಡಮೇಲಾಗಿಸಿದವು. ವಿದೇಶೀಯರ ಆಡಳಿತ ನಿಯಮಗಳು ಸಾರ್ವತ್ರಿಕವಾಗಿ ಎಲ್ಲ ವರ್ಗದ ಜನರ ವಿರೋಧಗಳಿಸಿಕೊಳ್ಳುವುದರ ಜತೆಗೆ ದಾಸ್ಯದ ಬಂಧನದಿಂದ ವಿಮುಕ್ತಿ ಹೊಂದಲು ಭಾರತೀಯರನ್ನೆಲ್ಲ ಎಚ್ಚರಿಸುವಂತೆ ಮಾಡಿತು. ಅಂದು ಜಾತಿ, ಮತ, ಧರ್ಮಗಳ ವ್ಯತ್ಯಾಸವಿಲ್ಲದೆ ಎಲ್ಲರೂ ಸ್ವಾತಂತ್ರ್ಯಕ್ಕಾಗಿ ಒಕ್ಕೊರಲಿನಿಂದ ದನಿ ಎತ್ತಿದರು. ಸಾವಿರಾರು ಭಾರತೀಯರು ಸ್ವಾತಂತ್ರ್ಯ ಹೋರಾಟಕ್ಕೆ ಧುಮುಕಿದರು. ತಾಯ್ನಡ ರಕ್ಷಣೆಗಾಗಿ ನೂರಾರು ಮಂದಿ ಬ್ರಿಟಿಷರ ಗುಂಡಿಗೆ ಆಹುತಿಯಾದರು. ಭಗತ್ಸಿಂಗ್, ರಾಜಗುರು, ಸುಖ್ದೇವ್ರಂತಹ ತರುಣಯೋಧರನ್ನು ಬ್ರಿಟಿಷರು ಗಲ್ಲಿಗೇರಿಸಿದರು. ಹಾಗಿದ್ದರೂ ಭಾರತೀಯರು ಹಿಂತೆಗೆಯಲಿಲ್ಲ. ಮಹಾತ್ಮ ಗಾಂಧೀಜಿ, ಸುಭಾಶ್ಚಂದ್ರಭೋಸ್ ಮೊದಲಾದವರ ನೇತೃತ್ವದಲ್ಲಿ ನಡೆದ ಸಾತ್ವಿಕ, ಸ್ವಾಭಿಮಾನದ ಹೋರಾಟ ಹುಸಿಯಾಗಲಿಲ್ಲ. 1947 ಆಗಸ್ಟ್ 15ರಂದು ಭಾರತ ದೇಶವು ಸ್ವಾತಂತ್ರ್ಯಗಳಿಸಿಕೊಂಡಿತು. ನಮ್ಮ ಹೆಮ್ಮೆಯ ತ್ರಿವರ್ಣಧ್ವಜ ಬಾನಂಗಳದಲ್ಲಿ ನಲಿದಾಡಿತು. ನೂರಾರು ಯೋಧರ ತ್ಯಾಗ, ಬಲಿದಾನಗಳ ಪ್ರತೀಕವಾಗಿರುವ ಸ್ವಾತಂತ್ರ್ಯದ ಸವಿಯನ್ನು ನಾವಿಂದು ಅನುಭವಿಸುತ್ತಿದ್ದೇವೆ.
"ಸರ್ವ ಜನಾಂಗದ ಶಾಂತಿಯ ತೋಟ ರಸಿಕರ ಕಂಗಳ ಸೆಳೆಯುವ ನೋಟ' ಎಂಬ ಸಾಲುಗಳು ಭಾರತದ ವಿಶಿಷ್ಟ ಸಾಂಸ್ಕೃತಿಕ ಮೌಲ್ಯಗಳ ಬಗ್ಗೆ, ಇಲ್ಲಿನ ಅನುಪಮ ಕೌಟುಂಬಿಕ ಅನುಬಂಧ, ಪ್ರೀತಿ, ವಾತ್ಸಲ್ಯಗಳ ಕುರಿತುತೆಂದೇ ಭಾವಿಸಿಕೊಳ್ಳಬಹುದು.
"ಹಿಂದೂ, ಕ್ರೈಸ್ತ, ಮುಸಲ್ಮಾನ ಾರಸಿಕ ಜೈನರುದ್ಯಾನ" ಎಂಬ ನುಡಿಯೂ ವಿವಿಧತೆಯಲ್ಲಿ ಏಕತೆಯಿದೆ ಎಂಬ ಸಂದೇಶ ಸಾರುತ್ತಾ ವಿಶ್ವಕ್ಕೆ ಮಾದರಿಯೆನಿಸಿರುವ ನಮ್ಮ ದೇಶದ ಹಿರಿಮೆಯನ್ನೇ ಸಾರುತ್ತಿದೆ ಎಂದು ಕೊಳ್ಳೋಣ.
ವೈಜ್ಞಾನಿಕ ಪ್ರಗತಿ, ತಾಂತ್ರಿಕ ಅಭಿವೃದ್ಧಿ, ಐಟಿ, ಬಿಟಿ ಕ್ಷೇತ್ರಗಳಲ್ಲಿ ಮಾತ್ರವಲ್ಲದೆ ಸಂಗೀತ, ಸಾಹಿತ್ಯ, ಕಲೆ, ಕ್ರೀಡೆಗಳ ಖ್ಯಾತಿಯ ಮೂಲಕ ಜಗತ್ತಿನಲ್ಲಿ ಹೆಸರುಗಳಿಸುತ್ತಿರುವ ಭಾರತ ಇತ್ತೀಚೆಗಿನ ದಿನಗಳಲ್ಲಿ ಭ್ರಷ್ಟಾಚಾರ, ಹಿಂಸಾಚಾರಗಳಿಂದ ನಲುಗುತ್ತಿದೆ. ಮಹಿಳೆಯರನ್ನು ತಾಯಿಯಂತೆ, ಸೋದರಿಯರಂತೆ ಕಾಣುತ್ತಿದ್ದ ಸಂಸ್ಕೃತಿಗೆ ಎಲ್ಲೋ ಕುಂದುಂಟಾಗುತ್ತಿದೆ ಎನಿಸದಿರದು. ನಮ್ಮ ರಾಷ್ಟ್ರ, ರಾಷ್ಟ್ರಗೀತೆ, ರಾಷ್ಟ್ರೀಯ ಧ್ವಜಗಳನ್ನೆಲ್ಲ ಗೌರವದಿಂದ ಕಾಣಬೇಕಾದ ನಾವು ಕೇವಲ ಸ್ವಾರ್ಥ ಚಿಂತನೆಯತ್ತಲೇ ಹೆಚ್ಚು ಗಮನ ನೀಡುತ್ತಿದ್ದೇವೆ. ಅರುತ್ತಾರನೇ ಸ್ವಾತಂತ್ರ್ಯೋತ್ಸವವನ್ನಾಚರಿಸುತ್ತಿರುವ ಈ ಸುಸಂದರ್ಭದಲ್ಲಿ ನಾವೆಲ್ಲರೂ ಒಂದಿಷ್ಟು ಆತ್ಮಾವಲೋಕನ ಮಾಡಿಕೊಳ್ಳೋಣ.
ಜನನೀ ಜನ್ಮಭೂಮಿಶ್ಚ ಸ್ವರ್ಗಾದಪಿ ಗರೀಯಸೀ:
ಸಾವಿರಾರು ವರ್ಷಗಳ ಭವ್ಯ ಇತಿಹಾಸವಿರುವ ಈ ನೆಲದ ಸಂಸ್ಕೃತಿಯನ್ನು ಉಳಿಸಿ, ಬೆಳೆಸಬೇಕೆಂಬುದೇ ಪ್ರತಿಯೊಬ್ಬ ಭಾರತೀಯನ ಮನೋಭಿಲಾಷೆಯಾಗಿರಲಿ. "ಜನನೀ ಜನ್ಮಭೂಮಿಶ್ಚ ಸ್ವರ್ಗಾದಪಿ ಗರೀಯಸೀ" ಎಂಬಂತೆ ಸ್ವರ್ಗಕ್ಕಿಂತಲೂ ಮಿಗಿಲಾದ ತಾಯಿಯ ಮಡಿಲನ್ನೂ, ತಾಯ್ನೆಲದ ಒಡಲನ್ನೂ ರಕ್ಷಿಸುವ ಹೊಣೆ ನಮ್ಮೆಲ್ಲರದಾಗಿರಲಿ. ಹಿರಿಯರು ತ್ಯಾಗ, ಬಲಿದಾನಗಳ ಮೂಲಕ ಗಳಿಸಿಕೊಟ್ಟ ಈ ಸ್ವಾತಂತ್ರ್ಯವು ದುಷ್ಟಶಕ್ತಿಗಳಿಗೆ ಸಿಲುಕಿ ನರಳುವಂತಾಗದಿರಲಿ ಎಂಬುದೇ ಎಲ್ಲರ ಸದಾಶಯವಾಗಿರಲಿ. ಈ ಸ್ವಾತಂತ್ರ್ಯೋತ್ಸವದ ಸಂದರ್ಭದಲ್ಲಿ ನಾವೆಲ್ಲರೂ ಭವ್ಯ ಭಾರತದ ಸತ್ರ್ಪಜೆಗಳಾಗುವ  ಪ್ರತಿಜ್ಞೆಯೊಂದಿಗೆ ಭಾರತಾಂಬೆಯ ರಕ್ಷಣೆಗಾಗಿ ಕೈ ಜೋಡಿಸೋಣ.

ವಧು ಕೊರತೆ ನೀಗಿಸಲು ಹೊಸ ಹೆಜ್ಜೆ


ವಧುವಿನ ಕೊರತೆ ಎದುರಿಸುತ್ತಿರುವ ಬ್ರಾಹ್ಮಣ ಸಮಾಜದ ಯುವಕರಿಗೆ ವಿವಾಹ ಸಂಬಂಧ ಕಲ್ಪಿಸಲು ಸುಳ್ಯದ ಕಶ್ಯಪ್ ಯುವ ಬ್ರಾಹ್ಮಣ ವೇದಿಕೆ ಹೊಸ ಹೆಜ್ಜೆ ಇರಿಸಿದೆ. ದೂರದ ಕಾಶ್ಮೀರಿ ಬ್ರಾಹ್ಮಣ ಸಮಾಜದ ಯುವತಿಯರ ಜೊತೆ ವಿವಾಹ ಸಂಬಂಧ ಬೆಳೆಸುವ ಬಗ್ಗೆ ಚಿಂತನೆ ಹಾಗೂ ವಿಚಾರಗೋಷ್ಠಿಯನ್ನು ಏರ್ಪಡಿಸಿದೆ. ಆಗಸ್ಟ್ 18ರಂದು ಅಪರಾಹ್ನ 2 ಗಂಟೆಗೆ ಸುಳ್ಯದ ಚೆನ್ನಕೇಶವ ದೇವಸ್ಥಾನದ ಸಮೀಪ ಇರುವ ಸ್ವಾತಿ ಸಿಟಿ ಲಾಡ್ಜ್ನ ಪುಷ್ಯ ಹಾಲ್ನಲ್ಲಿ ವಿಚಾರಗೋಷ್ಠಿ ನಡೆಯಲಿದೆ.
ಅಂದು ಕರ್ನಾಟಕ ಹಾಗೂ ನೆರೆಯ ಕೇರಳ ರಾಜ್ಯದ ದ್ರಾವಿಡ ಬ್ರಾಹ್ಮಣ ಸಮಾಜದ ಎಲ್ಲಾ ಪಂಗಡದವರು ಭಾಗವಹಿಸುವ ನಿರೀಕ್ಷೆ ಇದೆ. ಅಲ್ಲದೆ ವಿವಾಹಾಸಕ್ತ ಸ್ತ್ರೀ, ಪುರುಷರ ನೋಂದಣಿ ಕೂಡ ಈ ಸಂದರ್ಭದಲ್ಲಿ ನಡೆಯಲಿದೆ. ಮರು ವಿವಾಹಗಳಿಗೂ ಅವಕಾಶವಿದೆ. ಹೆಚ್ಚಿನ ಮಾಹಿತಿಗಾಗಿ ವೇದಿಕೆ ಅಧ್ಯಕ್ಷ ಆರ್.ಕೆ. ಭಟ್ (9980567416) ಅವರನ್ನು ಸಂಪರ್ಕಿಸಬಹುದು.

ಓದೋಣ ಬನ್ನಿ......,


ಓದುವಿಕೆ ಮತ್ತು ಬರೆಯುವಿಕೆ ಅಷ್ಟು ಸುಲಭದಲ್ಲಿ ಸಿದ್ಧಿಸಲಾರವು. ಅವಕ್ಕೆ ತಕ್ಕ ಪರಿಶ್ರಮ ಅಗತ್ಯ. ಓದುವಿಕೆ ಇಲ್ಲದೆ ಬರೆಯುವಿಕೆ ಅಸಾಧ್ಯ. ಒಬ್ಬ ವ್ಯಕ್ತಿಯಿಂದ ಉತ್ತಮ ಲೇಖನವೊಂದು ರಚನೆಯಾಗಬೇಕಾದರೆ ಆತ ಹಲವು ಆಕರ ಗ್ರಂಥಗಳನ್ನು ಓದಿ ಮಾಹಿತಿ ಸಂಗ್ರಹ ಮಾಡಲೇ ಬೇಕು. ಹಾಗಾಗಿ ಓದುವಿಕೆಗೆ ಬಹಳ ಮಹತ್ವವಿದೆ.
ವಿದ್ಯಾರ್ಥಿಗಳಲ್ಲಿ ಓದುವಿಕೆ ಬಗ್ಗೆ ಆಸಕ್ತಿ ಮೂಡಿಸುವಲ್ಲಿ ಶಿಕ್ಷಕನ ಪಾತ್ರ ಮಹತ್ವದ್ದು. ಅದಕ್ಕಾಗಿ ಆತನಲ್ಲಿ ತಾಳ್ಮೆ, ಸಹನೆ ಇರಬೇಕು. "ಸಹನೆ ವಜ್ರದ ಕವಚ' ಎಂಬ ಡಿ.ವಿ.ಜಿ.ಯವರ ಮಾತು ಬರಲೇ ಬಾರದು. ಕೋಪದ ನಟನೆ ಮಾತ್ರ ಆತ ಮಾಡಬಹುದು. ಉತ್ತಮ ಶಿಕ್ಷಕನ ಮಾರ್ಗದರ್ಶನದಿಂದ ಮಗು ಓದುವಿಕೆಯಲ್ಲಿ ಹೆಚ್ಚಿನ ಸಾಧನೆಯನ್ನು ಮಾಡಬಹುದು.
ತರಗತಿಯ ಪಾಠದ ವೇಳೆಯಲ್ಲಿ ಮಾತ್ರವಲ್ಲ, ಬಿಡುವಿನ ವೇಳೆಯಲ್ಲಿಯೂ ವಿದ್ಯಾರ್ಥಿಗಳನ್ನು ಗ್ರಂಥಾಲಯಕ್ಕೋ, ವಾಚನಾಲಯಕ್ಕೋ ಕರೆದೊಯ್ದು ಚಿಕ್ಕಪುಟ್ಟ ಪುಸ್ತಕಗಳನ್ನು ಕೊಟ್ಟು ಓದಿಸಬಹುದು. ಓದಿದ ವಿಷಯದ ಮೇಲೆ ಪ್ರಶ್ನೆಗಳನ್ನು ಕೇಳಬೇಕು. ಉತ್ತಮವಾದ ಉತ್ತರಕ್ಕೆ ಮೆಚ್ಚುಗೆ ಸೂಚಿಸಬೇಕು. ತಪ್ಪಿದರೆ ತಾಳ್ಮೆಯಿಂದ ತಿದ್ದಬೇಕು. ತರಗತಿಯ ಕೋಣೆಯೊಳಗಡೆಯೇ ವಿವಿಧ ಪತ್ರಿಕೆಗಳನ್ನು, ನಿಯತಕಾಲಿಕೆಗಳನ್ನು, ವಿಶೇಷಾಂಕಗಳನ್ನು ಇರಿಸಿ ಓದುವ ಮೂಲೆಯೊಂದನ್ನು ನಿರ್ಮಾಣ ಮಾಡಬಹುದು. ಅದನ್ನು ನಿಭಾಯಿಸುವ ಹೊಣೆಯನ್ನು ಮಕ್ಕಳಿಗೇ ನೀಡುವುದು ಸೂಕ್ತ. ಆಗ ಅವರಿಗೆ ಜವಾಬ್ದಾರಿಯೂ ಅಂಟಿಕೊಳ್ಳುತ್ತದೆ. ಓದಿದ ವಿಚಾರಗಳನ್ನು ಸ್ವತಂತ್ರವಾಗಿ ಬರೆಯಲು ಅಗತ್ಯವುಳ್ಳ ಸೂಚನೆಗಳನ್ನು ಶಿಕ್ಷಕರು ನೀಡಬೇಕು. ಓದು-ಬರಹಗಳ ಕುರಿತು ಚಿಕ್ಕಪುಟ್ಟ ವಿಮರ್ಶೆಗಳನ್ನೂ ಮಾಡಿಸಬೇಕು. ಮಾತ್ರವಲ್ಲ, ವಿಷಯಗಳನ್ನು ಮನದಟ್ಟಾಗುವಂತೆ ತಿಳಿಯ ಹೇಳಿ ಮಾರ್ಗದರ್ಶನ ಮಾಡಬೇಕು.
ಇಷ್ಟೆಲ್ಲ ಕೆಲಸಗಳನ್ನು ಮಾಡಬೇಕಾದರೆ ಶಿಕ್ಷಕನಾದವನು ಮೊದಲು ಓದಬೇಕು. ಓದಿ ಅರ್ಥೈಸಿಕೊಳ್ಳಬೇಕು. ತನ್ಮೂಲಕ ಜ್ಞಾನವಂತನಾಗಿರಬೇಕು. ನಂತರ ವಿದ್ಯಾರ್ಥಿಗಳನ್ನು ಓದಿಸಿ, ಸುಸಂಸ್ಕೃತರನ್ನಾಗಿಸಬೇಕು. ಆದರೆ ಇಂದು ಅದೆಷ್ಟೋ ಮಂದಿ ಶಿಕ್ಷಕರು ಗ್ರಂಥಗಳ ಅವಲೋಕನವನ್ನು ಮಾಡದೇ ಮಗುವಿಗೆ ಬೋಧಿಸುವ ಕೆಲಸ ಮಾಡುತ್ತಿರುವುದು ಕಂಡು ಬರುತ್ತಿದೆ. ಸೋಮಾರಿತನವೆಂಬುದು ಶಿಕ್ಷಕರ ಬಳಿ ಸುಳಿಯಲೂ ಬಾರದು. ಸದಾಕಾಲ ಕುರ್ಚಿಗಂಟಿಕೊಂಡೇ ಇದ್ದು ಮಕ್ಕಳನ್ನು ವೈರಿಗಳಂತೆ ಕಾಣುವ ಶಿಕ್ಷಕರಿಗೆ ಇಂಥ ವಿಚಾರಗಳು ಅಪಥ್ಯವಾಗುವುದರಲ್ಲಿ ಸಂದೇಹವಿಲ್ಲ. "ಓದಿ ಓದಿ ಓದಿಸಿದ ಓಜನಿಗೆ ಚಟ್ಟಗಟ್ಟಿಗನೆನೆ ಹೆಮ್ಮೆ" ನಾಡೋಜ ಕವಿ ಕಯ್ಯರರ ಈ ವಾಣಿ ಸಾರ್ಥಕವಾಗುವಲ್ಲಿ ಎಲ್ಲ ಶಿಕ್ಷಕರ ಪ್ರಯತ್ನವೂ ನಿರಂತವಾಗಿರಬೇಕಲ್ಲವೇ?
"ಓದದ ಬಾಯಿ ಬಿಲದ ಬಾಯಿ' ಎಂಬ ಕವಿವಾಣಿ ಓದುವಿಕೆ ಇಲ್ಲದವನ ಜೀವನವೇ ವ್ಯರ್ಥವೆಂಬುದನ್ನು ಸೂಚಿಸುವಂತಿದೆ. ಎಲ್ಲರೂ ಚೆನ್ನಾಗಿ ಓದಬೇಕು. ಉತ್ತಮ ಪುಸ್ತಕಗಳ ಓದುವಿಕೆಯಿಂದ ಉತ್ತಮ ಗುಣಗಳೂ ಸಿದ್ಧಿಸುತ್ತವೆ. ತನ್ಮೂಲಕ ವ್ಯಕ್ತಿ ದೈವತ್ವಕ್ಕೇರಬಲ್ಲನು. ಸಮಾಜಕ್ಕೆ ಉತ್ತಮ ಗುರುವೂ ಆಗಬಲ್ಲನು. ಉತ್ತಮ ಪುಸ್ತಕಗಳೇ ನಮ್ಮ ನಿಜವಾದ ಸ್ನೇಹಿತರು. ಅಂಥ ಪುಸ್ತಕಗಳನ್ನು ಓದಿದಷ್ಟೂ ವಿದ್ಯಾಬುದ್ಧಿಗಳ ಸಿದ್ದಿಯುಂಟಾಗುವುದರಲ್ಲಿ ಸಂದೇಹವಿಲ್ಲ. ಆಂತರಂಗಿಕ ಪ್ರಗತಿ ಅಥವಾ ಹೃದಯ ವೈಶಾಲ್ಯ ಹೊಂದುವುದೇ ಓದುವಿಕೆಯ ಪ್ರಯೋಜನವಾಗಿದೆ. ಓದುವಿಕೆ ಒಂದು ಸಾಧನೆ ಅಥವಾ ತಪಸ್ಸು. ಅಲ್ಲಿ ಏಕಾಗ್ರತೆ ಇರಬೇಕು. ಆ ಸಾಧನೆಯ ಹಾದಿಯಲ್ಲಿ ಸಾಗಿದರೆ ಬೆಳಗುವುದು ದಿವ್ಯಾತ್ಮ ಜ್ಯೋತಿ.
ಮಗುವಿಗೆ ಮನೆಯೇ ಮೊದಲ ಪಾಠಶಾಲೆ. ಜನನಿಯೇ ಮೊದಲ ಗುರು. ಆದುದರಿಂದ ಎಲ್ಲ ಮನೆಗಳಲ್ಲಿಯೂ ಓದುವಿಕೆಗೆ ಭದ್ರವಾದ ಪಂಚಾಂಗವನ್ನು ಹಾಕುವ ಪುಟ್ಟ ಗ್ರಂಥಾಲಯ ಇರಲೇ ಬೇಕು. ಅಲ್ಲಿ ಲಭ್ಯವಿರುವ ಪುಸ್ತಕಗಳನ್ನೆಲ್ಲ ವರ್ಗೀಕರಣ ಮಾಡಿ ಒಪ್ಪ ಓರಣವಾಗಿ ಜೋಡಿಸಿಡ ಬೇಕು. ಬೇಕಾದ ಪುಸ್ತಕಗಳು ಸುಲಭವಾಗಿ ಕೈಗೆ ದೊರಕುವಂತಿರಬೇಕು. ಹಾಗಿದ್ದರೆ ಮಾತ್ರ ಓದುವಿಕೆ ನಿರಾತಂಕವಾಗಿ ಸಾಗುತ್ತದೆ.
ಓದು ಸಂತಸಕ್ಕಾಗಿ, ಓದು ಜ್ಞಾನಕ್ಕಾಗಿ
ಓದು ಸಾಹಿತ್ಯ ಸಾಗರದ ಪರಿಚಯಕ್ಕಾಗಿ
ಓದುವಿಕೆ ಬೆಳಕಾಗಿ ದಾರಿಯನು ತೋರುವುದು
ಓದುವಿಕೆ ಸಂಕುಚಿತ ಭಾವನೆಯ ನೀಗುವುದು
ಓದುವೇ ನುಡಿಯೊಲವು, ಓದುವುದೆ ಹಗೆ ಗೆಲುವು
ಓದುವುದೆ ತಾಯ ಮಡಿಲ ಸುಖವು.
ಆದರಿಂದು ಮಕ್ಕಳು, ಹಿರಿಯರು ಎಂಬ ಭೇದವಿಲ್ಲದೆ ಎಲ್ಲರಲ್ಲೂ ಓದುವ ಹವ್ಯಾಸ ಕುಂಠಿತವಾಗುತ್ತಾ ಇದೆ. ಇದಕ್ಕೆ ಕಾರಣಗಳೂ ಹಲವಾರು. ಮುಖ್ಯವಾಗಿ ದೃಶ್ಯ ಮಾಧ್ಯಮ, ಶ್ರವ್ಯ ಮಾಧ್ಯಮ ಮೊದಲಾದವುಗಳು ಇಂದು ಮನುಷ್ಯನ ಓದುವಿಕೆಯನ್ನು ಕುಂಠಿತಗೊಳಿಸಿವೆ. ಅಂತರ್ಜಾಲ, ದೂರವಾಣಿಗಳೂ ಕೂಡಾ ಓದು, ಬರಹಗಳ ಮೇಲೆ ಗದಾ ಪ್ರಹಾರ ಮಾಡುತ್ತಲೇ ಇವೆ. ಬಹಳ ಹಿಂದೆ ಪ್ರಧಾನ ಸಂಪರ್ಕ ಸಾಧನವಾಗಿದ್ದ ಪತ್ರಲೇಖನ ಇಂದು ಸಂಪೂರ್ಣ ನಿಂತು ಹೋಗಿದೆ. ಇದರಿಂದಾಗಿ ಸಾಹಿತ್ಯದ ಒಂದು ಪ್ರಧಾನ ಪ್ರಕಾರವೇ ಸತ್ತು ಹೋದಂತಾಗಿದೆ. ಕ್ಷಣ, ಕ್ಷಣಕ್ಕೂ ಆಗುತ್ತಿರುವ ನವನವೀನ ಆವಿಷ್ಕಾರಗಳಿಂದಾಗಿ ಮನುಷ್ಯನ ಕೈ ಬರಹ ಸಂಪೂರ್ಣ ಮಾಯವಾದರೂ ಆಶ್ಚರ್ಯ ಪಡಬೇಕಾಗಿಲ್ಲ. ಅಂತಾಗುವ ಮೊದಲೇ ನಾವೆಲ್ಲರೂ ಎಚ್ಚೆತ್ತುಕೊಳ್ಳೋಣ. ಎಲ್ಲರೂ ಓದಿ ಸಾಧಿಸೋಣ, ಓದಿ ಬೆಳೆಯೋಣ, ಓದುತ್ತಲೇ ಗಳಿಸೋಣ.

ಮಾತ್, ಮಾತಲಿ...


ಪ್ರಪಂಚದಲ್ಲಿ ಅದೆಷ್ಟೋ ಜೀವ ಕೋಟಿಗಳಿವೆ. ಅವುಗಳಲ್ಲಿ ಮಾನವನೂ ಒಬ್ಬ. ಆದರೆ ಉಳಿದ ಜೀವಿಗಳಿಗಿಂತ ಮಾನವ ಭಿನ್ನವಾಗಿದ್ದಾನೆ. ಆತನಲ್ಲಿ ಅಗಾಧವಾದ ಬುದ್ಧಿವಂತಿಕೆಯಿದೆ, ಆಳವಾದ ಚಿಂತನೆಯಿದೆ. ಭವಿಷ್ಯದ ಸುಂದರ ಕಲ್ಪನೆಯಿದೆ. ಆಸೆ-ಆಕಾಂಕ್ಷೆಗಳು, ಅಭಿಪ್ರಾಯಗಳು, ಸುಖ-ದು:ಖಗಳು ಮೊದಲಾದ ಸಹಜ ಗುಣಗಳನ್ನು ಪರಸ್ಪರ ಹಂಚಿಕೊಂಡು ವಿಚಾರ ವಿನಿಮಯ ಮಾಡುವುದಕ್ಕಾಗಿ ಭಾಷೆಯನ್ನು ಕಂಡು ಹಿಡಿದ.
ಮನುಷ್ಯ ಇದುವರೆಗೆ ಅದೆಷ್ಟೋ ಸಂಶೋಧನೆಗಳನ್ನು ಮಾಡಿದ್ದಾನೆ. ಚಂದ್ರಲೋಕ, ಮಂಗಳ ಮೊದಲಾದ ಗ್ರಹಗಳಿಗೆ ಪ್ರಯಾಣ ಬೆಳೆಸಿದ್ದಾನೆ. ದೂರವಾಣಿ, ದೂರದರ್ಶನ, ಕಂಪ್ಯೂಟರ್, ಇಂಟರ್ನೆಟ್, ತದ್ರೂಪ ಸೃಷ್ಟಿ... ಮೊದಲಾದ ಸಾಧನೆಗಳನ್ನು ಕಂಡು ಹಿಡಿದಿದ್ದಾನೆ. ಈ ಎಲ್ಲದಕ್ಕಿಂತಲೂ ಮಿಗಿಲಾದ ಮಹತ್ಸಾಧನೆಯೆಂದರೆ ಭಾಷೆಯನ್ನು ಸಂಶೋಧಿಸಿದುದು. ಭಾಷೆಗೆ ಸಮಾನವಾದ ಸಂಶೋಧನೆ ಇನ್ನೊಂದಿಲ್ಲ ಎನ್ನಬಹುದು. ಎಲ್ಲ ಆವಿಷ್ಕಾರಗಳಿಗೂ ಭಾಷೆಯೇ ಮೂಲ, ಅದುವೇ ತಾಯಿ.
ಭಾವನೆಗಳ ವಿನಿಮಯ ಮಾಧ್ಯಮವಾಗಿ ಜನ್ಮ ತಾಳಿದ ಭಾಷೆ ಮನುಕುಲದ ಮಹಾಸಂಪತ್ತು. ಇಂದು ಪ್ರಪಂಚದಲ್ಲಿ ಸುಮಾರು ಆರು ಸಾವಿರಕ್ಕೂ ಹೆಚ್ಚು ಭಾಷೆಗಳು ಚಲಾವಣೆಯಲ್ಲಿವೆ ಎಂಬುದು ವಿದ್ವಾಂಸರ ಅಭಿಪ್ರಾಯ. ಈ ಎಲ್ಲ ಭಾಷೆಗಳೂ ಒಂದೇ ಕಾಲದಲ್ಲಿ ಜನ್ಮ ತಾಳಿದವಲ್ಲ. ಬಹಳ ಹಿಂದೆ ಕೆಲವೇ ಭಾಷೆಗಳಿದ್ದವು, ಕಾಲಾನುಕ್ರಮದಲ್ಲಿ ಶಾಖೋಪಶಾಖೆಗಳಾಗಿ ಕವಲೊಡೆಯುವ ನಿರಂತರ ಪ್ರಕ್ರಿಯೆಗನುಗುಣವಾಗಿ ಆ ಭಾಷೆಗಳಿಂದ ಇಂದಿನ ಸಾವಿರಾರು ಭಾಷೆಗಳು ರೂಪು ತಾಳಿವೆ ಎಂದು ಅಭಿಪ್ರಾಯ ಪಡುತ್ತಾರೆ ಭಾಷಾ ವಿಜ್ಞಾನಿಗಳು.
"ಇದು ಮಂಧಂ ತಪಮ: ಕೃತ್ಸ್ನಂ ಜಾಯೇತ ಭುವನ್ತ್ರಯಮ್
ಯದಿ ಶಬ್ದಾಹ್ವಯಂ ಜ್ಯೋತಿ ಸಂಸಾರಾನ್ನ ದೀಪ್ಯತೆ"
ಎಂಬುದಾಗಿ ಭಾಷೆಯನ್ನು ಬೆಳಕಿಗೆ ಹೋಲಿಸಿ ಅದರ ಮಹತ್ವವನ್ನು ಲೋಕಕ್ಕೆ ಸಾರಿದ್ದಾನೆ ದಂಡಿ.
ಮಾತಿನ ಮಹತ್ವವನ್ನು ಬಲ್ಲ ಅನುಭವಿ ಅಲ್ಲಮ ಪ್ರಭು "ಮಾತೆಂಬುದು ಜ್ಯೋತಿರ್ಲಿಂಗ" ಎಂದು ಹೊಗಳಿದ್ದಾನೆ. "ನುಡಿದರೆ ಮುತ್ತಿನ ಹಾರದಂತಿರಬೇಕು, ನುಡಿದರೆ ಮಾಣಿಕ್ಯದ ದೀಪ್ತಿಯಂತಿರಬೇಕು, ನುಡಿದರೆ ಸ್ಪಟಿಕದ ಶಲಾಕೆಯಂತಿರಬೇಕು, ನುಡಿದರೆ ಲಿಂಗ ಮೆಚ್ಚಿ ಅಹುದು ಅಹುದು ಎನಬೇಕು" ಎನ್ನುವ ಮೂಲಕ ಬಸವಣ್ಣ ಮೊದಲಾದ ಶಿವಶರಣರು ಭಾಷೆಗೆ ನ್ನತ ಸ್ಥಾನ ಕೊಟ್ಟಿದ್ದಾರೆ. "ಮಾತೇ ಮಾಣಿಕ್ಯ" ಎಂದಿದ್ದಾನೆ ಸರ್ವಜ್ಞ. ಭಾಷೆಯಿಂದಲೇ ಮನುಜಕುಲದ ಮುನ್ನಡೆಯಾಯಿತು ಎಂಬುದು ಪರಮ ಸತ್ಯ.
ಭಾಷೆಗಳಲ್ಲಿ ಹಲವು ವರ್ಗಗಳಿವೆ. ಒಂದು ಮೂಲ ಭಾಷೆಯಿಂದ ಟಿಸಿಲೊಡೆದ ಭಾಷೆಗಳೆಲ್ಲ ಒಟ್ಟು ಸೇರಿ ಒಂದು ಭಾಷಾ ಕುಟುಂಬ ಎನಿಸಿಕೊಳ್ಳುತ್ತದೆ. ನಮ್ಮ ದ್ರಾವಿಡ ಭಾಷಾ ಪರಿವಾರವೂ ಇಂಥ ಭಾಷಾ ಕುಟುಂಬಗಳಲ್ಲಿ ಒಂದು. ಕನ್ನಡ ಭಾಷೆ, ತೆಲುಗು, ಮಲಯಾಳ, ತುಳು-ಪ್ರಧಾನವಾದ ದ್ರಾವಿಡ ಭಾಷೆಗಳು. ಭಾಷೆಗಳ ಕಲಿಕೆಯಲ್ಲಿ ಆಲಿಸುವಿಕೆ, ಮಾತನಾಡುವಿಕೆ, ಓದುವಿಕೆ ಮತ್ತು ಬರೆಯುವಿಕೆ ಎಂಬ ನಾಲ್ಕು ಪ್ರಧಾನ ಕೌಶಲಗಳಿವೆ. ಇವುಗಳಲ್ಲಿ ಆಲಿಸುವಿಕೆ ಮತ್ತು ಮಾತನಾಡುವಿಕೆ ಎಂಬ ಎರಡು ಕೌಶಲಗಳನ್ನು ಸುಲಭವಾಗಿ ಬೆಳೆಸಲು ಸಾಧ್ಯವಿದೆ. ಅವುಗಳಿಗೆ ವಿಶೇಷ ಪರಿಶ್ರಮ ಅತ್ಯವಿಲ್ಲ. ಅವು ತಾವಾಗಿ ಸಿದ್ಧಿಸುತ್ತವೆ. ಸುತ್ತುಮುತ್ತಲಿನ ಪರಿಸರ ಹಾಗೂ ಒಡನಾಟಗಳಿಂದ ಅವು ಕೈಗೂಡುತ್ತವೆ. ಆಲಿಸುವಿಕೆಯಲ್ಲಿ ತೊಡಕಿಲ್ಲದಿದ್ದರೆ ಮಾತ್ರ ಮಾತುಗಾರಿಕೆ ಸುಲಭವೆನಿಸುತ್ತದೆ.

ಅಡಿಕೆ ಕೊಳೆ ರೋಗ ತೊಲಗಿಸಲು ಬಂದಿದೆ ರಾಮಬಾಣ


ಮಳೆಗಾಲದಲ್ಲಿ ಹೆಚ್ಚಾಗಿ ಅಡಿಕೆಗೆ ತಗಲುವ ಕೊಳೆರೋಗ ನಿಯಂತ್ರಿಸಲು ಸಿಂಪಡಿಸಬಹುದಾದ ದ್ರಾವಣವೊಂದನ್ನು ಬೆಂಗಳೂರಿನ ಬಯೋ-ಪೆಸ್ಟ್ ಮ್ಯಾನೇಜ್ ಮೆಂಟ್ ಸಂಸ್ಥೆ ತಯಾರಿಸಿದೆ. ಈ ದ್ರಾವಣವನ್ನು ಸಿಂಪಡಿಸಿದಲ್ಲಿ ಇದರ ಪರಿಣಾಮ ಮೂರು ತಿಂಗಳುಗಳ ಕಾಲ ಉಳಿಯುತ್ತದೆ ಎನ್ನುತ್ತಾರೆ ಕೃಷಿ ಪಂಡಿತ ಪ್ರಶಸ್ತಿ ವಿಜೇತ, ಸಾವಯವ ಕೃಷಿಕ ಬಿ.ಸಿ.ಅರವಿಂದ್.
ಮಲೆನಾಡಿನಲ್ಲಿ ಮಳೆಗಾಲ ಪ್ರಾರಂಭವಾಯಿತೆಂದರೆ ಅಡಿಕೆ ಬೆಳೆಗಾರರಲ್ಲಿ ಒಂದು ರೀತಿಯ ಆತಂಕದ ಸ್ಥಿತಿ ನಿರ್ಮಾಣವಾಗುತ್ತದೆ. ಒಂದೆಡೆ ಔಷಧಿ ಸಿಂಪರಣೆ ಮಾಡಲು ಅಡ್ಡಿ ಪಡಿಸುವ ಮಳೆ, ಮತ್ತೊಂದೆಡೆ ಕೆಲಸದವರ ಅಭಾವ. ಗಗನಕ್ಕೆ ಏರಿರುವ ಮೈಲುತುತ್ತದ ಬೆಲೆ, ಇದರಲ್ಲಿನ ಕಳಪೆ ಗುಣಮಟ್ಟ...ಇಷ್ಟೆಲ್ಲಾ ಸಮಸ್ಯೆಗಳು ಮಳೆಗಾಲದ ಜೊತೆಯಲ್ಲಿಯೇ ಬರುತ್ತವೆ. ಅಡಿಕೆ ಬೆಳೆಗಾರರು ಮುಖ್ಯವಾಗಿ ಕೊಳೆ ರೋಗ ಎಂದರೆ ಏನು?. ಇದು ಬರುವುದು ಹೇಗೆ? ಎಂಬುದನ್ನು ಮೊದಲು ತಿಳಿದುಕೊಳ್ಳಬೇಕು. ನಂತರವೇ ಯಾವ ಔಷಧಿ ಸಿಂಪರಣೆ ಮಾಡಿದರೆ ಒಳ್ಳೆಯದು ಎಂಬುದರ ಬಗ್ಗೆ ತಿಳಿದುಕೊಳ್ಳಬೇಕು.
ಕೊಳೆರೋಗ ಎಂದರೆ ಹೊಸ ಜೀವಿಯಲ್ಲ. ಬಹಳ ಹಿಂದಿನಿಂದಲೂ ಭೂಮಂಡಲದಲ್ಲಿ ವಾಸಿಸುತ್ತಲೇ ಇದ್ದಂತಹ ಜೀವಿ. ಇದಕ್ಕೆ ಅಡಿಕೆ ಎಂಬ ಮರ, ಅದರ ಫಸಲು ಒಂದು ಆಹಾರ, ಅಲ್ಲಿರುವ ಹವಾಮಾನ ಅವುಗಳ ಬೆಳವಣಿಗೆಗೆ ಹೆಚ್ಚು ಅನುಕೂಲಕರವಾಗಿದೆ. ಆದುದರಿಂದ ಅಲ್ಲಿ ಅದು ಬೆಳೆದು ಅಡಿಕೆಗೆ ರೋಗವನ್ನು ತರುತ್ತದೆ. ಇದೊಂದು ಪರಾವಲಂಬಿ ಜೀವಿಯಿಂದ ಉಂಟಾಗುವ ಹಾನಿ.
ಇತ್ತೀಚಿನ ದಿನಗಳಲ್ಲಿ ಹೆಚ್ಚಿನ ಅಡಿಕೆ ಬೆಳೆಗಾರರು ಬೋರ್ಡೋ ದ್ರಾವಣವನ್ನು ವೈಜ್ಞಾನಿಕವಾಗಿ ತಯಾರಿಸುತ್ತಿಲ್ಲ ಎಂಬುದು ಕೃಷಿ ತಜ್ಞರ ಅಳಲು. ಔಷಧಿ ಸಿಂಪಡಿಸುವ ವಿಧಾನ ಸಹ ಸರಿಯಿರುವುದಿಲ್ಲ. ಔಷಧಿ ಸಿಂಪಡಿಸುವಾಗ ಅಧಿಕ ಒತ್ತಡದಲ್ಲಿ ಸಿಂಪರಣ ದ್ರಾವಣವು ಹಿಮದ ರೂಪದಲ್ಲಿ ಗೊಂಚಲಿನ ಮೇಲೆ ಬಿದ್ದಲ್ಲಿ ಮಾತ್ರ ಪರಿಣಾಮ ಉತ್ತಮವಾಗಿರುತ್ತದೆ ಎನ್ನುತ್ತಾರವರು.
 ಬಯೋ-ಪೆಸ್ಟ್ ಮ್ಯಾನೇಜ್ಮೆಂಟ್, ಬೆಂಗಳೂರು ಇವರ ಉತ್ಪಾದನೆಯಾದ ಈ ದ್ರಾವಣವನ್ನು ಚಿಕ್ಕಮಗಳೂರು, ಶಿವಮೊಗ್ಗ, ಹಾಸನ ಜಿಲ್ಲೆಯ ರೈತರು ಉಪಯೋಗಿಸಿ ಉತ್ತಮ ಫಲಿತಾಂಶ ಕಂಡುಕೊಂಡಿದ್ದಾರೆ ಎನ್ನುತ್ತಾರೆ ಸಂಸ್ಥೆಯ ಅಧಿಕಾರಿಗಳು. ಸಂಸ್ಥೆಯ ಅಧಿಕಾರಿಗಳು ಶಿವಮೊಗ್ಗ ಜಿಲ್ಲೆಯ ಅಡಿಕೆ ಬೆಳೆಗಾರರಾಗಿದ್ದು, ಅಡಿಕೆ ಕೊಳೆರೋಗದ ಬಗ್ಗೆ ಸಂಪೂರ್ಣ ಅಧ್ಯಯನ ಮಾಡಿದ್ದಾರೆ.
ಇದನ್ನು ಸಿಂಪಡಿಸುವಾಗ ಕೊಳೆರೋಗದ ಶೀಲೀಂದ್ರವಾದ ‘ಪೈಟಾಪ್ ತೋರಾ‘ಪ್ರತಿರೋಧಕ ಶಕ್ತಿ ಬೆಳೆಸಿಕೊಳ್ಳುತ್ತದೆ. ಇದರ ಪರಿಣಾಮವಾಗಿ ಕೊಳೆರೋಗವು ನಿಯಂತ್ರಣದಲ್ಲಿರುತ್ತದೆ. ಇದು ಸುಲಭವಾಗಿ ಉಪಯೋಗಿಸಬಹುದಾದ ಒಂದು ಉತ್ಪನ್ನ ಹಾಗೂ ನೀರಿನಲ್ಲಿ ಬೇಗ ಕರಗುವ ದ್ರವ ರೂಪದ ಮಿಶ್ರಣ. ಇದು ಯಾವುದೇ ಅಡ್ದ ಪರಿಣಾಮಗಳಿಲ್ಲದ ಔಷಧ. ಈ ದ್ರಾವಣ ಬೆಂಗಳೂರು ಕೃಷಿ ವಿವಿ ಹಾಗೂ ಅಡಿಕೆ ಸಂಶೋಧನಾ ಕೇಂದ್ರ, ನವಿಲೆ, ಇವರಿಂದ ಪರೀಕ್ಷಿಸಲ್ಪಟ್ಟು, ಅನುಮೋದಿಸಿ, ಶಿಫಾರಸ್ಸು ಮಾಡಿರುವ ಒಂದು ಉತ್ಪನ್ನ. ಹೆಚ್ಚಿನ ಮಾಹಿತಿಗಾಗಿ ಮೊ.9448065479, 9448282116 ಸಂಪರ್ಕಿಸಬಹುದು.

ವಿಶ್ವ ಪಾರಂಪರಿಕ ಪಟ್ಟಿಗೆ ಪಶ್ಚಿಮ ಘಟ್ಟ ಸೇರ್ಪಡೆಯೂ... ರಾಜ್ಯ ಸರಕಾರದ ವಿರೋಧವೂ...


ಅಪೂರ್ವ ಹಾಗೂ ಅಮೂಲ್ಯವಾದ ಸಸ್ಯ ಸಂಪತ್ತು ಹಾಗೂ ಜೀವ ವೈವಿಧ್ಯವಿರುವ ಪಶ್ಚಿಮ ಘಟ್ಟ ಶ್ರೇಣಿಯ 39 ತಾಣಗಳನ್ನು ವಿಶ್ವ ಪಾರಂಪರಿಕ ತಾಣಗಳ ಪಟ್ಟಿಗೆ ಸೇರಿಸಲು ರಷ್ಯಾದ ಪೀಟರ್ಸ್ಬರ್ಗ್ನಲ್ಲಿ ನಡೆದ ವಿಶ್ವ ಪಾರಂಪರಿಕ ಸಮಿತಿ (ಯುನೆಸ್ಕೊ) ಸಭೆಯಲ್ಲಿ ತೀರ್ಮಾನಿಸಲಾಗಿದೆ. ಇದರಲ್ಲಿ ಕೊಡಗಿನ ಪುಷ್ಪಗಿರಿ, ಬ್ರಹ್ಮಗಿರಿ, ತಲಕಾವೇರಿ ಸೇರಿದಂತೆ 5 ವನ್ಯಧಾಮಗಳು ಸೇರಿವೆ. ಭಾರತೀಯ ವನ್ಯಜೀವಿ ಸಂಸ್ಥೆಯ ಡೀನ್ ಡಾ॥ ವಿನೋದ್ ಬಿ. ಮಾಥುರ್, ಸಮ್ಮೇಳನದಲ್ಲಿ ಭಾಗವಹಿಸಿದ್ದ ಭಾರತದ ನಿಯೋಗದಲ್ಲಿದ್ದರು. 17 ರಾಷ್ಟ್ರಗಳ ಪ್ರತಿನಿಧಿಗಳು ಸಮ್ಮೇಳನದಲ್ಲಿ ಪಾಲ್ಗೊಂಡಿದ್ದರು.
ಪಶ್ಚಿಮಘಟ್ಟ ಪ್ರದೇಶದಲ್ಲಿರುವ ನಿವಾಸಿಗಳ ವ್ಯಾಪಕ ವಿರೋಧದ ನಡುವೆಯೂ ವಿಶ್ವ ಪಾರಂಪರಿಕ ಸಮಿತಿ ಕರ್ನಾಟಕ ರಾಜ್ಯದ 10 ಪ್ರದೇಶಗಳು ಸೇರಿದಂತೆ ಭಾರತದ ಒಟ್ಟು 39 ತಾಣಗಳನ್ನು ವಿಶ್ವ ಪಾರಂಪರಿಕ ತಾಣಗಳ ಪಟ್ಟಿಗೆ ಸೇರ್ಪಡೆಗೊಳಿಸಿದೆ.
ಕೊಡಗಿನ ಪುಷ್ಪಗಿರಿ, ಬ್ರಹ್ಮಗಿರಿ, ತಲಕಾವೇರಿ ವನ್ಯಧಾಮ ಹಾಗೂ ಪಡಿನಾಲ್ಕುನಾಡು ಕ್ಲಸ್ಟರ್ ಮತ್ತು ಜಿಲ್ಲೆಗೆ ಒತ್ತಿಕೊಂಡಿರುವ ಕೇರಳದ ಕೆರಟ್ಟಿ ಅಭಯಾರಣ್ಯ ಸೇರಿದಂತೆ 652 ಚದರ ಕಿ.ಮೀ. ಅರಣ್ಯ ಪ್ರದೇಶ ವಿಶ್ವಪಾರಂಪರಿಕ ತಾಣಗಳ ಪಟ್ಟಿಗೆ ಸೇರ್ಪಡೆಗೊಂಡಿದ್ದು, ಇದರೊಂದಿಗೆ ಕುದುರೆಮುಖ ವನ್ಯಧಾಮದ ಕುದುರೆಮುಖ ರಾಷ್ಟ್ರೀಯ ಉದ್ಯಾನವನ, ಸೋಮೇಶ್ವರ ಅಭಯಾರಣ್ಯ, ಸೋಮೇಶ್ವರ ಮೀಸಲು ಅರಣ್ಯ, ಆಗುಂಬೆ ಮತ್ತು ಬಾಲಹಳ್ಳಿಯ ಮೀಸಲು ಅರಣ್ಯದ 881 ಚದರ ಕಿ.ಮೀ. ಅರಣ್ಯ ಪ್ರದೇಶ ಕೂಡ ಈ ತಾಣಗಳ ಪಟ್ಟಿಗೆ ಸೇರಿಸಲ್ಪಟ್ಟಿದೆ.
2002ರಲ್ಲೇ ಪ್ರಸ್ತಾವನೆ: 
ಪಶ್ಚಿಮ ಘಟ್ಟವನ್ನು ವಿಶ್ವ ಪಾರಂಪರಿಕ ತಾಣಗಳ ಪಟ್ಟಿಗೆ ಸೇರಿಸುವಂತೆ ಅಂದಿನ ಕೇಂದ್ರ ಸರಕಾರ 2002ರಲ್ಲೇ ಯುನೆಸ್ಕೋಗೆ ಪ್ರಸ್ತಾವನೆ ಸಲ್ಲಿಸಿತ್ತು. ಪಶ್ಚಿಮಘಟ್ಟ ಪ್ರದೇಶದ ವೃಕ್ಷ ಸಂಪತ್ತು ಮತ್ತು ಅಮೂಲ್ಯ ಜೀವವೈವಿಧ್ಯತೆಯ ಸಿರಿಯನ್ನು ರಕ್ಷಿಸುವ ನಿಟ್ಟಿನಲ್ಲಿ ಕೊಡಗಿನ 5 ಅರಣ್ಯ ಪ್ರದೇಶಗಳನ್ನು ವಿಶ್ವ ಪಾರಂಪರಿಕ ತಾಣಗಳ ಪಟ್ಟಿಗೆ ಸೇರಿಸಲಾಗಿದೆಯೆಂದು ಹೇಳಲಾಗುತ್ತಿದೆ.
ವಿಶ್ವ ಪಾರಂಪರಿಕ ಸಮ್ಮೇಳನದ ಮಾರ್ಗಸೂಚಿ 9 ಮತ್ತು 10ರ ಅನ್ವಯ ಈ ನಿರ್ಧಾರ ಕೈಗೊಂಡಿದ್ದು, ಮಾರ್ಗಸೂಚಿ 9ರ ಅನ್ವಯ ಹಾಲಿ ಇರುವ ಪರಿಸರ ಮತ್ತು ಜೀವವೈವಿಧ್ಯಗಳ ಮೌಲ್ಯಮಾಪನ ಮತ್ತು ಭೌಗೋಳಿಕ ಪ್ರದೇಶದ ಶುದ್ಧಜಲ, ಕರಾವಳಿ ಮತ್ತು ಮತ್ಸ್ಯ ವೈವಿಧ್ಯತೆ, ಸಸ್ಯ ಮತ್ತು ಪ್ರಾಣಿ ಸಂಕುಲದ ಅಭಿವೃದ್ಧಿಯ ಉದ್ದೇಶಗಳನ್ನು ಹೊಂದಿದೆ. ಮಾರ್ಗಸೂಚಿ 10ರ ಅನ್ವಯ ಈ ಪ್ರದೇಶದಲ್ಲಿರುವ ಪ್ರಮುಖ ಆವಾಸ ಸ್ಥಾನಗಳಲ್ಲಿ ಜೀವ ವೈವಿಧ್ಯತೆ ಸಂರಕ್ಷಣೆ ಹಾಗೂ ಅಪಾಯದ ಅಂಚಿನಲ್ಲಿರುವ ಜಾಗತಿಕ ಮೌಲ್ಯ ಹೊಂದಿರುವ ತಳಿಗಳ ವೈಜ್ಞಾನಿಕ ಸಂರಕ್ಷಣೆಯ ಉದ್ದೇಶ ಹೊಂದಲಾಗಿದೆ.
ಭೀತಿಯ ಅಗತ್ಯವಿಲ್ಲ: 
ಆದರೆ, ಈ ಪ್ರಸ್ತಾವನೆಗೆ ರಾಜ್ಯ ಸರಕಾರ ತೀವ್ರ ವಿರೋಧ ವ್ಯಕ್ತಪಡಿಸಿದೆ. ಕಾರಣ ಅಭಿವೃದ್ಧಿಗೆ ತೊಂದರೆ ಎಂಬುದು. ಪರಿಸರ ಉಳಿವಿನಲ್ಲೂ ರಾಜಕೀಯ ನುಸುಳುತ್ತಿದೆ. ಅಭಿವೃದ್ಧಿಗೆ ಕುಂಠಿತ ಎಂಬ ಆರೋಪ ಭುಗಿಲೆದ್ದಿದೆ. ಕರ್ನಾಟಕ ರಾಜ್ಯ ವ್ಯಾಪ್ತಿಯ ಕಾವೇರಿ, ತುಂಗಾ, ಭದ್ರಾ, ನೇತ್ರಾವತಿ ಅಲ್ಲದೆ, ಅವುಗಳ ಉಪ ನದಿಗಳ ಜೀವಸೆಲೆಯಾಗಿರುವ ಪಶ್ಚಿಮಘಟ್ಟ ಪ್ರದೇಶವು ಲಕ್ಷಾಂತರ ಎಕರೆ ಭೂಮಿಗೆ ನೀರು ಒದಗಿಸುತ್ತಿದ್ದು, ಕೋಟ್ಯಂತರ ಜನರ ದಾಹವನ್ನು ತಣಿಸುತ್ತಿದೆ. ಈ ಹಿನ್ನೆಲೆಯಲ್ಲಿ ಈ ಪ್ರದೇಶವನ್ನು ಉಳಿಸಿಕೊಳ್ಳುವ ಹೊಣೆಗಾರಿಕೆ ಎಲ್ಲರ ಮೇಲಿದೆ. ಪಶ್ಚಿಮಘಟ್ಟ ಪ್ರದೇಶದ ಸಸ್ಯ ಸಿರಿ ಹಾಗೂ ಸಮೃದ್ಧತೆಯನ್ನು ಗುರುತಿಸಿ ಈ ಪ್ರದೇಶಗಳನ್ನು ವಿಶ್ವ ಪಾರಂಪರಿಕ ತಾಣಗಳ ಪಟ್ಟಿಗೆ ಸೇರಿಸಲಾಗಿದೆ. ಇವುಗಳೆಲ್ಲಾ ಇದುವರೆಗೆ ಸಂರಕ್ಷಿಸಿರುವ ಕ್ರಮಕ್ಕೆ ಸಿಕ್ಕ ಹೆಗ್ಗಳಿಕೆ ಎಂದು ತಿಳಿಯಬೇಕು.
ಉದ್ದೇಶಿತ ಯೋಜನೆಯಿಂದ ಜನ ಸಾಮಾನ್ಯರ ಯಾವುದೇ ಹಕ್ಕುಗಳು ಮೊಟಕಾಗುವುದಿಲ್ಲ. ಪಾರಂಪರಿಕ ತಾಣದ ಪಟ್ಟಿಗೆ ಅಭಯಾರಣ್ಯ, ಮೀಸಲು ಮತ್ತು ರಕ್ಷಿತಾರಣ್ಯಗಳನ್ನು ಮಾತ್ರ ಸೇರ್ಪಡೆಗೊಳಿಸಲಾಗಿದ್ದು, ಹೊಸದಾಗಿ ಯಾವುದೇ ಜಾಗ ಇಲ್ಲವೇ ಖಾಸಗಿ ಒಡೆತನದ ಜಮೀನುಗಳು ಇದರ ವ್ಯಾಪ್ತಿಗೆ ಒಳಪಡುವುದಿಲ್ಲ. ಪಶ್ಚಿಮ ಘಟ್ಟ ಪ್ರದೇಶ ವಿಶ್ವ ಪಾರಂಪರಿಕ ತಾಣದ ಪಟ್ಟಿಗೆ ಸೇರ್ಪಡೆಗೊಂಡಿರುವುದು ಕರ್ನಾಟಕದ ಹಿರಿಮೆಯನ್ನು ಹೆಚ್ಚಿಸಿದೆ. ವರ್ತಮಾನ ಮತ್ತು ಭವಿಷ್ಯತ್ನಲ್ಲಿ ಸಸ್ಯ ಹಾಗೂ ಅಮೂಲ್ಯ ಜೀವ ಸಂಕುಲವನ್ನು ಉಳಿಸಿ ಮುಂದಿನ ಪೀಳಿಗೆಗೆ ಪರಿಚಯಿಸಬೇಕಾದ ಹೊಣೆಗಾರಿಕೆ ನಮ್ಮೆಲ್ಲರ ಮೇಲಿದೆ ಎಂಬುದನ್ನು ನಾವು ಮರೆಯಬಾರದು.
ವಿಶ್ವ ಪಾರಂಪರಿಕ ತಾಣಗಳ ಪಟ್ಟಿಗೆ ಸೇರಿರುವ ಪಶ್ಚಿಮ ಘಟ್ಟ ಪ್ರದೇಶ ವ್ಯಾಪ್ತಿಯಲ್ಲಿ ಯಾವುದೇ ಯೋಜನೆಗಳನ್ನು ಯುನೆಸ್ಕೋ ನೇರವಾಗಿ ಅನುಷ್ಠಾನಗೊಳಿಸುವುದಿಲ್ಲ, ಬದಲಾಗಿ ಆ ಯೋಜನೆಗಳಿಗೆ ಅಗತ್ಯವಿರುವ ನೆರವನ್ನು ಕೆಲವು ಷರತ್ತಿಗೊಳಪಟ್ಟು ಸರಕಾರಗಳಿಗೆ ನೀಡಲಿದೆ ಅಷ್ಟೇ.

ಅಸ್ಸಾಂ ಹಿಂಸಾಚಾರಕ್ಕೆ ಅಕ್ರಮ ವಲಸೆಯೇ ಕಾರಣ


ಕಳೆದ ಕೆಲ ದಿನಗಳಿಂದ ಅಸ್ಸಾಂನ ಬಕ್ಸರ್, ದುಬ್ರಿ, ವಂಗಾಯಿಗಾಂವ್, ಚಿರಾಂಗ್ ಮತ್ತು ಕೋಕ್ರಾಜಾರ್ ಜಿಲ್ಲೆಗಳಲ್ಲಿ ಅಕ್ರಮ ಬಾಂಗ್ಲಾದೇಶ ನುಸುಳುಕೋರರ ವ್ಯವಸ್ಥಿತ ಮತ್ತು ನಿರಂತರ ದಾಳಿಯಿಂದ ಒಂದು ಲಕ್ಷಕ್ಕೂ ಅಧಿಕ ಹಿಂದೂಗಳು ನಿರಾಶ್ರಿತರಾಗಿದ್ದಾರೆ. ನಿರಂತರವಾಗಿ ನಡೆದಿರುವ ದಾಳಿಯಲ್ಲಿ ಮಕ್ಕಳು, ಮಹಿಳೆಯರ ಸಹಿತ 52ಕ್ಕೂ ಅಧಿಕ ಹಿಂದೂಗಳ ಹತ್ಯೆಯಾಗಿದೆ. ಸುಮಾರು 4 ಲಕ್ಷ ಸ್ಥಳೀಯ ಬೋಡೋ ಹಿಂದೂಗಳು ತಮ್ಮ ಮನೆ, ಮಠ, ಹೊಲಗದ್ದೆಗಳನ್ನು ಕಳೆದುಕೊಂಡು ನಿರಾಶ್ರಿತರಾಗಿದ್ದಾರೆ. 8 ಸಾವಿರ ಚದರ ಕಿ.ಮೀ. ಪರಿಸರದಲ್ಲಿ ಹಬ್ಬಿರುವ ಗಲಭೆಯಿಂದ 500 ಗ್ರಾಮಗಳು ತತ್ತರಿಸಿವೆ. ಈಗಾಗಲೇ 40 ಸಾವಿರಕ್ಕೂ ಅಧಿಕ ಜನ ನಿರಾಶ್ರಿತರ ಶಿಬಿರಗಳಲ್ಲಿ ಆಶ್ರಯ ಪಡೆದಿದ್ದಾರೆ.
ಅಸ್ಸಾಂನಲ್ಲಿನ ಜನಾಂಗೀಯ ಸಂಘರ್ಷಕ್ಕೆ  ಬಾಂಗ್ಲಾದೇಶದಿಂದ ದೇಶದೊಳಕ್ಕೆ ಅವ್ಯಾಹತವಾಗಿ ನಡೆಯುತ್ತಿರುವ ಅಕ್ರಮ ವಲಸೆಯೇ ಕಾರಣ. ಈ ಅಕ್ರಮ ನುಸುಳುಕೋರರ ವಿರುದ್ಧ ಕ್ರಮ ಕೈಗೊಳ್ಳುವಲ್ಲಿ  ಸರಕಾರ ವಿಫಲವಾಗಿದ್ದು, ಈ ಕಾರಣದಿಂದಾಗಿಯೇ ಮೂಲ ಭಾರತೀಯರಲ್ಲಿ ಭೀತಿ ಮೂಡಿದೆ. ಅಸ್ಸಾಂನಲ್ಲಿ  ಜನಾಂಗೀಯ ಸಂಘರ್ಷ ನಡೆಯುವ ಬಗೆಗೆ ಪೂರ್ವಸೂಚನೆಗಳಿದ್ದಾಗ್ಯೂ ಸರಕಾರ ಪರಿಸ್ಥಿತಿಯನ್ನು ಗಂಭೀರವಾಗಿ ಪರಿಗಣಿಸದಿರುವುದೇ ಇಷ್ಟೊಂದು ದೊಡ್ಡ ಅನಾಹುತಕ್ಕೆ ಕಾರಣ. ಬಾಂಗ್ಲಾದೇಶದಿಂದ ಭಾರೀ ಪ್ರಮಾಣದಲ್ಲಿ  ವಲಸಿಗರು ಅಕ್ರಮವಾಗಿ ಭಾರತಕ್ಕೆ ನುಸುಳುತ್ತಿದ್ದಾರೆ. ಅದರಲ್ಲೂ ಅಸ್ಸಾಂ ಮೂಲಕ ನುಸುಳಿ ಬರುವವರ ಸಂಖ್ಯೆ ಅಧಿಕವಾಗುತ್ತಿದೆ. ಸುಪ್ರೀಂಕೋರ್ಟ್ ಸಹ ಈ ಹಿಂದೆ ಈ ಬಗ್ಗೆ ಎಚ್ಚರಿಕೆ ಕೊಟ್ಟಿತ್ತು. ಸುಪ್ರೀಂಕೋರ್ಟ್ನ  ಆದೇಶ ಹೊರಬಿದ್ದು  ಏಳು ವರ್ಷಗಳೇ ಕಳೆದಿವೆ. ಆದರೂ, ಅಕ್ರಮ ವಲಸಿಗರ ಬಗೆಗೆ ಸೂಕ್ತ ಕ್ರಮ ಕೈಗೊಳ್ಳುವಲ್ಲಿ  ಕೇಂದ್ರ ಹಾಗೂ ಅಸ್ಸಾಂ ಸರಕಾರಗಳು ವಿಫಲವಾಗಿವೆ. ರಾಜ್ಯ ಸರಕಾರ ಈ ಬಗ್ಗೆ  ಗಂಭೀರವಾಗಿ ಚಿಂತನೆ ನಡೆಸುತ್ತಿಲ್ಲ. ಕೇಂದ್ರ ಸರಕಾರ ಅಲ್ಪಸಂಖ್ಯಾತರ ಮತಗಳ ಮೇಲೆ ಕಣ್ಣಿಟ್ಟು ಯಾವುದೇ ಕ್ರಮಗಳನ್ನು ಕೈಗೊಳ್ಳುತ್ತಿಲ್ಲ ಎನಿಸುತ್ತಿದೆ.
ಅಸ್ಸಾಂನ ಹಾಲಿ ಸ್ಥಿತಿ ನೋಡಿದರೆ ಜಮ್ಮು-ಕಾಶ್ಮೀರದ ಸ್ಥಿತಿ ನೆನಪಿಗೆ ಬರುತ್ತದೆ. ಪಾಕ್ ಮತ್ತಿತರ ಕಡೆಯಿಂದ ವಲಸೆ ಬಂದಿರುವ ಮುಸ್ಲಿಮರು ಮೂಲವಾಸಿಗಳಾದ ಕಾಶ್ಮೀರಿ ಪಂಡಿತರನ್ನು  ನಿರ್ವಸಿತರನ್ನಾಗಿಸಿದ್ದಾರೆ. ಬದುಕಿನ ಆಸರೆಗಾಗಿ ಪಂಡಿತರು ತಾಯ್ನೆಲ ಬಿಟ್ಟು, ಇತರೆಡೆ ನೆಲೆ ಕಂಡುಕೊಂಡಿದ್ದಾರೆ. ಇದೇ ಸ್ಥಿತಿ, ಇದೀಗ ಅಸ್ಸಾಂನ ಬುಡಕಟ್ಟು  ಸಮುದಾಯದ ಜನರದ್ದು. ಈ ಸಂಘರ್ಷವನ್ನು  ಕೇವಲ ಕೋಮು ಅಥವಾ ಜನಾಂಗೀಯ ಸಂಘರ್ಷ ಎಂದು ಲಘುವಾಗಿ ಪರಿಗಣಿಸುವುದು ತರವಲ್ಲ. ಮೂಲ ಭಾರತೀಯರಾದ ಬುಡಕಟ್ಟು  ಜನರ ಹಕ್ಕುಗಳನ್ನು ಅಕ್ರಮ ವಲಸಿಗರು ಕಸಿದುಕೊಂಡಿರುವುದು ಸಮಸ್ಯೆಯ ಮೂಲ.
ಅಕ್ರಮ ವಲಸಿಗರ ದಬ್ಬಾಳಿಕೆಯ ಫಲವಾಗಿ ಭಾರತೀಯ ಬುಡಕಟ್ಟು  ಸಮುದಾಯದ ಜನರು ತಮ್ಮ ಭೂಮಿಯ ಮೇಲಿನ ಹಕ್ಕನ್ನು  ಕಳೆದುಕೊಳ್ಳುತ್ತಿರುವ ಫಲವಾಗಿ ಈ ಸಂಘರ್ಷ ಏರ್ಪಟ್ಟಿದೆ. ವಲಸಿಗರ ಹೆಚ್ಚಳದಿಂದಾಗಿ ಬೋಡೋ ಪ್ರದೇಶ ಮಾತ್ರವಲ್ಲ, ಅಸ್ಸಾಂ ರಾಜ್ಯದ ಜನಸಂಖ್ಯೆಯಲ್ಲಿಯೂ ಬಹಳಷ್ಟು  ವ್ಯತ್ಯಾಸಗಳಾಗಿವೆ. ವಲಸಿಗರ ಕಾರಣದಿಂದಾಗಿ ಮೂಲ ಭಾರತೀಯರು ದುರ್ಬಲಗೊಳ್ಳುತ್ತಿದ್ದು, ಭೀತಿಯಲ್ಲಿ ಬದುಕುವಂತಾಗಿದೆ. ಇಂದು ಪೂರ್ವಾಂಚಲ ರಾಜ್ಯಗಳು ಬಾಂಗ್ಲಾ ವಲಸೆಗಾರರಿಂದ ತುಂಬಿ ಹೋಗಿವೆ. ಅಂಥ ಪ್ರದೇಶಗಳಲ್ಲಿ ಮೂಲ ನಿವಾಸಿಗಳಾದ ಭಾರತೀಯರಿಗೆ ಸೂಕ್ತ ರಕ್ಷಣೆ ನೀಡಬೇಕಾಗಿದೆ. ಬಾಂಗ್ಲಾ-ಭಾರತದ ಗಡಿಯಲ್ಲಿ ಸೇನೆ ನಿಯೋಜಿಸಿ ಅಕ್ರಮ ವಲಸಿಗರನ್ನು ನಿರ್ಬಂಧಿಸಬೇಕಾಗಿದೆ. ಅಸ್ಸಾಂ ಬೋಡೋ ಹಿಂದೂಗಳಿಗೆ ಅವರ ಮೂಲ ಸ್ಥಾನದಲ್ಲೇ ಪುನರ್ವಸತಿ ಕಲ್ಪಿಸಬೇಕಿದೆ. ಇದು ಮುಂದೊಂದು ದಿನ ದೇಶದ ಏಕತೆ, ಸಮಗ್ರತೆ ಹಾಗೂ ಭದ್ರತೆಗೆ ಭಾರೀ ಆತಂಕವನ್ನು  ಒಡ್ಡಬಲ್ಲುದು. ಈ ಬಗ್ಗೆ ಈಗಲೇ ಎಚ್ಚರ ಅಗತ್ಯ.