ಘಮ ಘಮ ಮಲ್ಲಿಗೆ, ನೀ ಎಲ್ಲಿದ್ದಿ ಇಲ್ಲಿವರೆಗೆ



ಶುಭ-ಅಶುಭ ಎಲ್ಲಾ ಕಾರ್ಯಗಳಿಗೂ ಹೂವು ಇರಲೇಬೇಕು. ಹೂವುಗಳಿಗೆ ಗುಲಾಬಿ ರಾಜನಾದರೂ ಮಲ್ಲಿಗೆಯನ್ನು ಇಷ್ಟ ಪಡುವ ಜನರೇ ಹೆಚ್ಚು. ಇಂತಹ ಮಲ್ಲಿಗೆಯನ್ನು ಇಂದು ತಮ್ಮ ಇತರ ವೃತ್ತಿಯೊಂದಿಗೆ ಉಪಬೆಳೆಯಾಗಿ ಬೆಳೆದು ಅಧಿಕ ಲಾಭ ಗಳಿಸುವವರು ಇದ್ದಾರೆ. ಇವರಲ್ಲಿ ಪುತ್ತೂರು ತಾಲೂಕಿನ ಕಬಕ ಗ್ರಾಮದ ಯಮುನಾ ಕೂಡ ಒಬ್ಬರು.
ಕಳೆದ 2 ವರ್ಷಗಳಿಂದ ಮಲ್ಲಿಗೆ ಕಷಿಯಲ್ಲಿ ತೊಡಗಿರುವ ಯಮುನಾ ಈ ಬಾರಿ ಸುಮಾರು 30 ಮಲ್ಲಿಗೆ ಗಿಡಗಳನ್ನು ನಾಟಿ ಮಾಡಿದ್ದಾರೆ. ಮನೆಯಂಗಳದಲ್ಲೇ ವಿಶಾಲವಾಗಿ ಹಬ್ಬಿರುವ ಈ ಗಿಡಗಳಿಗೆ ದಿನಕ್ಕೆ ಒಂದು ಬಾರಿ ನೀರುಣಿಸುತ್ತಾರೆ. ಒಂದು ಮಲ್ಲಿಗೆ ಗಿಡ 15 ರಿಂದ 20 ವರ್ಷಗಳ ಕಾಲ ಬದುಕಬಲ್ಲದು. ಗಿಡ ನೆಟ್ಟ ಆರು ತಿಂಗಳ ನಂತರ ಉತ್ತಮ ಇಳುವರಿ ಪಡೆಯಲು ಸಾಧ್ಯ. ಗಿಡದಿಂದ ಗಿಡಕ್ಕೆ ಸಾಕಷ್ಟು ಅಂತರ ಅಗತ್ಯ. ಆರಂಭದ 10 ತಿಂಗಳ ಕಾಲ ಅಧಿಕ ಹೂ ದೊರೆಯುವುದಲ್ಲದೆ, ಬೇಸಿಗೆಯಲ್ಲಿ ಅಧಿಕ ಇಳುವರಿ ಲಭಿಸುತ್ತಿದ್ದು, ಮಾರುಕಟ್ಟೆಯಲ್ಲಿ ಒಂದು ಅಟ್ಟೆ ಮಲ್ಲಿಗೆಗೆ ಸುಮಾರು 800 ರಿಂದ 900 ದರವಿರುತ್ತದೆ ಎನ್ನುತ್ತಾರೆ ಯಮುನಾ.
ಈ ಗಿಡಗಳಿಗೆ ಯಾವುದೇ ರಾಸಾಯನಿಕಗಳನ್ನು ಹಾಕದೆ ಕೇವಲ ಹಟ್ಟಿ ಗೊಬ್ಬರ ಮತ್ತು ತಿಂಗಳಿಗೊಮ್ಮೆ ನೆಲಕಡ್ಲೆ ಹಿಂಡಿ, ಅರಳು ಹಿಂಡಿಯನ್ನು ಹಾಕುತ್ತಾರೆ. ಪ್ರತಿದಿನ ದಿನಪತ್ರಿಕೆಯಲ್ಲಿರುವ ದರವನ್ನು ನೋಡಿ ಸ್ಥಳೀಯ ಮಾರುಕಟ್ಟೆಗೆ ಮಲ್ಲಿಗೆಯನ್ನು ಒಯ್ಯುತ್ತಾರೆ.
ಈ ಗಿಡಗಳಿಗೆ ತಗಲುವ ಎಲೆ ಚುಕ್ಕೆ ರೋಗ ಮತ್ತು ಎಲೆಗಳನ್ನು ಹುಳುಗಳು ತಿಂದು ಹಾಳು ಮಾಡುವುದನ್ನು ತಡೆಯಲು 15 ದಿನಕ್ಕೊಮ್ಮೆ ಗೋಮೂತ್ರವನ್ನು ಸಿಂಪಡಿಸುತ್ತಾರೆ. ಸರಿಯಾದ ನೀರಿನ ವ್ಯವಸ್ಥೆ ಇದ್ದರೆ ಇಡೀ ವರ್ಷ ಮಲ್ಲಿಗೆ ಕಷಿಯನ್ನು ಕೈಗೊಳ್ಳಬಹುದು. ಆದರೆ ಅಧಿಕ ಲಾಭ ಪಡೆಯುವ ಉದ್ದೇಶದಿಂದ ರಾಸಾಯನಿಕದ ಮೊರೆ ಹೋದರೆ ನಷ್ಟ ಅನುಭವಿಸಬೇಕಾದಿತು ಎನ್ನುತ್ತಾರೆ ಅವರು.
ಪ್ರತಿದಿನ ಬೆಳಗ್ಗಿನ ಜಾವ ಮೊಗ್ಗು ಕಟಾವು ಮಾಡುವ ಮೊದಲು ಇಬ್ಬನಿ ಕರಗಲು ಗಿಡಗಳಿಗೆ ಒಂಚೂರು ನೀರು ಹನಿಸಬೇಕು. ಗಿಡದಲ್ಲಿ ಇಬ್ಬನಿ ನಿಂತರೆ ಹೂವಿನ ಗುಣಮಟ್ಟ ಕಡಿಮೆಯಾಗುತ್ತದೆ. ಕಡಿಮೆ ಶ್ರಮದಲ್ಲಿ ಅಧಿಕ ಲಾಭ ಗಳಿಸಲು ಮಲ್ಲಿಗೆ ಕಷಿ ಒಂದು ಉತ್ತಮ ದಾರಿ ಎನ್ನುತ್ತಾರೆ ಅವರು.

ವಂದೇ ಶಿವಂ ಶಂಕರಂ.


ವಂದೇ ಶಿವಂ ಶಂಕರಂ
ಶಿವಂ ಶಿವಕರಂ ಶಾಂತಂ
ಶಿವಾತ್ಮಾನಂ ಶಿವೋತ್ತಮಂ
ಶಿವಮಾರ್ಗ ಪ್ರಣೀತಾರಂ
ಪ್ರಣತೋಸ್ಮಿ ಸದಾಶಿವಂ॥
ರಜತಗಿರಿಗೊಡೆಯನಾದ ಈಶ್ವರ, ಶಂಕರ, ಪಶುಪತಿಯೇ ಮೊದಲಾದ ನಾಮಧೇಯಗಳಿಂದ ಗುರುತಿಸಲ್ಪಡುವ, ತ್ರಿಮೂರ್ತಿಗಳಲ್ಲಿ "ಲಯ'ಕಾರಕನೆಂದೇ ಪ್ರಸಿದ್ಧನಾಗಿರುವ, ಭಕ್ತ ವೃಂದದಿಂದ ಸರ್ವಮಂಗಲದಾತಾರನೆಂದೇ ಸ್ತುತಿಸಲ್ಪಡುತ್ತಿರುವ ಜಗದೊಡೆಯ ಸಾಕ್ಷಾತ್ ಪರಶಿವನನ್ನು ಪೂಜಿಸಲು ಅತ್ಯಂತ ಪ್ರಶಸ್ತ ದಿನವೇ ಮಹಾಶಿವರಾತ್ರಿ!
"ಶಿವ' ಶಬ್ಧಕ್ಕೆ ಮಂಗಳಕಾರಕನೆಂದು ಅರ್ಥವಿದೆ. ಮಹಾಮಹಿಮನಾದ ಶಿವನ ರೂಪವೂ. ಆಭರಣಗಳೂ ಉಳಿದ ದೇವತೆಗಳಿಗಿಂತ ತುಸು ವಿಭಿನ್ನ. ಅಭಿಷೇಕ ಪ್ರಿಯನಾಗಿರುವ ರುದ್ರನ ಶಿರದಲ್ಲಿ ಗಂಗೆ ಮತ್ತು ಚಂದ್ರರು ಶೋಭಿಸುತ್ತಿದ್ದಾರೆ. ಶಿವನ ಜಟೆಯನ್ನು ಕಪರ್ದಿಯೆಂದು ಕರೆಯುತ್ತಾರೆ. ಅಗ್ನಿಮಯವಾದ ಮೂರನೆಯ ಕಣ್ಣು ಶಿವನ ಹಣೆಯಲ್ಲಿರುವುದರಿಂದಲೇ ಅವನನ್ನು ತ್ರಿನೇತ್ರನೆಂದೂ, ವಿರೂಪಾಕ್ಷನೆಂದೂ ಆರಾಧಿಸುತ್ತಾರೆ. ಪಿನಾಕವೆಂಬ ಶೂಲವನ್ನು ಕರದಲ್ಲಿ ಧರಿಸಿ, ಗಜಚರ್ಮಾಂಬರಧಾರಿಯಾಗಿ, ಸರ್ವಾಂಗಗಳಲ್ಲೂ ಚಿತಾಭಸ್ಮವನ್ನು ಲೇಪಿಸಿ, ಸರ್ಪಾಭರಣ ಭೂಷಿತನಾಗಿ ಮೆರೆಯುತ್ತಿರುವ ಶಿವನ ವಾಹನವೇ ಬಿಳಿ ನಂದಿ. ನಂದಿವಾಹಕನಾದ ಅವನನ್ನು ನಂದಿಕೇಶ್ವರನೆಂದು ಸಹಾ ಬಿಂಬಿಸಲಾಗುತ್ತಿದೆ.
ಪ್ರಣವ ಸ್ವರೂಪನಾದ ಚಂದ್ರಶೇಖರ ಶಿವನನ್ನು ಜಗತ್ದ್ರಕ್ಷಕನೆಂದೂ ಕೊಂಡಾಡುತ್ತಾರೆ. ದೂರ್ವಾಸರ ಶಾಪದಿಂದ ಇಂದ್ರನ ಅಮರಾವತಿಯ ಸುವಸ್ತುಗಳೆಲ್ಲ ಸಮುದ್ರ ಪಾಲಾಗಲು ದೇವದಾನವರೊಡಗೂಡಿ, ಮಂದರ ಪರ್ವತವನ್ನು ಕಡೆಗೋಲಾಗಿಸಿ, ವಾಸುಕಿಯನ್ನು ಹಗ್ಗವಾಗಿಸಿ ಸಮುದ್ರ ಮಥನ ಮಾಡಿ ಕಳೆದು ಹೋದ ವಸ್ತುಗಳನ್ನು ಮರಳಿ ಪಡೆಯುವ ಪ್ರಯತ್ನ ಮಾಡುತ್ತಿರಲು ಅಲ್ಲಿ ಆವಿರ್ಭವಿಸಿದ ಕಾಲಕೂಟವೆಂಬ ಮಹಾವಿಷ್ಣುವನ್ನು, ಪ್ರಪಂಚದ ರಕ್ಷಣೆಗೋಸ್ಕರವಾಗಿ ಶಿವನು ನೇಮಿಸಿದನೆಂದೂ, ಆ ಸಮಯದಲ್ಲಿ ಶಿವ ಪತ್ನಿ ಉಮೆಯು, ವಿಷವು ಶಿವನ ದೇಹವಿಡೀ ವ್ಯಾಪಿಸಿದಂತೆ ತನ್ನ ಕರಗಳಿಂದ ಅವನ ಕಂಠವನ್ನು ಒತ್ತಿ ಹಿಡಿದಾಗ ವಿಷವು ಕಂಠದಲ್ಲೇ ಉಳಿಯಿತೆಂದೂ ಪುರಾಣಗಳಲ್ಲಿ ಉಲ್ಲೇಖವಿದೆ. ಅಂದಿನಿಂದ ಶಿವನಿಗೆ ಗರಳಕಂಠ, ನೀಲಕಂಠ ಎಂಬ ಹೆಸರು ಬಂತು.
ಶಿವಪುರಾಣದಲ್ಲಿ ಶಿವನ ನಿರಾಕಾರ ಮತ್ತು ವಿರಾಟ ರೂಪದ ವರ್ಣನೆಯಿದೆ. ಭಯಂಕರ ಮತ್ತು ಸೌಮ್ಯ ರೂಪಗಳಲ್ಲಿ ಕಂಡು ಬರುವ ಶಿವನಿಗೆ ಬಿಲ್ವಪತ್ರ, ರುದ್ರಾಕ್ಷಿಗಳು ಅತ್ಯಂತ ಪ್ರಿಯ. ಶಿವನ ಉಗ್ರರೂಪವನ್ನು ‘ಕಪಾಲಿ’ ಎಂದೂ ಕರೆಯುತ್ತಾರೆ. ನೃತ್ಯದ ಅಧಿದೇವತೆ ನಟರಾಜನೆಂದರೆ ಶಿವನೇ. ಶಿವನ ನೃತ್ಯವು ತಾಂಡವ ಎಂಬ ಹೆಸರಿನಿಂದಲೇ ಪ್ರಸಿದ್ಧಿಯಾಗಿದೆ. ವಿರೂಪಾಕ್ಷ, ಭದ್ರಕಾಳಿ, ವೀರಭದ್ರನೇ ಮೊದಲಾದವರು ಶಿವನ ಕೆಲವು ಪ್ರಮುಖ ಗಣಗಳಾದರೆ ಗಣಪತಿ ಮತ್ತು ಸುಬ್ರಹ್ಮಣ್ಯನನ್ನು ಅವನ ಪುತ್ರನೆಂದೂ ಪುರಾಣಗಳು ಸಾರುತ್ತವೆ.
ಭಕ್ತಾಭಿಷ್ಟ ಲಪ್ರದಾಯಕನಾದ ಶಿವನು ಕ್ಷಿಪ್ರ ಪ್ರಸಾದಿ. ತನ್ನ ಅನನ್ಯ ಭಕ್ತಿಯಿಂದ ಪಶುಪತಿಯನ್ನು ಭಜಿಸಿ, ಮೃತ್ಯುವನ್ನೇ ಹಿಮ್ಮೆಟ್ಟಿಸಿ, ಚಿರಂಜೀವಿಯಾಗಿ ಮೆರೆದ ಮಾರ್ಕಾಂಡೇಯನ ಕಥೆಯನ್ನು ತಿಳಿಯದವರಾರು? ಶಿವಪುರಾಣ, ಶಿವಲೀಲಾಮೃತವೇ ಮೊದಲಾದ ಗ್ರಂಥಗಳಲ್ಲಿ, ಶಿವಸ್ಮರಣೆಯಿಂದ ಸಮಸ್ತ ಪಾಪ ನಿವಾರಣೆಗೊಂಡು, ಮೋಕ್ಷಗಳಿಸಿದಂತಹ ಹಲವಾರು ಭಕ್ತರ ಕಥೆಗಳಿವೆ.
ಮಾಘ ಮಾಸದ ಬಹುಳ ಚತುರ್ದಶಿಯನ್ನು ಮಹಾಶಿವರಾತ್ರಿಯೆಂದು ಆಚರಿಸಲಾಗುತ್ತಿದೆ. ವಿಶ್ವ ರಕ್ಷಣೆಗಾಗಿ ವಿಷವನ್ನು ಸೇವಿಸಿದ ಪರಮೇಶ್ವರನ ಒಳಿತಿಗಾಗಿ, ದೇವದಾನವರ ಸಹಿತ ಇಡೀ ವಿಶ್ವವೇ ಸ್ತುತಿಸಿ ರಕ್ಷಣೆಗಾಗಿ ಮೊರೆಯಿಟ್ಟ ದಿನವನ್ನೇ ಶಿವರಾತ್ರಿಯೆಂದು ನಂಬಲಾಗುತ್ತಿದೆ.
ಶಿವರಾತ್ರಿಯಂದು ಉಪವಾಸ ಮತ್ತು ಜಾಗರಣೆಗಳಿಗೆ ಆದ್ಯತೆ. ಈ ದಿನ ಶಿವನ ವಿಶೇಷ ಸಾನ್ನಿಧ್ಯವಿರುವುದರಿಂದ, ಪರಿಶುದ್ಧ ಮನದಿಂದ ಇಂದು (ಮಾ.10) ಶಿವಸ್ಮರಣೆ ಮಾಡಿದರೆ ಅತ್ಯಂತ ಶೀಘ್ರವಾಗಿ ಮನೋಭಿಲಾಷೆಗಳು ಕೈಗೂಡುತ್ತವೆ ಎಂಬುದು ಭಕ್ತರ ನಂಬಿಕೆ.

ಭಾರತದಾದ್ಯಂತ ಶೈವ ಪಂಥದವರು ಮಾತ್ರವಲ್ಲ, ಸಕಲ ಆಸ್ತಿಕರೂ ಸಡಗರ, ಸಂಭ್ರಮ, ಭಕ್ತಿಯಿಂದ ಇಂದು ಶಿವರಾತ್ರಿಯನ್ನಾಚರಿಸುತ್ತಾರೆ. ದೇಶದಾದ್ಯಂತವಿರುವ ಶಿವಮಂದಿರಗಳಲ್ಲಿ ಇಂದು ಪರಮೇಶ್ವರನಿಗೆ ವಿಶೇಷ ಅರ್ಚನೆ, ಪೂಜೆಗಳು ಸಲ್ಲುತ್ತದೆ.
ಈ ಶಿವರಾತ್ರಿಯಂದು ನಿರ್ಮಲಮನದಿಂದ ಶಿವನಾಮ ಸ್ಮರಣೆ ಮಾಡುತ್ತಾ ಶಿವನಾಮ ಆಲಿಸುತ್ತಾ, ಶಿವಪೂಜೆ ನೋಡುತ್ತಾ, ಶಿವನಿಗೆ ಪ್ರದಕ್ಷಿಣೆ ಮಾಡುತ್ತಾ, ಸಕಲವನ್ನೂ ಶಿವಮಯವಾಗಿಸಿ, ಮಹಾಮಹಿಮನಾದ ರುದ್ರರೂಪಿಯಾದ ಪಾರ್ವತೀ ಪತಿಯನ್ನು ಸ್ತುತಿಸಿ, ಅವನ ಅನುಗ್ರಹವನ್ನು ಪಡೆಯೋಣ. ಮಹಾಮೃತ್ಯುಂಜಯನಾದ ಶಿವನು ವಿಶ್ವಕ್ಕೇ ಒಳಿತನ್ನುಂಟುಮಾಡಲಿ ಎಂದು ಮನದುಂಬಿ ಪ್ರಾರ್ಥಿಸೋಣ.
ವಂದೇ ದೇವಮುಪಾಪತಿಂ ಸುರಗುರುಂ
ವಂದೇ ಜಗತ್ಮಾರಣಂ
ವಂದೇ ಪನ್ನಗ ಭೂಷಣಂ ಮೃಗಧರಂ
ವಂದೇ ಪಶೂನಾಂಪತಿಂ
ವಂದೇ ಸೂರ್ಯಶಶಾಂಕಮಹ್ನಿ ನಯನಂ
ವಂದೇ ಮುಕುಂದಪ್ರಿಯಂ
ವಂದೇ ಭಕ್ತಜನಾಶ್ರಯಂಚ ವರದಂ
ವಂದೇ ಶಿವಂ ಶಂಕರಂ.

ಸೊಕ್ಕಿದ್ದರೆ ಯಾಣ-ದುಡ್ಡಿದ್ದರೆ ಗೋಕರ್ಣ




ಸೊಕ್ಕಿದ್ದರೆ ಯಾಣ-ದುಡ್ಡಿದ್ದರೆ ಗೋಕರ್ಣ. ಇದು ಉತ್ತರ ಕನ್ನಡ ಜಿಲ್ಲೆಯಲ್ಲಿರುವ ಪ್ರಚಲಿತ ಗಾದೆ. ಶಿವರಾತ್ರಿ ಬಂತೆಂದರೆ ಎಲ್ಲರಿಗೂ ಯಾವುದಾದರೂ ಶಿವತಾಣಗಳಿಗೆ ಹೋಗಬೇಕೆಂದು ಎನ್ನಿಸದೇ ಇರದು. ತ್ರಾಣ ಇದ್ದವರು, ಸೊಕ್ಕಿದ್ದವರು ಯಾಣಕ್ಕೆ ಹೋಗುತ್ತಾರೆ. ಇನ್ನು ಹೋಗಲೆಬೇಕಾದವರು ಕೆಲವರು ಗೋಕರ್ಣ, ಸಿದ್ದನಗುಡ್ಡ, ಗವಿಗುಡ್ಡ, ಮುರ್ಡೆಶ್ವರ ಮೊದಲಾದ ತಾಣಗಳಿಗೆ ಹೋಗುತ್ತಾರೆ. ಉಳಿದಂತೆ ಸಿದ್ದಾಪುರ ತಾಲೂಕಿನ ಇಟಗಿಯ ರಾಮೇಶ್ವರ, ಇಡಗುಂದಿಯ ರಾಮಲಿಂಗೇಶ್ವರ, ಸಾತೊಡ್ಡಿ ಜಲಪಾತ ಮಾರ್ಗದ ಮಧ್ಯೆ ಇರುವ ಗಣೇಶಗುಡಿಯ ಶಿವತಾಣ, ಮಲವಳ್ಳಿಯ ರಾಮಲಿಂಗೇಶ್ವರ ದೇಗುಲ, ಗುಳ್ಳಾಪುರದ ಸಮೀಪದ ರಾ.ಹೆ ಪಕ್ಕದಲ್ಲಿರುವ ಮೊಗದ್ದೆ, ನಗರದ ಸಮೀಪವಿರುವ ಬಿಲ್ಲಿಗದ್ದೆ ರಾಮಲಿಂಗೇಶ್ವರ ದೇವಸ್ಥಾನ, ಈಶ್ವರಗಲ್ಲಿಯ ಈಶ್ವರ ದೇವಸ್ಥಾನ, ಪ್ರಸಿದ್ಧವಾದ ಶಿವತಾಣಗಳಾಗಿವೆ. 



ಸಹಸ್ರಲಿಂಗಗಳಿಗೆ ಇಲ್ಲಿ ನಿತ್ಯವೂ ಜಲಾಭಿಷೇಕ: 
ಶಿರಸಿ ಸಮೀಪದ ಸಹಸ್ರಾರು ಲಿಂಗಗಳಿಗೆ ನಿತ್ಯವೂ ಜಲಾಭಿಷೇಕ. ಪ್ರಕೃತಿಯೇ ಇಲ್ಲಿ ಪ್ರತಿ ಕ್ಷಣವೂ ನವಿರಾಗಿ ಪೂಜಿಸುತ್ತಿದೆ. ಜಿಲ್ಲೆಯ ಹೆಮ್ಮೆಯ ಪ್ರವಾಸಿ ತಾಣಗಳಲ್ಲಿ ಒಂದಾದ ಸಹಸ್ರಲಿಂಗ ಪವಿತ್ರ ಕ್ಷೇತ್ರವಾಗಿ, ಪ್ರವಾಸಿ ತಾಣವಾಗಿ ಪರಿಚಿತಗೊಂಡಿದೆ. ಇಂದು ಮಹಾ ಶಿವರಾತ್ರಿ. ಸಹಸ್ರಕ್ಕೂ ಅಧಿಕ ಭಕ್ತರು ನಾಡಿನ ಉದ್ದಗಲದಿಂದಲೂ ಪವಿತ್ರ ಶಿವತಾಣ, ಪ್ರಕೃತಿ ಸೊಬಗಿನ ಸಹಸ್ರಲಿಂಗಕ್ಕೆ ಬರುವುದು ವಾಡಿಕೆಯಾಗಿದೆ. ಇಲ್ಲಿಗೆ ಮುಂಜಾನೆಯೇ ಆಗಮಿಸಿ ಸ್ವತಃ ಜಲಾಭಿಷೇಕ ನಡೆಸಿ, ಪೂಜಿಸಿ ಕೃರ್ತಾರ್ಥರಾಗುತ್ತಾರೆ. ಸ್ಥಳೀಯ ಯುವಕ ಮಂಡಳಿ, ಗ್ರಾಪಂ ಭಕ್ತರಿಗೆ ಅನುಕೂಲ ಸೃಷ್ಟಿಸುತ್ತದೆ.
ಶಾಲ್ಮಲಾ ನದಿಯಲ್ಲಿರುವ ಅಪರೂಪದ ಸಹಸ್ರಲಿಂಗ ಶಿರಸಿ ಸಮೀಪದ ಯಲ್ಲಾಪುರ ಹೆದ್ದಾರಿ ಪಕ್ಕದಲ್ಲಿದೆ. ಸಹಸ್ರಲಿಂಗವು ಮಳೆಗಾಲ ಪ್ರಾರಂಭವಾಗುತ್ತಿರುವಂತೆ ಜಲದಡಿಯಾಗುತ್ತಿದ್ದು, ಕೆಲವು ಲಿಂಗಗಳು ಈಗಾಗಲೇ ಉರುಳಿ ಬಿದ್ದಿವೆ. ಬಿಸಿಲು, ಗಾಳಿಯಿಂದ ಸಹಸ್ರಲಿಂಗ ನಲುಗುತ್ತಿದೆ. ಹಿಂದೆ ಶಿವರಾತ್ರಿಯಲ್ಲಿ ಮಾತ್ರ ಜನರಿಂದ ಪೂಜಿಸಲ್ಪಡುತ್ತಿದ್ದ ಸಹಸ್ರಲಿಂಗ ಇಂದು ನಿತ್ಯ ಪ್ರವಾಸಿಗರ ಗಮನ ಕೂಡ ಸೆಳೆಯುವಂತಾಗಿದೆ.
ಭವ್ಯ ಐತಿಹ್ಯ: ದೇವತೆಗಳು ಈ ಲಿಂಗ ಕೊರೆಯುತ್ತಿದ್ದಾಗ ಕೃಷ್ಣ ಇದು ಸರಿಯಾದ ಸ್ಥಳವಲ್ಲ ಎಂದು ಕೋಳಿಯಾಕಾರದಲ್ಲಿ ಬಂದು ಕೂಗಿದ, ಬೆಳಗಾಯಿತೆಂದು ದೇವತೆಗಳು ಕೆಲಸ ಕೈ ಬಿಟ್ಟವು. ಸ್ವಾದಿ ರಾಜ ಅರಸಪ್ಪ ನಾಯಕನಿಗೆ ಮಕ್ಕಳಾಗಿಲ್ಲ ಎಂಬ ಕಾರಣಕ್ಕೆ ಪುರೋಹಿತರ ಮಾರ್ಗದರ್ಶನದಂತೆ ಕ್ರಿ.ಶ 1688ರ ವೇಳೆಗೆ ಸಹಸ್ರಾರು ಲಿಂಗಗಳನ್ನು ಕೆತ್ತಿಸಿ ಪೂಜಿಸಿದ ಎಂಬ ಕಥೆಗಳು ಇವೆ. ಇಲ್ಲಿ ಬಂಡೆ ಬಸಪ್ಪನ ಪಕ್ಕದಲ್ಲಿ ಶಿವಪೂಜೆ ಮಾಡುತ್ತಿರುವ ಪುರುಷ ಮೃಗದ ವಿಗ್ರಹವಿದೆ. ಹಾಗೂ ವನದೇತೆಗಳ ಮೂರ್ತಿಗಳೂ ಇವೆ.

ಪೂಜಾ ಭಾಗ್ಯ ಕಾಣದೇ ಅನಾಥವಾದ ದೇಗುಲ: 
ಭಾರತದ ದಕ್ಷಿಣ ಕಾಶಿಯೆಂದೆ ಪ್ರಸಿದ್ಧವಾಗಿರುವ ಶ್ರೀ ಕ್ಷೇತ್ರ ಗೋಕರ್ಣ ಸೇರಿದಂತೆ ಎಲ್ಲ ಕಡೆಗಳಲ್ಲಿ ಶಿವರಾತ್ರಿಯಂದು ಈಶ್ವರನಿಗೆ ವಿಶೇಷ ಪೂಜೆ ಅಭಿಷೇಕ ಮತ್ತಿತರ ಧಾರ್ಮಿಕ ಕಾರ್ಯಕ್ರಮಗಳು ನಡೆಯುತ್ತವೆ. ಆದರೆ, ಅಂಕೋಲಾ ತಾಲೂಕಿನ ಗ್ರಾಮವೊಂದರಲ್ಲಿ ಅನಾದಿ ಕಾಲದ ಶಿವ ಮಂದಿರವೊಂದು ಪೂಜಾಭಾಗ್ಯ ಕಾಣದೇ ಅನಾಥವಾಗಿದೆ. ಅಂಕೋಲಾದಿಂದ ಸುಮಾರು 28 ಕಿ.ಮೀ. ದೂರದಲ್ಲಿರುವ ಅತ್ಯಂತ ಹಿಂದುಳಿದ ಹಾಲಕ್ಕಿ ಹಾಗೂ ಕರಿಒಕ್ಕಲ ಸಮುದಾಯಕ್ಕೆ ಸೇರಿದ ಸುಮಾರು 30 ಕುಟುಂಬಗಳು ವಾಸಿಸುವ ಮಾರುಗದ್ದೆ ಗ್ರಾಮದಲ್ಲಿರುವ ಈಶ್ವರ ದೇವಸ್ಥಾನವೇ ಪಾಳುಬಿದ್ದ ಶಿವಗುಡಿ.
ಮಂದಿರ ಸಂಪೂರ್ಣವಾಗಿ ನಶಿಸಿಹೋಗಿದ್ದು, ಕೇವಲ ಕಲ್ಲಿನ ಬಾಗಿಲಷ್ಟೇ ಉಳಿದುಕೊಂಡಿದೆ. ದೇವಾಲಯದಲ್ಲಿ ಸುಮಾರು ಎರಡೂವರೆ ಅಡಿ ಎತ್ತರದ ಶಿವಲಿಂಗದ ಜೊತೆಗೆ ಗಣಪತಿ, ನಂದಿ ವಿರೂಪಾಕ್ಷೇಶ್ವರ, ಪಾರ್ವತಿ ಪರಮೇಶ್ವರ ಹೀಗೆ ಹತ್ತಾರು ಪುರಾತನ ಕಾಲದ ವಿಗ್ರಹಗಳು ಕಾಣುತ್ತವೆ. ಗತಕಾಲದ ವೈಭವ ನೆನಪಿಸುವ ಶಿಲಾಶಾಸನಗಳ ಕೆತ್ತನೆ ಗಮನಿಸಿದರೆ ಹಂಪೆಯನ್ನು ವೀಕ್ಷಿಸಿದಂತಹ ಅನುಭವವಾಗುತ್ತದೆ.
ಮಾರುಗದ್ದೆಯ ಅರಣ್ಯದಲ್ಲಿರುವ ಸುಮಾರು 12-13ನೇ ಶತಮಾನದ ಇತಿಹಾಸ ಹೊಂದಿರುವ ಈ ದೇವಸ್ಥಾನ ಭಾಗಶಃ ಮಣ್ಣಿನಲ್ಲಿ ಹೂತು ಹೋಗಿದ್ದು, ಸುತ್ತ-ಮುತ್ತಲಿನ ಪ್ರದೇಶವೆಲ್ಲ ಗಿಡಗಂಟಿಗಳಿಂದ ಮುಚ್ಚಿ ಹೋಗಿದೆ. ದೇಗುಲದ ಮೇಲ್ಭಾಗ ಮಾತ್ರ ಕಣ್ಣಿಗೆ ಕಾಣುತ್ತಿದೆ. ಶಿಲಾಶಾಸನ, ಮೂರ್ತಿಗಳನ್ನು ನಿಧಿಗಳ್ಳರು, ನಿಧಿ ಆಸೆಗಾಗಿ ಭಗ್ನಗೊಳಿಸಿರುವುದು ಗೋಚರವಾಗುತ್ತದೆ. ಅರಣ್ಯ ಪ್ರದೇಶದಲ್ಲಿ ನಿಧಿ ಆಸೆಗಾಗಿ ಅಲ್ಲಲ್ಲಿ ಹೊಂಡಗಳನ್ನು ತೋಡಿರುವುದು ಸಹ ಕಾಣಸಿಗುತ್ತದೆ.
ಈ ಗ್ರಾಮದಲ್ಲಿ ಮಹಾವೀರ ನಾರಾಯಣ ದೇವಸ್ಥಾನ ಸೇರಿದಂತೆ ಪ್ರಾಚೀನ ಕಾಲದ ಇತಿಹಾಸ ಸಾರುವ ಇನ್ನೂ ಹಲವಾರು ಜೈನ ಪರಂಪರೆ ಹೊಂದಿರುವ ದೇವಾಲಯಗಳಿದ್ದು, ಕೆಲ ದೇವಾಲಯಗಳಲ್ಲಿ ವರ್ಷದ ವಿಶೇಷ ಸಂದರ್ಭದಲ್ಲಿ ಮಾತ್ರ ಪೂಜೆ ಮತ್ತು ಧಾರ್ಮಿಕ ಕಾರ್ಯಕ್ರಮ ನಡೆಯುತ್ತಿದ್ದು, ಈಶ್ವರ ದೇವಸ್ಥಾನ ಮಾತ್ರ ಪೂಜೆ-ಪುನಸ್ಕಾರವಿಲ್ಲದೆ ಕಾಡಿನಲ್ಲಿ ಅನಾಥವಾಗಿದೆ.


ಗೋಕರ್ಣದಲ್ಲಿ ವಿಜೃಂಭಣೆಯ ಮಹಾಶಿವರಾತ್ರಿ


ಭಾರತದ ಅನೇಕ ಪುಣ್ಯ ಕ್ಷೇತ್ರಗಳಲ್ಲಿ ಗೋಕರ್ಣವೂ ಒಂದು. ಇಲ್ಲಿ ಪರಶಿವನ ಆತ್ಮಲಿಂಗವು ಆತನ ಮಗ ಗಣಪತಿಯಿಂದಲೇ ಪ್ರತಿಷ್ಠಾಪಿಸಲ್ಪಟ್ಟ ಕಾರಣದಿಂದ ಭೂಸ್ಪರ್ಶ ಹೊಂದಿ, ಭೂಕೈಲಾಸವೆಂದು ಗೋಕರ್ಣಕ್ಕೆ ಇನ್ನೊಂದು ಹೆಸರು. ಇಲ್ಲಿ ಭಕ್ತರು ಭಕ್ತಿ, ಶ್ರದ್ಧೆ, ಜ್ಞಾನ, ವೈರಾಗ್ಯಗಳಿಂದ ಶಿವನನ್ನು ಪೂಜಿಸಿ ಕೃತಾರ್ಥರಾಗುತ್ತಾರೆ. ಶಿವರಾತ್ರಿಯಂದು ಶಿವನು ಕೇವಲ ನೀರು ಬಿಲ್ವಪತ್ರೆಯಿಂದ ಸಂತುಷ್ಠಗೊಳ್ಳುತ್ತಾನೆ. ಅದು ಭಕ್ತನು ತನ್ನ ಭಕ್ತಿಯಿಂದ ಅರ್ಚಿಸಿದಾಗ ಮಾತ್ರ ಸಾಧ್ಯವಿದೆ.  ಭಕ್ತರು ಈ ದಿನ ಪೂಜಿಸಿದರೆ ಅವರ ಅಭೀಷ್ಠೆಗಳನ್ನು ಪೂರೈಸಲು ಶಿವನು ಧರೆಗಿಳಿದು ಬರುತ್ತಾನೆಂಬ ನಂಬಿಕೆಯಿದೆ. ಈ ಕಾರಣಕ್ಕಾಗಿ ಭಕ್ತರು ಶಿವಧ್ಯಾನದಲ್ಲಿ ಮುಳುಗುತ್ತಾರೆ. ದಾನ-ಧರ್ಮಗಳನ್ನು ನಡೆಸುತ್ತಾರೆ. ಶಿವಪಂಚಾಕ್ಷರಿ ಜಪ ನಡೆಯುತ್ತದೆ. ಅರ್ಚನೆ-ಅಭಿಷೇಕ, ಮಂತ್ರಪಠಣ, ಭಜನೆ ಸಂಕೀರ್ತನೆಗಳು ನಡೆಯುತ್ತದೆ. ಹೀಗೆ ಶಿವರಾತ್ರಿ ಆಚರಣೆಯು ಶಿವ ಭಕ್ತರಿಗೆ ಹಬ್ಬದ ಸಂಭ್ರಮವಾಗಿದೆ.
ಗೋಕರ್ಣವು ಸಿದ್ಧಿ ಹಾಗೂ ಮುಕ್ತಿ ಕ್ಷೇತ್ರ. ಶಿವನ ಆತ್ಮಲಿಂಗವು ಭೂಸ್ಪರ್ಶವಾದ ಕಾರಣಕ್ಕೆ ಭೂಕೈಲಾಸವೆಂದು ಪ್ರಸಿದ್ಧಿ ಪಡೆದಿದೆ. ಗೋಕರ್ಣದ ಶಿವರಾತ್ರಿ ಮಹೋತ್ಸವವು ಮಾಘ ಬಹುಳ ನವಮಿಯಿಂದ ಆರಂಭವಾಗಿ, ಮಾಘ ಶುದ್ಧ ಬಿದಿಗೆಯವರೆಗೆ ಒಂಭತ್ತು ದಿನಗಳಕಾಲ ವಿವಿಧ ಉತ್ಸವಾದಿಗಳು ಆಚರಣೆಗೊಳ್ಳುತ್ತದೆ.ಆಗಮ ಶಾಸರೀತ್ಯಾ ಉತ್ಸವಾದಿಗಳು ವಿವಿಧ ಹವನಾದಿಗಳು, ವಿವಿಧ ರಥೋತ್ಸವಾದಿಗಳು, ಬಲಿ-ಭೂತಬಲಿ, ಚೂರ್ಣೋತ್ಸವ,ಅವಭೃತೋತ್ಸವಗಳೊಂದಿಗೆ ಶಿವರಾತ್ರಿ ಮಹೋತ್ಸವವು ಭಕ್ತರಿಂದೊಡಗೂಡಿ, ಮಹಾಜಾತ್ರೆಯಾಗಿ ಆಚರಿಸಲ್ಪಡುತ್ತದೆ.
ಇಲ್ಲಿನ ವಿಶೇಷವೆಂದರೆ ಭಕ್ತರು ಸ್ವಹಸ್ತದಿಂದ ಪೂಜೆ, ಅರ್ಚನೆಗಳನ್ನು ನೆರವೇರಿಸಬಹುದಾಗಿದೆ. ಈ ರೀತಿ ಉಳಿದ ಯಾವ ಕ್ಷೇತ್ರಗಳಲ್ಲೂ ಪೂಜೆ ಮಾಡಲು ಭಕ್ತರಿಗೆ ಅವಕಾಶವಿರುವುದಿಲ್ಲ. ಆದರೆ ಗೋಕರ್ಣದಲ್ಲಿ ಮಾತ್ರ ಪೂಜಿಸುವ ಭಾಗ್ಯವಿದೆ. ಆ ಕಾರಣಕ್ಕಾಗಿ ದೇಶದ ವಿವಿಧ ಭಾಗಗಳಿಂದ ಶಿವರಾತ್ರಿಯಂದು ಪರಶಿವನ ಆತ್ಮಲಿಂಗವನ್ನೂ, ದ್ವಿಭುಜ ಗಣಪತಿಯನ್ನೂ ಪೂಜಿಸಿ, ತಾಯಿ ಪಾರ್ವತಿ ದರ್ಶನ ಪಡೆದು ಸಮುದ್ರ ಸ್ನಾನ ಹಾಗೂ ಕೋಟಿತೀರ್ಥ, ರಾಮತೀರ್ಥಗಳಲ್ಲಿ ಪುಣ್ಯಸ್ನಾನ ಗೈದು ಪೂಜೆಗೆ ಅಣಿಯಾಗುತ್ತಾರೆ. ಶಿವನನ್ನು ಶಿವರಾತ್ರಿ ಪರ್ವಕಾಲದಲ್ಲಿ ಪೂಜಿಸುವುದು ಶಿವಭಕ್ತರ ಕರ್ಮಗಳಲ್ಲಿ ಒಂದು. ಗೋಕರ್ಣ ಕ್ಷೇತ್ರಕ್ಕೆ ಶಿವರಾತ್ರಿಯಂದೇ ಶಿವನನ್ನು ಪೂಜಿಸಲು ಭಕ್ತರು ಸಂಭ್ರಮದಿಂದ ಸೇರುತ್ತಾರೆ. ಶಿವರಾತ್ರಿ ಭಕ್ತಕೋಟಿಗೆ ಮುದವನ್ನು ನೀಡುತ್ತದೆ. ಕಾರಣ ಸಾಮಾನ್ಯವಾಗಿ ಎಲ್ಲಾ ದೇವಾಲಯಗಳಲ್ಲಿ ದರ್ಶನಕ್ಕೆ ಮಾತ್ರ ಸೀಮೀತವಾಗಿರುವುದನ್ನು ನಾವು ಕಾಣುತ್ತೇವೆ. ಆದರೆ ಇಲ್ಲಿ ಜಾತಿ-ಮತ-ಬೇಧವಿಲ್ಲದೇ ಎಲ್ಲಾ ಭಕ್ತರೂ ಸ್ವತಃ ಅವರೇ ಪೂಜಿಸುವ ಅವಕಾಶ ಗೋಕರ್ಣದಲ್ಲಿ ಮಾತ್ರವಿದೆ. ಭಕ್ತರು ತಮ್ಮ ಭಕ್ತಿ-ಶ್ರದ್ಧೆಗೆ ಅನುಗುಣವಾಗಿ ಪುರೋಹಿತರ ಮಾರ್ಗದರ್ಶನದಲ್ಲಿ ಪೂಜೆ ಸಲ್ಲಿಸುತ್ತಾರೆ.

ದನ ಮುಟ್ಟದ ನೀರನ್ನಿಲ್ಲಿ ಜನ ಕುಡಿತ್ತಾರೆ


ಸ್ನಾನ ಮಾಡಿದ್ರೆ ಮೈಯೆಲ್ಲ ತುರಿಕೆ. ಜಾನುವಾರು ಈ ನೀರನ್ನು ಮುಸಿ ನೋಡೊಲ್ಲ.  ಆದರೆ ಇದನ್ನೇ ಕಳೆದ 12 ವರ್ಷಗಳಿಂದ ಜನ ಕುಡಿತಿದ್ದಾರೆ. ಬಾಳೆಹೊನ್ನೂರು ಸಮೀಪದ ವಾಟಕೂಡಿಗೆ ಗ್ರಾಮಸ್ಥರು ಗ್ರಾಮದ ಬಸವನಕೂಗು ಕೆರೆಯ ಮಲೀನ ನೀರನ್ನು ಕಳೆದ 12 ವರ್ಷಗಳಿಂದ ಕುಡಿಯುತ್ತಿದ್ದಾರೆ.
2000ರಲ್ಲಿ ನೇ ಗ್ರಾಮಕ್ಕೆ ಕುಡಿಯುವ ನೀರಿನ ವ್ಯವಸ್ಥೆಗಾಗಿ ಬಸವನಕೂಗು ಕೆರೆಯ ಪಕ್ಕದಲ್ಲಿ ಬಾವಿ ತೊಡಿ, ಬಾವಿಗೆ ಕೆರೆಯಿಂದ ನೀರು ಬರುವಂತೆ ಪೈಪ್ ಅಳವಡಿಸಲಾಗಿತ್ತು. ನಂತರ ಮೋಟರ್ ಮುಖಂತರ ಟ್ಯಾಂಕ್ಗೆ ನೀರು ತುಂಬಿ ಗ್ರಾಮಕ್ಕೆ ಸರಬರಾಜು ಮಾಡಲಾಗುತ್ತಿತ್ತು. ಆದರೆ ಯಾವುದೇ ಶುದ್ಧೀಕರಣ ಪ್ರಕ್ರಿಯೆಗೆ ಒಳಪಡದ ಈ ಮಲೀನ ನೀರನ್ನೇ ಸುಮಾರು 16 ಆದಿವಾಸಿ ಮತ್ತು 70 ಇತರ ಕುಟುಂಬಗಳು ಬಳಸುತ್ತಿದ್ದಾರೆ. ಜಾನುವಾರುಗಳಿಗೆ ನೀರನ್ನು ಕೊಟ್ಟರೆ ಮೂಸಿ ನೋಡುತ್ತವೆ ಹೊರತು ಕುಡಿಯುವುದಿಲ್ಲ. ಈ ನೀರು ಕುಡಿಯಲು ಎಷ್ಟು ಯೋಗ್ಯ ಎಂಬುದಕ್ಕೆ ಇದೇ ಸಾಕ್ಷಿ.

ಪುಣ್ಯದ ನಾಡಲ್ಲೊಂದು ಪಾಪದ ಕೆಲಸ


ಉತ್ತರ ಪ್ರದೇಶದ ಅಲಹಾಬಾದ್ನಲ್ಲಿ ನಡೆಯುವ ಮಹಾಕುಂಭ ಮೇಳ ಹಿಂದೂಗಳಿಗೊಂಡು ಪವಿತ್ರ ಹಬ್ಬ. ಜನ ಅಲಹಾಬಾದ್ಗೆ ಬಂದು ಗಂಗೆಯಲ್ಲಿ ಮಿಂದು ತಮ್ಮ ಪಾಪಗಳನ್ನು ತೊಳೆದುಕೊಳ್ಳುತ್ತಾರೆ. ಹಲವರಿಗೆ ಇದೊಂದು ಬದುಕಿನ ಮಹತ್ವದ ಸಂಗತಿ ಮತ್ತು ಅತ್ಯಂತ ಸಂತಸ ತರುವ ಅಂಶ. ಆದರೆ ಕುಂಭಮೇಳದ ಇನ್ನೊಂದು ಮುಖವನ್ನು ನೋಡುವುದಾದರೆ, ಕೆಲವರಿಗೆ ತಮ್ಮ ಹಿರಿ ವಯಸ್ಸಿನವರನ್ನು ಪರಿತ್ಯಜಿಸಲು ಇದೊಂದು ಸೂಕ್ತ ಸಮಯ.
ಹಲವರು ತಮ್ಮ ಹಿರಿಯರನ್ನು ಬಿಟ್ಟುಬಿಡಲು ಕುಂಭಮೇಳಕ್ಕೆ ಕಾಯುತ್ತಾರೆ. ಹೀಗೆ ಪರಿತ್ಯಕ್ತರಾದವರಿಗೆ ಇದ್ಯಾವುದೂ ಗೊತ್ತೇ ಇರುವುದಿಲ್ಲ. ವೃದ್ಧರು ಉಪಯೋಗಕ್ಕೆ ಬಾರದ್ದರಿಂದ ಮತ್ತೆ ಅವರನ್ನು ನೋಡಿಕೊಳ್ಳುವ ಉಸಾಬರಿಯೇ ಬೇಡ ಎಂದು ಭಾವಿಸುತ್ತಾರೆ. ಅದಕ್ಕಾಗಿ ಅವರನ್ನು ಕುಂಭಮೇಳದ ನೆವದಲ್ಲಿ ಕರೆದುಕೊಂಡು ಬಂದು ಇಲ್ಲಿ ಬಿಟ್ಟು ನಾಪತ್ತೆಯಾಗುತ್ತಾರೆ.
ಕುಂಭಮೇಳದಲ್ಲಿ ವೃದ್ಧ ಪುರುಷ, ಮಹಿಳೆಯರನ್ನು ತಂದು ಬಿಟ್ಟುಬಿಡಲಾಗುತ್ತದೆ. ಇದರಲ್ಲಿ ಹೆಚ್ಚಾಗಿರುವುದು ವೃದ್ಧ ವಿಧವೆಯರು. ಕೆಲವರು ನಿಜವಾಗಿಯಾದರೂ ತಮ್ಮ ಗುಂಪಿನಿಂದ ತಪ್ಪಿಹೋದರೆ, ಇನ್ನು ಕೆಲವರು ನಿಜವಾಗಿಯೂ ತಮ್ಮ ವೃದ್ಧರನ್ನು ಬಿಟ್ಟುಬಿಡುತ್ತಾರೆ. ಹೀಗೆ ಪರಿತ್ಯಕ್ತರಾದವರು, ಮತ್ತೆ ಮನೆಗೆ ತಮ್ಮಷ್ಟಕ್ಕೆ ಮನೆ ದಾರಿ ಹಿಡಿಯುವಷ್ಟೂ ಶಕ್ತರಲ್ಲ. ಅವರಲ್ಲಿ ಕೆಲವರು ಅಕ್ಷರಸ್ಥರಲ್ಲ, ಕೆಲಸವೂ ಗೊತ್ತಿಲ್ಲ. ಹಲವು ವರ್ಷಗಳ ಕಾಲ ಅವರು ಯಾವ ಪ್ರದೇಶದಲ್ಲಿ, ಯಾವ ಜಿಲ್ಲೆಯಲ್ಲಿ ವಾಸ ಮಾಡುತ್ತಾರೆ ಎಂಬುದೇ ಅವರಿಗೆ ಗೊತ್ತಿರುವುದಿಲ್ಲ.
ಹೀಗೆ ಪರಿತ್ಯಕ್ತರಾದವರನ್ನು ಸ್ವಯಂಸೇವಕರು ಟೆಂಟ್ಗಳಲ್ಲಿರುವ ಗಿಜಿಗುಟ್ಟುವ ನಾಪತ್ತೆ-ಪತ್ತೆ ಕೇಂದ್ರಕ್ಕೆ ಸೇರಿಸುತ್ತಾರೆ. ಇದರಲ್ಲಿ ವೃದ್ಧರು ಸರ್ಕಾರ ನಡೆಸುವ ಕೇಂದ್ರಕ್ಕೆ ಸೇರುವ ಸಾಧ್ಯತೆ ಇರುತ್ತದೆ. ಇಂತಹ ನಿರ್ವಸಿತರ ಕೇಂದ್ರಗಳ ಸ್ಥಿತಿ ತೀರ ಕೆಟ್ಟದಾಗಿರುತ್ತವೆ. ಆದಾಗ್ಯೂ ಹಲವರು, ರಸ್ತೆಗಳಲ್ಲಿ ಭಿಕ್ಷೆ ಬೇಡಿ ಬದುಕು ಕಂಡುಕೊಳ್ಳುತ್ತಾರೆ. ವಾರಾಣಸಿ, ವೃಂದಾವನದಂತಹ ದೇಗುಲ ನಗರಿಗಳಲ್ಲಿ ಇವರ ಜೀವನ ಸಾಗುತ್ತದೆ. ಒಂದು ವೇಳೆ ಅವರು ಅದೃಷ್ಟ ಮಾಡಿದ್ದರೆ, ಅವರಿಗೆ ದೇವಸ್ಥಾನಗಳು ಅಥವಾ ಚಾರಿಟಿಗಳು ನಡೆಸುವ ಕೇಂದ್ರಗಳಲ್ಲಿ ಜೀವನ ಸಾಗಿಸುತ್ತಾರೆ.
ದೊಡ್ಡ ನಗರಗಳನ್ನು ಸೇರುವ ಪರಿತ್ಯಕ್ತರು, ಅವರಲ್ಲೂ ಕುಟುಂಬದ ಬೆಂಬಲದಿಂದ ವಂಚಿತರಾದ, ಹೆಚ್ಚಾಗಿ ಮಹಿಳೆಯರು, ಮೋಕ್ಷದ ಗುಂಗಿನಲ್ಲಿ ಇಂತಹ ದೇಗುಲ ನಗರಿಗಳಲ್ಲೇ ತಮ್ಮ ಕೊನೆ ಜೀವನವನ್ನು ಸಾಗಿಸುತ್ತಾರೆ. ಹಸಿವು ಇವರನ್ನು ಅಪಾರವಾಗಿ ಬಾಧಿಸುತ್ತಿರುತ್ತದೆ. ಹಿಂದೂ ಪರಂಪರೆ ಪ್ರಕಾರ ಮಹಿಳೆಯನ್ನು ತಂದೆ, ಬಳಿಕ ಪತಿ, ನಂತರ ಮಕ್ಕಳು ಆಕೆಯನ್ನು ಅಂತ್ಯಕಾಲದವರೆಗೆ ಜವಾಬ್ದಾರಿಯಿಂದ ನೋಡಿಕೊಳ್ಳಬೇಕು. ತಂದೆ-ತಾಯಿ ದೇವರ ಸಮಾನ. ತಂದೆ-ತಾಯಿಯನ್ನು ಹಿಂಸಿಸುವುದು ಮಹಾಪಾಪ ಎನ್ನುತ್ತದೆ ಹಿಂದೂ ಧರ್ಮ. ಆದರೆ, ಇದನ್ನೆಲ್ಲಾ ಇಂದು ಕೇಳುವವರಾರು?. ಪುಣ್ಯದ ನಾಡಲ್ಲೊಂದು ನಡೆಯುವ ಇಂತಹ ಪಾಪದ ಕೆಲಸಕ್ಕೆ ಯಾರು ಹೊಣೆ?.

‘ಕಾಮದುಘಾ' ಯೋಜನೆಗೆ 'ಬ್ರೀಡ್ ಸೇವಿಯರ್ ಅವಾರ್ಡ್'


ಕಾಸರಗೋಡು ತಳಿಯ ಗೋವುಗಳ ಸಂರಕ್ಷಣೆ, ಸಂವರ್ಧನೆ ಹಾಗೂ ಸಂಶೋಧನೆಯ ಗುರಿಯೊಂದಿಗೆ 2004 ನವೆಂಬರ್ 6 ರಂದು ಹೊಸನಗರ ಶ್ರೀ ರಾಮಚಂದ್ರಾಪುರ ಮಠದ 'ಕಾಮದುಘಾ' ಯೋಜನೆಯ ಮೂಲಕ ಆರಂಭವಾದ ಪೆರ್ಲದ ಬಜಕೂಡ್ಲಿನ 'ಅಮೃತಧಾರಾ ಗೋಶಾಲೆ'ಗೆ ದೇಶದ ಪ್ರತಿಷ್ಠಿತ 'ಬ್ರೀಡ್ ಸೇವಿಯರ್ ಅವಾರ್ಡ್-2012' ಬಂದಿದೆ.
ಕೇವಲ 48 ದನಗಳು ಮತ್ತು 5 ಹೋರಿಗಳ ಸಾಕಣೆಯ ಮೂಲಕ ಆರಂಭವಾದ ಈ ಗೋಶಾಲೆಯಲ್ಲಿ ಪ್ರಸ್ತುತ 100 ಕ್ಕೂ ಮಿಕ್ಕಿ ದೇಶೀ ಜಾನುವಾರುಗಳಿಗೆ ಆಶ್ರಯ ನೀಡಲಾಗುತ್ತಿದ್ದು, ದೇಶ, ವಿದೇಶಗಳಲ್ಲಿ ಗೋಪ್ರೇಮಿಗಳ ಗಮನವನ್ನು ಸೆಳೆದಿದೆ. ಈ ಗೋಶಾಲೆಯಲ್ಲಿರುವ ಕಾಸರಗೋಡು ತಳಿಯ ಗಿಡ್ಡ ದನ 'ಬಂಗಾರಿ' ಈಗಾಗಲೇ 'ಲಿಮ್ಕಾ ಬುಕ್ ಆ್ ರೆಕಾಡ್ಸ್' ನಲ್ಲಿ ಸ್ಥಾನ ಗಳಿಸಿದ್ದು, ಈಗ ಸೇವಾ' ಸಂಸ್ಥೆಯು ದೇಶೀ ತಳಿ ಜಾನುವಾರುಗಳ ಸಂರಕ್ಷಣೆಗಾಗಿ ಕೊಡಮಾಡುವ 'ಬ್ರೀಡ್ ಸೇವಿಯರ್' ಪ್ರಶಸ್ತಿಗೆ ಯೋಜನೆಯನ್ನು ಗುರುತಿಸಿರುವುದು ದೇಶೀ ಗೋತಳಿಯ ಸಂರಕ್ಷಣೆಯ ಪ್ರಯತ್ನಕ್ಕೆ ಸಂದ ಗೌರವವಾಗಿದೆ.
ಕಾಸರಗೋಡು ಜಿಲ್ಲೆಯಲ್ಲಿ ಹಿಂದೆ ಬಹುದೊಡ್ಡ ಸಂಖ್ಯೆಯಲ್ಲಿದ್ದ, ಈಗ ವಿನಾಶದಂಚಿಗೆ ಸರಿಯುತ್ತಿರುವ ಕಾಸರಗೋೀಡು ತಳಿಯ ಹಸುಗಳು ಶೂನ್ಯ ಬಂಡವಾಳದ ಕೃಷಿಗೆ ಹೆಚ್ಚು ಯೋಗ್ಯವಾದವುಗಳು. ಅತಿ ಕಡಿಮೆ ಆಹಾರ ಸೇವನೆ ಮಾಡುವ ಈ ಗೋವುಗಳ ಹಾಲು, ಮೂತ್ರ, ಸೆಗಣಿ ಅತ್ಯಂತ ಶ್ರೇಷ್ಠವಾದವುಗಳು. ಅವುಗಳ ಸಂರಕ್ಷಣೆಯ ಕಾರ್ಯವನ್ನು ಕೈಗೊಂಡಿರುವುದರಿಂದ ಪೆರ್ಲದ ಬಜಕೂಡ್ಲು ಅಮೃತಧಾರಾ ಗೋಶಾಲೆಯ 'ಕಾಮದುಘಾ' ಯೋಜನೆಗೆ ಪ್ರಶಸ್ತಿ ದೊರಕಿದೆ.
ಭಾರತೀಯ ಗೋಬ್ಯಾಂಕಿನ ಮುಖಾಂತರ 380 ಆಸಕ್ತ ಸಾಕಣಿಕೆದಾರರಿಗೆ ಕಾಸರಗೋಡು ಗೋವುಗಳನ್ನು ಅಮೃತಧಾರಾ ಗೋಶಾಲೆ ಈಗಾಗಲೇ ವಿತರಿಸಲಾಗಿದೆ. ಶಮನ ತೈಲ, ಹಿಮಗಿರಿ ತೈಲ, ಶೋಡಷಿ ದಂತ ಮಂಜನ, ಕ್ಲೀನ್ ನೈಲ್(ಉಗುರು ಶುಚಿಕಾರಯ) ಗೋಸಾರವಟಿ ಇತ್ಯಾದಿ ವಿಶೇಷ ಪಂಚಗವ್ಯ ಉತ್ಪನ್ನಗಳನ್ನು ಅಭಿವೃದ್ಧಿಪಡಿಸಿದೆ. ನಬಾರ್ಡ್ ಸಂಸ್ಥೆಯ ಅನುದಾನದಲ್ಲಿ 4 ಪಂಚಾಯತ್ಗಳಲ್ಲಿ ಕಾಸರಗೋಡು ಗೋವುಗಳ ಗಣತಿ ಹಾಗೂ ಉತ್ತಮ ಗೋವುಗಳ ಮಾಹಿತಿ ಸಂಗ್ರಹ ಕಾರ್ಯ ನಡೆಸಿ 200 ಉತಷ್ಟ ಗೋವುಗಳನ್ನು ಆಯ್ಕೆ ಮಾಡಲಾಗಿದೆ. ರಕ್ತ ಪರೀಕ್ಷೆಯ ಮುಖಾಂತರ ತಳಿ ಶುದ್ಧತೆಯ ಬಗ್ಗೆ ಸಂಶೋಧನೆ, ಕಾಸರಗೋಡು ಗೋ ಆಧಾರಿತ ಕೃಷಿಯ ಬಗ್ಗೆ ಆಸಕ್ತರಿಗೆ ಉಚಿತ ತರಬೇತಿ ಶಿಬಿರಗಳನ್ನೂ ಆಯೋಜಿಸಿರುವುದರಿಂದ 'ಅಮೃತಧಾರಾ ಗೋಶಾಲೆ'ಗೆ ಅರ್ಹವಾಗಿ ಈ ಪ್ರಶಸ್ತಿ ದೊರಕಿದೆ.
ಈಗಾಗಲೇ ಅಮೃತಧಾರಾ ಗೋಶಾಲೆಯಲ್ಲಿ ಎ2 ಹಾಲಿನ ಸಂಶೋಧನೆಗೆ ಚಾಲನೆ ನೀಡಲಾಗಿದೆ. ಕಾಸರಗೋಡು ಗೋವಿನ ಪ್ರಚಾರಕ್ಕಾಗಿ ಭಾರತೀಯ ಗೋಯಾತ್ರೆ, ಗೋಸಂಪತ್ತು, ಗೋಮಾತಾ ತುಲಾಭಾರ ಇತ್ಯಾದಿ ಕಾರ್ಯಕ್ರಮಗಳನ್ನು 'ಕಾಮದುಘಾ' ಯೋಜನೆಯು ಯಶಸ್ವಿಯಾಗಿ ಆಯೋಜಿಸಿದೆ. ಕೇರಳದ ವಿವಿದೆಡೆಗಳಲ್ಲಿ ದೇಶೀ ಗೋತಳಿಯ ಪ್ರಚಾರಕ್ಕಾಗಿ ಗೋವುಗಳ ಪ್ರದರ್ಶನ ನಡೆಸಿರುವುದನ್ನೂ ಮನಗಂಡ 'ಸೇವಾ' ಸಂಸ್ಥೆಯು ಈ ಪ್ರತಿಷ್ಠಿತ ಪ್ರಶಸ್ತಿಯನ್ನು ನೀಡುತ್ತಿದೆ.
ಹಸು, ಎಮ್ಮೆ, ಆಡು, ಕುರಿ ಸಹಿತ ವಿವಿಧ ದೇಸೀ ತಳಿಯ ಜಾನುವಾರುಗಳ ಸಂರಕ್ಷಣೆಗಾಗಿ ಸೇವಾ ಸಂಸ್ಥೆ ನೀಡುವ ಈ 'ಬ್ರೀಡ್ ಸೇವಿಯರ್' ಪ್ರಶಸ್ತಿ ಪ್ರದಾನ ಸಮಾರಂಭವು ಮಾರ್ಚ್ 8 ಮತ್ತು 9 ರಂದು ದೆಹಲಿಗೆ ಸಮೀಪದ ಕರ್ನಾಲ್ನಲ್ಲಿ ನಡೆಯಲಿದೆ.