ಚೀನಾದಿಂದ ಚಿಯಾಂಗ್-ಲ್ಹಾಸಾ ರೈಲು ಮಾರ್ಗ ನಿರ್ಮಾಣವೇಕೆ?


ಚೀನಾ ನಮ್ಮ ನಿಜವಾದ ಶತ್ರುವಾಗಿದ್ದು, ಅದರ ಸಮರ ಸಿದ್ಧತೆಗಳು, ತಂತ್ರಗಳು ಹಾಗೂ ಅದರ ತಂತ್ರಜ್ಞಾನದ ಮಟ್ಟ, ಆಳವನ್ನು ಭಾರತ ತಿಳಿಯಬೇಕು. ಪ್ರಕೃತಿ ನಮಗೆ ಚೀನಾದಷ್ಟು ಅನುಕೂಲಕರವಾಗಿಲ್ಲ. ಆದರೆ, ಚೀನಾದ ತಂತ್ರಕ್ಕೆ ಪ್ರತಿತಂತ್ರ ಹಾಗೂ ರಾಜಕೀಯ ಇಚ್ಛಾಶಕ್ತಿಯನ್ನು ಪ್ರದರ್ಶಿಸುವ ಸಮಯ ಈಗ ಸನ್ನಿಹಿತವಾಗಿದೆ.
ಚಿಯಾಂಗ್ನಿಂದ ಲ್ಹಾಸಾವರೆಗಿನ ಅಂದಾಜು 1,200 ಕಿ.ಮೀ ಮಾರ್ಗದಲ್ಲಿ ಜನವಸತಿ ತೀರ ವಿರಳ. ಲ್ಹಾಸಾಗೆ ರೈಲು ಬೇಡವೇ ಬೇಡ ಎಂದು ಟಿಬೆಟಿಯನ್ನರು ಪ್ರತಿಭಟಿಸಿದ್ದರು. ಇಷ್ಟೆಲ್ಲಾ ಅಡೆತಡೆ, ವಿರೋಧವನ್ನು ಎದುರಿಸಿ ಅಪಾರ ವೆಚ್ಚದಲ್ಲಿ ಚೀನಾ ಈ ರೈಲು ನಿರ್ಮಿಸಿದ್ದಾದರೂ ಏಕೆ?. ಕಾರಣ, ಚೀನಾ ಈ ರೈಲು ಮಾರ್ಗವನ್ನು ಬಳಸಿ ತನ್ನ ಕ್ಷಿಪಣಿ ಹಾಗೂ ಸೈನ್ಯವನ್ನು ಟಿಬೆಟ್ಟಿನ ಆಯಕಟ್ಟಿನ ಸ್ಥಳಗಳಲ್ಲಿ ಭಾರತದ ವಿರುದ್ಧ ಪ್ರಯೋಗಿಸಲು ತಂದಿರಿಸಿದೆ. ಆದರೆ, ಇದಕ್ಕೆ ತದ್ವಿರುದ್ಧವಾಗಿದೆ ಭಾರತದ ಸ್ಥಿತಿ. ಚೀನಾದ ಗಡಿಯಲ್ಲಿರುವ ನಮ್ಮ ರಸ್ತೆಗಳು ತೀರಾ ದು:ಸ್ಥಿತಿಯಲ್ಲಿವೆ.
ಚೀನಾ ಹಿಮಾಲಯದಲ್ಲಿ ಮಾತ್ರವಲ್ಲ, ಸಾಗರದಲ್ಲೂ ಜಗಜ್ಜಾಲದ ಯುದ್ಧದಲ್ಲೂ ನಮ್ಮನ್ನು ಸುತ್ತುವರಿಯುತ್ತಿದೆ. ಚೀನಾವನ್ನು ಎದುರಿಸಲು ಸರ್ವ ಸಿದ್ಧತೆ ಮಾಡಿಕೊಳ್ಳಲೇಬೇಕಾದ ಅನಿವಾರ್ಯ ಸ್ಥಿತಿಗೆ ನಾವು ತಲುಪಿದ್ದೇವೆ.