ಒಂಟಿಯಾಗಿ, ಒಂಟಿ ಬಾವಿ ತೋಡಿದ ಮಹಿಳೆ

ಉತ್ತರ ಕನ್ನಡದ ಶಿರಸಿ ಹೆದ್ದಾರಿಗೆ ಅಂಟಿಕೊಂಡಿರುವ ಗಣೇಶ ನಗರದ ಬಡ ಮಹಿಳೆ, ಗೌರಿ ಚಂದ್ರಶೇಖರ ನಾಯ್ಕ (51), ಏಕಾಂಗಿಯಾಗಿ ಬಾವಿ ತೋಡಿದ್ದಾಳೆ. ಮನೆಯ ಹಿಂಭಾಗದಲ್ಲಿ 150 ಅಡಿಕೆ ಹಾಗೂ 15 ತೆಂಗಿನ ಸಸಿಗಳನ್ನು ಬೆಳೆಸಿಕೊಂಡಿದ್ದಾಳೆ. ಇವು ನೀರಿನ ಕೊರತೆಯಿಂದ ಬಾಡಲು ಆರಂಭಿಸಿದವು. ಪೇಟೆಗೆ ಹೋಗಿ ಹಾರೆ, ಗುದ್ದಲಿ, ಚಾಣ, ಹಗ್ಗ ತಂದಳು. ಇರುವ ಬಕೆಟ್ ಬಳಸಿ ಬಾವಿ ತೋಡಲು ಆರಂಭಿಸಿದಳು. 40 ಅಡಿ ಆಳದ ತನಕವೂ ಒಬ್ಬಂಟಿಯಾಗಿ ತೆಗೆದ ಗೌರಿ, ಕೊನೆಯ 20 ಅಡಿ ಆಳಕ್ಕೆ ಮಾತ್ರ ನೀರು ಜಗ್ಗಲು, ಮಣ್ಣು ಎಳೆಯಲು ಮೂವರು ಹೆಣ್ಣಾಳುಗಳ ನೆರವು ಪಡೆದಿದ್ದಾಳೆ.
ಮುಂಜಾನೆ 8 ರಿಂದ ಸಂಜೆ ಕತ್ತಲಾಗುವ ತನಕ ಬಾವಿಯದ್ದೇ ಧ್ಯಾನ. ಮೊದಲು ಸರಸರನೇ ಸಾಗಿತು ಕೆಲಸ. ವಾರಗಳು ಉರುಳಿದ ಬಳಿಕ ಮಣ್ಣು ಅಗೆದು ಬಕೆಟ್‌ನಲ್ಲಿ ತುಂಬಿಟ್ಟು ಬಾವಿಯಿಂದ ಮೇಲೆ ಬಂದು ಮಣ್ಣು ಎಳೆದು ಹಾಕಿ ಕೆಳಗೆ ಇಳಿಯುತ್ತಿದ್ದಳು. ಹೀಗೆ 40 ಅಡಿ ಆಳ ಆಗುವ ತನಕವೂ ಮಾಡಿದ್ದಾಳೆ. ಬಾವಿ ತೋಡುವಾಗ ಬಿಣಚು ಕಲ್ಲುಗಳೂ ಬಂದಿದ್ದವು. ಪ್ರತಿ ದಿನ 150ಕ್ಕೂ ಹೆಚ್ಚು ಸಲ ಬಾವಿಗಿಳಿದು ಮೇಲಕ್ಕೆ ಏರಿದ್ದಳು. ಕೈ, ಕಾಲು ನೋವು ಬಂದರೂ ಛಲ ಬಿಡಲಿಲ್ಲ.



ಮಲೆನಾಡ ಕುವರನಿಗೆ ಉತ್ತರ ಪ್ರದೇಶ ಕನ್ಯೆ

ಯಲ್ಲಾಪುರ ತಾಲೂಕಿನ ಕವಡೀಕೆರೆ ದೇವಸ್ಥಾನದಲ್ಲಿ ಉತ್ತರ ಪ್ರದೇಶದ ಕನ್ಯೆ ಪ್ರಜ್ಞಾ ಮಿಶ್ರಾ ಹಾಗೂ ಶಿಂಗನಮನೆಯ ಶ್ರೀನಿವಾಸ ಗಾಂವ್ಕರ್ ವಿವಾಹ ನೆರವೇರಿತು.
ಉತ್ತರ ಭಾರತದ ಮಿರ್ಜಾಪುರದ ಸಪ್ತಪದಿ ಸಂಚಾಲಕ ತ್ರಿಲೋಕನಾಥ್ ತ್ರಿವೇದಿ ಮಾತನಾಡಿ, ಉತ್ತರ ಪ್ರದೇಶದ ನಾವು, ದಕ್ಷಿಣ ಭಾರತದ ಪ್ರಕೃತಿ ಸೌಂದರ್ಯ ಹಾಗೂ ಜನರ ಪ್ರೀತಿ-ವಿಶ್ವಾಸಗಳನ್ನು ಗಳಿಸುತ್ತಿದ್ದೇವೆ. ನಿಮ್ಮೆಲ್ಲರ ಪ್ರೀತಿ-ವಿಶ್ವಾಸಕ್ಕೆ ಸದಾ ಋಣಿಯಾಗಿದ್ದೇವೆ. ನಮ್ಮ ಬ್ರಾಹ್ಮಣ ಸಮಾಜ ಋಷಿ-ಮುನಿಗಳ ಪರಂಪರೆಯಿಂದ ಬೆಳೆದು ಬಂದಿದೆ. ದೂರದ ಕಾಶಿ ಕ್ಷೇತ್ರದ ಸುತ್ತ ಮತ್ತಲಿನ ಕನ್ಯೆಯರಿಗೆ ಸಪ್ತಪದಿಯ ಮೂಲಕ ವಿವಾಹ ಮಾಡಿಸಿದ್ದೇವೆ. ಈ ವರೆಗೆ 9 ಲಗ್ನ ಮಾಡಿಸಲಾಗಿದೆ. ಇದಕ್ಕೆ ಶ್ರೀಗಳ ತಪಃಶಕ್ತಿ ಹಾಗೂ ಆಶೀರ್ವಾದವೇ ಕಾರಣ. ನಮ್ಮ ಪ್ರಯತ್ನ ಯಶಸ್ಸು ಗಳಿಸಿದೆ ಎಂಬ ತೃಪ್ತಿ ನಮ್ಮದಾಗಿದೆ. ಇನ್ನೂ ನೂರಾರು ಕನ್ಯೆಯರನ್ನು ಈ ಭಾಗಕ್ಕೆ ನೀಡಲಿದ್ದೇವೆ. ಇದಕ್ಕೆ ಇಲ್ಲಿನ ಸಮಾಜ ಬಾಂಧವರು ಕೈಜೋಡಿಸಿದರೆ ಮಾತ್ರ ಸಾಧ್ಯ. ನಂಬಿಕೆ ಇಟ್ಟು ಶ್ರದ್ಧೆಯಿಂದ ಕೆಲಸ ಮಾಡಿದರೆ ಯಶಸ್ಸು ಖಂಡಿತ ಸಿಗುತ್ತದೆ. ಲಗ್ನವಾದವರು ಸಮಾಜದ ಋಣ ಎಂದು ತಿಳಿದು, ತಮ್ಮ ಬಂಧುಗಳ ಲಗ್ನ ಮಾಡಿಸುವಲ್ಲಿ ಆಸಕ್ತಿ ವಹಿಸಿ, ನೆರವು ನೀಡುವ ಅಗತ್ಯವಿದೆ ಎಂದರು.

ಸಪ್ತಪದಿಯ ದಕ್ಷಿಣ ಭಾರತ ಪ್ರದೇಶದ ಸಂಚಾಲಕ ವೆಂಕಟರಮಣ ಬೆಳ್ಳಿ ಮಾತನಾಡಿ, ಸ್ವರ್ಣವಲ್ಲೀ ಶ್ರೀಗಳ ಸಂಕಲ್ಪ ಶಕ್ತಿ ಮತ್ತು ಮಾರ್ಗದರ್ಶನದಲ್ಲಿ ದಕ್ಕಿಣೋತ್ತರ ಭಾರತದ ಬ್ರಾಹ್ಮಣ ಸಂಘಟನೆ ಬಲಗೊಳಿಸುವ ಉದ್ದೇಶದಿಂದ ವೈವಾಹಿಕ ಮತ್ತು ವ್ಯಾವಹಾರಿಕ ಸಂಬಂಧಗಳನ್ನು ಬೆಳೆಸುವಲ್ಲಿ ನಮ್ಮ ಸಪ್ತಪದಿ ಸಂಸ್ಥೆ ಮಹತ್ವದ ಪಾತ್ರ ನಿರ್ವಹಿಸುತ್ತಿದೆ ಎಂದರು.
ಕೆಲವು ತಿಂಗಳು ಹಿಂದೆ ಯಲ್ಲಾಪುರದ ಯುವಕನನ್ನು ವರಿಸಿದ್ದ ಉತ್ತರ ಭಾರತದ ಮಂದಾಕಿನಿ ಪಾಂಡೆ, ಸಪ್ತಪದಿಯ ಕೇಂದ್ರ ಸಮಿತಿ ಖಜಾಂಚಿ ಶಂಕರ ಭಟ್ಟ ತಾರೀಮಕ್ಕಿ, ನಿರ್ದೇಶಕ ಮಾಧವ ಕೋಟೆಮನೆ, ವರನ ತಾಯಿ ಗಿರಿಜಾ, ತಂದೆ ಪರಮೇಶ್ವರ ಗಾಂವ್ಕರ್, ವಧುವಿನ ತಂದೆ ಪವನ ಮಿಶ್ರಾ ತಾಯಿ ಮಾಲಿನಿದೇವಿ ಮತ್ತು ಅನೇಕ ಹಿರಿಯರು, ಅಭಿಮಾನಿಗಳು ಬಂಧುಗಳು ವಧೂ-ವರರನ್ನು ಆಶೀರ್ವದಿಸಿದರು.

ಚಿಣ್ಣರಿಂದ ಯಕ್ಷಕಲಾ ಪ್ರದರ್ಶನ

ಉತ್ತರ ಕನ್ನಡ ಜಿಲ್ಲೆ ಸಿದ್ದಾಪುರ ತಾಲೂಕು ನಿಲ್ಕುಂದ ಸಮೀಪದ ಕಂಚಿಕೈ ರಂಗಮಂದಿರದಲ್ಲಿ ನಡೆದ ಯಕ್ಷ ಪ್ರದರ್ಶನವಿದು. ಪ್ರಾಥಮಿಕ ಶಾಲೆಯ ಚಿಣ್ಣರು ಯಕ್ಷಗಾನದ ವರ್ಣಮಯ ವೇಷಭೂಷಣಗಳನ್ನು ಧರಿಸಿ ರಂಗ ಪ್ರದರ್ಶನ ನೀಡಿದರು. ಆಕರ್ಷಕ ವೇಷಭೂಷಣಗಳನ್ನು ಧರಿಸಿ ರಂಗಕ್ಕೆ ಬಂದು ಸೊಗಸಾದ ನೃತ್ಯಾಭಿನಯ ಪ್ರದರ್ಶಿಸಿದರು. ಮಕ್ಕಳ ಕಲಾಪ್ರತಿಭೆಯ ಅನಾವರಣಕ್ಕೆ ಇದೊಂದು ವೇದಿಕೆಯಾಯಿತು. ಸ್ಥಳೀಯ ಕರ್ಕಿಹಕ್ಕಲ ಮಹಾಗಣಪತಿ ಯಕ್ಷಗಾನ ಮಂಡಳಿ ಈ ಮಕ್ಕಳಿಗೆ ಕಲಾ ತರಬೇತಿ ನೀಡಿತ್ತು.
ಯಕ್ಷ ಕಲಾವಿದ ರಮಾನಂದ ಹೆಗಡೆ ಹೆಲ್ಲೆಕೊಪ್ಪ ಅವರು ಈ ಮಕ್ಕಳಿಗೆ ಯಕ್ಷಗಾನದ ತಾಳ, ಲಯ, ಕುಣಿತ, ಸಂಭಾಷಣೆಯ ತರಬೇತಿ ನೀಡಿ ರಂಗ ಪ್ರದರ್ಶನಕ್ಕೆ ಸಜ್ಜುಗೊಳಿಸಿದ್ದರು. ಹೆಸರಾಂತ ಕಲಾವಿದ ಹೊಸ್ತೋಟ ಮಂಜುನಾಥ ಭಾಗವತ ರಚಿತ ಯಜ್ಞ ಸಂರಕ್ಷಣೆ ಆಖ್ಯಾನದ ಕಥಾಭಾಗವನ್ನು ಮಕ್ಕಳು ಪ್ರಸ್ತುತಪಡಿಸಿದರು.
ರಾಮಾಯಣದ ಅವಧಿಯಲ್ಲಿ ಋಷಿಮುನಿಗಳಿಗೆ ತಾಟಕಿ ಮೊದಲಾದ ರಕ್ಕಸರಿಂದ ಕಿರುಕುಳ, ಯಜ್ಞಯಾಗಾದಿಗಳಿಗೆ ಅಡ್ಡಿ, ಅವರನ್ನು ವಿಶ್ವಾಮಿತ್ರ ಮುನಿಯ ನೇತೃತ್ವದಲ್ಲಿ ರಾಮ ಲಕ್ಷ್ಮಣರು ನಿಯಂತ್ರಿಸಿ ನಿಗ್ರಹಿಸಿದ್ದನ್ನು ಮತ್ತು ಮುಕ್ತಾಯದಲ್ಲಿ ಜನಕರಾಜನ ಪುತ್ರಿ ಸೀತೆಯನ್ನು ರಾಮ ವರಿಸಿದ ಪ್ರಸಂಗವನ್ನು ಮಕ್ಕಳು ಯಕ್ಷ ಕುಣಿತ, ಅಭಿನಯ, ಸಂಭಾಷಣೆಯ ಮೂಲಕ ಸಾದರಪಡಿಸಿದರು.
ಚಿಣ್ಣರಾದ ಮುರಳಿ (ದಶರಥ), ಪ್ರಿಯಾಂಕಾ (ಶ್ರೀರಾಮ), ಲಕ್ಷ್ಮಣ (ಸುಹಾಸ), ನಿತೀಶ (ವಿಶ್ವಾಮಿತ್ರ), ಸಾತ್ವಿಕ್ (ವಸಿಷ್ಠ), ಸುಮಿತ್ರಾ (ತಾಟಕಿ), ಪ್ರಸನ್ನ (ಮಾರೀಚ), ಸಹನಾ (ಸುಬಾಹು), ಲಿಖಿತಾ (ಸೀತೆ) ರಂಗವನ್ನೇರಿದರು. ಸಂಪದಾ (ರಾವಣ), ಪ್ರಿಯಾ (ಜನಕರಾಜ), ನಿಖಿಲ, ಪ್ರತೀಕ (ಬಾಲಗೋಪಾಲ) ಅಭಿನಯಿಸಿದರು.


ಹಿಮ್ಮೇಳದಲ್ಲಿ ಎಂ.ಪಿ.ಹೆಗಡೆ ಹುಲ್ಲಾಳದ್ದೆ ಭಾಗವತಿಕೆ, ಪರಮೇಶ್ವರ ತಾರೇಸರ ಮೃದಂಗ ವಾದನ ಮತ್ತು ಪ್ರಭಾಕರ ಹೆಗಡೆ ಕಂಚೀಕೈ ಚಂಡೆ ವಾದನದಲ್ಲಿ ಸಹಕರಿಸಿದರು. 

ಜನರ ಸಹಭಾಗಿತ್ವದಲ್ಲಿ ಎಕ್ಕಂಬಿ ಕೆರೆಗೆ ಕಾಯಕಲ್ಪ

ಜನರ ಸಹಭಾಗಿತ್ವದ ಶಿರಸಿ ಜೀವಜಲ ಕಾರ್ಯಪಡೆ ಗ್ರಾಮೀಣ ಪ್ರದೇಶದ ಕೆರೆ ಅಭಿವೃದ್ಧಿಗೆ ನಾಂದಿ ಹಾಡಿದೆ. ಬಿಸಲಕೊಪ್ಪ ಗ್ರಾಪಂ ವ್ಯಾಪ್ತಿಯ ಎಕ್ಕಂಬಿ ಕೆರೆ ಹೂಳೆತ್ತಲು ಕೆಲವೇ ಗಂಟೆಗಳಲ್ಲಿ 1.61 ಲಕ್ಷ ರೂ.ಸಂಗ್ರಹಿಸಿ ಕಾಮಗಾರಿ ಆರಂಭಿಸಿದೆ.


ಎಕ್ಕಂಬಿಯ ಏಕಾಂಬಿಕೇಶ್ವರ ದೇವಾಲಯದಲ್ಲಿ ಶಿರಸಿ ಜೀವಜಲ ಕಾರ್ಯಪಡೆ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ 3.26 ಎಕರೆ ವಿಸ್ತೀರ್ಣದ ಕೆರೆ ಹೂಳೆತ್ತಲು ನಿರ್ಧರಿಸಲಾಗಿತ್ತು. ತಕ್ಷಣವೇ ಸ್ಥಳೀಯರು, ಸಾರ್ವಜನಿಕರಿಂದ ಅಭೂತಪೂರ್ವ ಬೆಂಬಲ ದೊರೆಯಿತು. ಮಾತ್ರವಲ್ಲ, ಜೆಸಿಬಿ, ಹಿಟಾಚಿ, ವಾಹನಗಳ ವ್ಯವಸ್ಥೆಯೂ ಆಯಿತು.

ಚಪ್ಪರಮನೆ ಶ್ರೀಧರ ಹೆಗಡೆಗೆ ಪ್ರಶಸ್ತಿ

ಕುಂಭಾಶಿಯ ಪೂರ್ಣಚಂದ್ರ ಯಕ್ಷಕಲಾ ಪ್ರತಿಷ್ಠಾನ ಕೊಂಡದಕುಳಿ ಅವರು ಪ್ರತಿವರ್ಷ ನಡೆಸಿಕೊಂಡು ಬರುತ್ತಿರುವ ದಿ ಕೊಂಡದಕುಳಿ ರಾಮ ಹೆಗಡೆ ಪ್ರಶಸ್ತಿ ಪ್ರದಾನ ಸಮಾರಂಭ ಉತ್ತರ ಕನ್ನಡದ ಬಾನ್ಕುಳಿ ಮಠದಲ್ಲಿ ಶ್ರೀ ರಾಮಚಂದ್ರಾಪುರ ಮಠದ ಶ್ರೀ ರಾಘವೇಶ್ವರ ಭಾರತೀ ಸ್ವಾಮೀಜಿ ಅವರ ಉಪಸ್ಥಿತಿಯಲ್ಲಿ ಏ.29ರ ಸಂಜೆ 7ಕ್ಕೆ ನಡೆಯಲಿದೆ. ಪ್ರಶಸ್ತಿ 25,000 ರೂ. ನಗದು ಒಳಗೊಂಡಿದೆ.

ಹಿರಿಯ ಹಾಸ್ಯ ಕಲಾವಿದ ಚಪ್ಪರಮನೆ ಶ್ರೀಧರ ಹೆಗಡೆ ಪ್ರಶಸ್ತಿ ಸ್ವೀಕರಿಸಲಿದ್ದಾರೆ. ರಾಮ ಹೆಗಡೆ ಮತ್ತು ಲಕ್ಷ್ಮಣ ಹೆಗಡೆ ಅವಳಿ ಸಹೋದರರು ಬಡಗುತಿಟ್ಟಿನ ಪ್ರಸಿದ್ಧ ಕಲಾವಿದರಾಗಿದ್ದು, ಹಲವು ಪೌರಾಣಿಕ ಪಾತ್ರಗಳನ್ನು ಸುಂದರವಾಗಿ ನಿರೂಪಿಸಿದವರು. ರಾಮ ಹೆಗಡೆ ಅವರ ಮೊಮ್ಮಗ, ಕಲಾವಿದ, ಪ್ರತಿಷ್ಠಾನದ ವರಿಷ್ಠ ಕೊಂಡದಕುಳಿ ರಾಮಚಂದ್ರ ಹೆಗಡೆ ಅವರು ತಮ್ಮ ಅಜ್ಜನ ನೆನಪಿನಲ್ಲಿ ಪ್ರಶಸ್ತಿ ನೀಡುತ್ತಾ ಬಂದಿದ್ದಾರೆ.

ನೀರು ಕೊಟ್ಟವರ ಗಂಟಲು ಒಣಗ್ತಿದ್ರೂ ಕೇಳೋರಿಲ್ಲ

ಶಿರಸಿ ನಗರಕ್ಕೆ ಕಳೆದ ಐದು ದಶಕಗಳಿಂದ ನೀರು ಕೊಟ್ಟ ನಮ್ಮ ಗಂಟಲೇ ಒಣಗುತ್ತಿದೆ. ಕೃಷಿಗೆ, ಕುಡಿಯುವ ನೀರಿಗಾಗಿ ಬಾವಿಗೆ ಹಾಕಿಕೊಂಡ ಕೃಷಿ ಪಂಪ್‌ಸೆಟ್‌ಗಳನ್ನು ಕಿತ್ತುಕೊಂಡು ಬಂದಿದ್ದಾರೆ. ನಾವೇನು ಮಾಡಬೇಕು ಸ್ವಾಮಿ...
ಇದು ಕೆಂಗ್ರೆ ಹಳ್ಳ ವ್ಯಾಪ್ತಿಯ ಇಟಗುಳಿ ಹಾಗೂ ಮೇಲಿನ ಓಣಿಕೇರಿ ಪಂಚಾಯ್ತಿ ರೈತರು, ಕೃಷಿ ಕೂಲಿಕಾರ್ಮಿಕರು, ಹಿಂದುಳಿದ ಜನರು, ಮಹಿಳೆಯರ ಕೂಗು.
ನಗರಸಭೆ ಅಧಿಕಾರಿಗಳು ಹೇಳದೆ, ಕೇಳದೇ ಪಂಪ್‌ಸೆಟ್ ಎತ್ತಿಕೊಂಡು ಬಂದಿದ್ದಾರೆ. ಪಂಪ್‌ಸೆಟ್ ಮನೆ ಒಡೆದು, ್ಯೂಸ್, ಕಟೌಟ್ ಧ್ವಂಸ ಮಾಡಿ ಬಂದಿದ್ದಾರೆ. ಇದು ನ್ಯಾಯವೇ? ನಮಗೇ ಕುಡಿಯಲು ನೀರಿಲ್ಲ, ಹೀಗಿದ್ದಾಗ್ಯೂ ಹಳ್ಳಿಗರನ್ನೂ ನಿರ್ಲಕ್ಷ್ಯ ಮಾಡಿದ್ದು ಸರಿಯೇ...ಎಂಬುದು ಅವರ ಪ್ರಶ್ನೆ.
ಕಳೆದ ಹತ್ತಾರು ವರ್ಷಗಳಿಂದ ಶಿರಸಿ ನಗರದ ಜನತೆಗೆ ಕುಡಿಯುವ ನೀರಿಗಾಗಿ ಕೆಂಗ್ರೆಹೊಳೆ ಮೊರೆ ಹೋಗಿದೆ ನಗರಸಭೆ. ಇದಕ್ಕೆ ಸ್ಥಳಿಯರು ತಕರಾರು ಮಾಡಿಲ್ಲ. ಆದರೆ, ಈ ಬಾರಿ ಪರಿಸ್ಥಿತಿ ಬಿಡಗಾಯಿಸಿದೆ. ಸ್ಥಳಿಯರಿಗೆ ಕುಡಿಯಲಿಕ್ಕೆ ನೀರಿಲ್ಲ. ಇಂತಹ ಪರಿಸ್ಥಿತಿಯಲ್ಲಿ ನಗರಸಭೆ ಅಧಿಕಾರಿಗಳು ಯಾವುದೇ ಮುನ್ಸೂಚನೆ ನೀಡದೆ ಮಾಲ್ಕಿ ಜಾಗದಲ್ಲಿನ ಬಾವಿಗಳ ಹಾಗೂ ಕೆರೆಗಳ ಪಂಪ್‌ಸೆಟ್‌ಗಳನ್ನು ಕಿತ್ತುಕೊಂಡು ಬಂದಿದ್ದಾರೆ. ಕರಿಗುಂಡಿ ಬಳಿಯಲ್ಲಿ ಪಂಚಾಯತ್ ವತಿಯಿಂದ ಸರ್ಕಾರಿ ಅನುದಾನದಲ್ಲಿ ನಿರ್ಮಿಸಲಾಗಿದ್ದ ಬಾಂದಾರನ್ನು ಒಡೆದಿದ್ದಾರೆ. ಇದು ಒಂದು ಹಳ್ಳಿಗೆ ನೀಡುವ ಕುಡಿಯುವ ಯೋಜನೆ ಆಗಿದೆ. ಆದರೆ ಅಲ್ಲಿಗೂ ನೀರೂ ಇಲ್ಲವಾಗಿದೆ.


ಕಳೆದ ಐದು ದಶಕಗಳಿಂದ ಶಿರಸಿಗೆ ನೀರು ಕೊಡುತ್ತಿದ್ದೇವೆ. ಆದರೆ, ಈವರೆಗೆ ಈ ಪ್ರಶ್ನೆ ಎದ್ದಿರಲಿಲ್ಲ. ಈ ಬಾರಿ ಮಾತ್ರ ಸಮಸ್ಯೆ ಬಲವಾಗಿದೆ. ನಗರಸಭೆಯವರು, ಪಂಚಾಯ್ತಿ ಕನಿಷ್ಠ ಪರವಾನಗಿ ಪಡೆಯದೇ ಕಾಮಗಾರಿ ನಡೆಸಿದರೂ ನಾವು ಸುಮ್ಮನಿದ್ದೇವೆ. ನೀರು ಎಲ್ಲರಿಗೂ ಬೇಕು. ಆದರೆ, ದುಂಡಾವರ್ತನೆ ಸಹಿಸಲು ಸಾಧ್ಯವಿಲ್ಲ...ಇದು ಗ್ರಾಮಸ್ಥರು ಆಕ್ರೋಶ.

ಸೋಮೇಶ್ವರ ಮಹಾ ರಥೋತ್ಸವ

ಶಿರಸಿ ಸಮೀಪದ ಸೋಮ ಸಾಗರದ ಸೋಮೇಶ್ವರ ದೇವರ ಮಹಾ ರಥೋತ್ಸವವು ಸಂಭ್ರಮದಿಂದ ನಡೆಯಿತು. ಕರೂರು ಸೀಮೆಯ ಭಜಕರು ರಥಾರೂಢ ದೇವರಿಗೆ ಹಣ್ಣು ಕಾಯಿ, ಹರಕೆ ಸಲ್ಲಿಸಿ ಕೃತಾರ್ಥರಾದರು. 

ಅಡಿಕೆಗೆ ಹನಿ ನೀರಾವರಿ ಸಬ್ಸಿಡಿ ರದ್ದು ಮಾಡಬೇಡಿ

ಕೇಂದ್ರ ಸರಕಾರ ಅಡಿಕೆ ಬೆಳೆಯನ್ನು ಹನಿ ನೀರಾವರಿ ಸಬ್ಸಿಡಿ ಸೌಲಭ್ಯದಿಂದ ಹೊರಗಿಡುವ ಮೂಲಕ ಬೆಳೆಗಾರರಿಗೆ ಅನ್ಯಾಯ ಎಸಗಿದೆ. ಕೂಡಲೇ ಈ ಕುರಿತು ರಾಜ್ಯಗಳಿಗೆ ಕಳುಹಿಸಿದ ಸುತ್ತೋಲೆಯನ್ನು ಕೇಂದ್ರ ಸರಕಾರ ಹಿಂದೆ ಪಡೆಯಬೇಕು. ಕಾಫಿ, ಚಹ, ರಬ್ಬರ್ ಕೃಷಿಗೆ ಹನಿ ನೀರಾವರಿ ಸಬ್ಸಿಡಿ ಯೋಜನೆ ಒದಗಿಸಿರುವಂತೆ ಅಡಿಕೆ ಕೃಷಿಗೂ ಈ ಯೋಜನೆ ಮುಂದುವರಿಸಬೇಕು.
ದೇಶದ 13 ರಾಜ್ಯಗಳಲ್ಲಿ ಅಡಿಕೆ ಬೆಳೆಯಲಾಗುತ್ತದೆ. ಈ ಪೈಕಿ ಕರ್ನಾಟಕ, ಕೇರಳ, ಅಸ್ಸಾಂ ರಾಜ್ಯಗಳು ಮುಂಚೂಣಿಯಲ್ಲಿವೆ. ಕರ್ನಾಟಕದ 24 ಜಿಲ್ಲೆಗಳಲ್ಲಿ ಅಡಿಕೆ ಕೃಷಿ ಇದ್ದು, 2,51,185 ಹೆಕ್ಟೇರ್ ಪ್ರದೇಶದಲ್ಲಿ ಅಡಿಕೆ ಬೆಳೆಯಲಾಗುತ್ತಿದೆ. ಉತ್ತರ ಕನ್ನಡ ಜಿಲ್ಲೆಯಲ್ಲಿ 40,977 ಹೆಕ್ಟೇರ್, ಶಿವಮೊಗ್ಗ ಜಿಲ್ಲೆಯಲ್ಲಿ 48,187 ಹೆಕ್ಟೇರ್, ಚಿಕ್ಕಮಗಳೂರು ಜಿಲ್ಲೆಯಲ್ಲಿ 36,980 ಹೆಕ್ಟೇರ್, ದಾವಣಗೆರೆ ಜಿಲ್ಲೆಯಲ್ಲಿ 35,741 ಹೆಕ್ಟೇರ್ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ 34,977 ಹೆಕ್ಟೇರ್ ಅಡಿಕೆ ಕೃಷಿ ಇದೆ. ಒಟ್ಟು ಬೆಳೆಗಾರರಲ್ಲಿ ಶೇ.85ರಷ್ಟು ಮಂದಿ ಸಣ್ಣ ಮತ್ತು ಮಧ್ಯಮ ವರ್ಗದ ಬೆಳೆಗಾರರಾಗಿದ್ದು, ಹನಿ ನೀರಾವರಿ ಯೋಜನೆ ಅವರಿಗೆ ಸೂಕ್ತವಾಗಿದೆ. ಈಗಾಗಲೇ ಅವರಲ್ಲಿ ಹಲವು ಮಂದಿ ಹನಿ ನೀರಾವರಿ ಯೋಜನೆ ಅನುಸರಿಸಿಕೊಂಡು ಬರುತ್ತಿದ್ದಾರೆ. ಆದರೆ, ಇದೀಗ ಹನಿ ನೀರಾವರಿ ಯೋಜನೆಯಿಂದ ಅಡಿಕೆ ಕೃಷಿಯನ್ನು ಹೊರಗಿಡುವ ಕೇಂದ್ರ ಸರ್ಕಾರದ ನಿರ್ಧಾರ ಬೆಳೆಗಾರರಿಗೆ ಆಘಾತ ಉಂಟು ಮಾಡಿದೆ. ರಾಜ್ಯದ ಆರ್ಥಿಕ ವ್ಯವಸ್ಥೆ ಮೇಲೆ ಇದು ಪರಿಣಾಮ ಬೀರಲಿದೆ.
ಅಡಿಕೆಗೆ ಕೊಳೆ ಅಥವಾ ಹಳದಿ ರೋಗ ಬಂದಾಗ ಮತ್ತು ಬೆಲೆ ಕುಸಿದಾಗ ರಾಜ್ಯ ಸರಕಾರ ಬೆಂಬಲ ಬೆಲೆ ನೀಡಿ ನೆರವಾಗುತ್ತಿದೆ. ಆದರೆ, ಕೇಂದ್ರ ಸರಕಾರ ಅಡಿಕೆ ಕೃಷಿಕರಿಗೆ ನಿರ್ದಿಷ್ಟ ಯೋಜನೆ ಜಾರಿಗೊಳಿಸುತ್ತಿಲ್ಲ. ಅಡಿಕೆ ಆಮದು ತಡೆಯಲು ಕ್ರಮ ಜರುಗಿಸುತ್ತಿಲ್ಲ. ಜೊತೆಗೆ ರೈತರ ಮೇಲೆ ಈಗ ಮತ್ತೊಂದು ಬರೆ. ಕೇಂದ್ರದ ಈ ನಿರ್ಧಾರದ ಹಿಂದೆ ತಂಬಾಕು ಲಾಬಿ ಇರಬಹುದೇ ಎಂಬ ಅನುಮಾನವೂ ಕಾಡುತ್ತಿದೆ.

ರೈತರನ್ನು ಸಂಕಷ್ಟದಿಂದ ಪಾರು ಮಾಡಲು ಕೇಂದ್ರ ಸರ್ಕಾರ ಮುಂದಾಗಬೇಕು. ಕಾಫಿ, ಚಹ, ರಬ್ಬರ್ ಕೃಷಿಗೆ ಹನಿ ನೀರಾವರಿ ಸಬ್ಸಿಡಿ ಯೋಜನೆ ಒದಗಿಸಿರುವಂತೆ ಅಡಿಕೆ ಕೃಷಿಗೂ ಈ ಯೋಜನೆ ಮುಂದುವರಿಸಬೇಕು. ರಬ್ಬರ್ ಮತ್ತು ಕಾಫಿ ಮಂಡಳಿ ರೀತಿಯಲ್ಲಿ ಅಡಿಕೆಗೂ ಮಂಡಳಿ ರಚಿಸಬೇಕು. ಮಂಡಳಿ ಸ್ಥಾಪನೆಯಾದರೆ ಆವರ್ತನ ನಿಧಿ ರಚಿಸಿ ಬೆಂಬಲ ಬೆಲೆ, ಉಪ ಉತ್ಪನ್ನ ತಯಾರಿ, ಆಮದು ನಿರ್ಬಂಧ ಇತ್ಯಾದಿ ಕ್ರಮ ಕೈಗೊಳ್ಳಲು ಸಾಧ್ಯವಾಗಲಿದೆ.


ಸಾವಿನ ದವಡೆಯಿಂದ ಪಾರಾಗಿ ಬಂದ ಯೋಧ

ಜಮ್ಮು ಕಾಶ್ಮೀರ ಸೇರಿದಂತೆ ಭಾರತದ ಗಡಿ ಪ್ರದೇಶದಲ್ಲಿ ಭಯೋತ್ಪಾದಕರೊಂದಿಗೆ ನಮ್ಮ ಸೈನಿಕರ ಹೋರಾಟ ದಿನಂಪ್ರತಿ ನಡೆಯುತ್ತದೆ. ಅದೆಷ್ಟೋ ಸೈನಿಕರು ಭಯೋತ್ಪಾದಕರೊಂದಿಗೆ ಕಾದಾಡಿ ಹುತಾತ್ಮರಾದರೆ, ಕೆಲವರು ಗಾಯಗೊಂಡು ಹುಟ್ಟೂರಿಗೆ ಮರಳುತ್ತಾರೆ. ಭಯೋತ್ಪಾದಕರೊಂದಿಗೆ ಹೋರಾಡಿ ನಾಲ್ಕು ಬಾರಿ ಸಾವಿನ ದವಡೆಯಿಂದ ಪಾರಾಗಿ ಐದನೇ ಹೋರಾಟದಲ್ಲಿ ಗಂಭೀರ ಸ್ಥಿತಿಗೆ ತಲುಪಿದ ಅಂತಹ ಓರ್ವ ಯೋಧ ಐದೂವರೆ ತಿಂಗಳ ಚಿಕಿತ್ಸೆಯಿದ ಈಗ ಗುಣಮುಖನಾಗಿ ಹುಟ್ಟೂರಿಗೆ ಮರಳಿದ್ದಾರೆ.
ದಕ್ಷಿಣ ಕನ್ನಡ ಜಿಲ್ಲೆ ಬಂಟ್ವಾಳ ತಾಲೂಕಿನ ಕುರ್ನಾಡು ಗ್ರಾಮದ ಮುಡಿಪು ನಿವಾಸಿ ಸಂತೋಷ್ ಕುಲಾಲ್ ಅವರೇ ಭಯೋತ್ಪಾದಕರೊಂದಿಗೆ ಹೋರಾಡಿ ಸಾವಿನ ದವಡೆಯಿಂದ ಪಾರಾಗಿ ಬಂದ ಯೋಧ. ಅವರು ಅ. 12ರಂದು ಜಮ್ಮು ಕಾಶ್ಮೀರದ ಕುಪ್ವಾರ ಜಿಲ್ಲೆಯ ಪಾಂಪೋರ್‌ನಲ್ಲಿ ಭಯೋತ್ಪಾದಕರೊಡನೆ ಹೋರಾಡಿ ಗುಂಡಿನೇಟಿನಿಂದ ಸಾವು-ಬದುಕಿನ ನಡುವಿನ ಹೋರಾಟದಲ್ಲಿ ಸಾವು ಜಯಿಸಿ ಬಂದವರಾಗಿದ್ದು, ಐದೂವರೆ ತಿಂಗಳ ಚಿಕಿತ್ಸೆ ಬಳಿಕ ಎಪ್ರಿಲ್‌ನಲ್ಲಿ ತಮ್ಮ ಹುಟ್ಟೂರಾದ ಮುಡಿಪುವಿಗೆ ಆಗಮಿಸಿದ್ದಾರೆ.
ದೇಶ ಸೇವೆಯ ತುಡಿತ:
ಬಂಟ್ವಾಳ ತಾಲೂಕಿನ ರಾಮಣ್ಣ ಸಾಲಿಯಾನ್ ಮತ್ತು ವಿಮಲಾ ಅವರ ಇಬ್ಬರು ಮಕ್ಕಳಲ್ಲಿ ಸಂತೋಷ್ ಹಿರಿಯವ. ಚಿಕ್ಕಂದಿನಲ್ಲಿ ತಂದೆ ನಿಧನರಾದ ಬಳಿಕ ತಾಯಿ ಮತ್ತು ಸಹೋದರಿಯೊಂದಿಗೆ ಮುಡಿಪುವಿನ ಕೊಡಕಲ್ಲಿನಲ್ಲಿರುವ ಅಜ್ಜಿ ಮನೆಗೆ ಬಂದಿದ್ದ ಸಂತೋಷ್, ಪ್ರಾಥಮಿಕ ಶಿಕ್ಷಣದಿಂದ ಪಿಯುಸಿ ವರೆಗೆ ಮುಡಿಪುವಿನ ಸರಕಾರಿ ಶಾಲೆಯಲ್ಲಿ ಕಲಿತರು. ಪಿಯುಸಿ ಮುಗಿಸಿ ದೇಶ ಸೇವೆ ಮಾಡುವ ಅದಮ್ಯ ಉತ್ಸಾಹದಿಂದ ಸೇನೆಯ ನೇಮಕಾತಿ ಶಿಬಿರದಲ್ಲಿ ಭಾಗವಹಿಸಿ ಆಯ್ಕೆಯಾದರು. 2003ರಿಂದ 2016ರ ವರೆಗೆ  ಜಮ್ಮು ಕಾಶ್ಮೀರ ಸೇರಿದಂತೆ ನಾಗಲ್ಯಾಂಡ್, ಬರ್ಮಾ, ಮಣಿಪುರದಲ್ಲಿ ನಕ್ಸಲ್ ಸೇರಿದಂತೆ ಉಗ್ರ ನಿಗ್ರಹ ಕಾರ್ಯಪಡೆಯಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದರು. ಆರ್ಮಿ ಸರ್ವಿಸ್ ಕೋರ್‌ನಲ್ಲಿದ್ದ ಸಂತೋಷ್ ಅವರು, ಕಮಾಂಡೋ ಕೋರ್ಸ್ ಮುಗಿಸಿ ಕಮಾಂಡೋ ಆಗಿ ಕಾರ್ಯ ನಿರ್ವಹಿಸುತ್ತಿದ್ದರು.
ಪಾಂಪೋರ್ ದಾಳಿಯಲ್ಲಿ ಗಂಭೀರ:
2016ರ ಸಪ್ಟೆಂಬರ್‌ನಲ್ಲಿ ಊರಿಗೆ ಬಂದಿದ್ದ ಸಂತೋಷ್‌ಗೆ ರಜೆ ಮುಗಿಯುವ ಮೊದಲೇ ಕಾರ್ಯಾಚರಣೆಗೆ ಹಾಜರಾಗುವಂತೆ ಕರೆ ಬಂದಿತ್ತು. ಭಾರತೀಯ ಪಡೆಯ ಸರ್ಜಿಕಲ್ ಸ್ಟ್ರೈಕ್‌ನ ತಂಡಕ್ಕೆ ಬ್ಯಾಕ್ ಸಪೋರ್ಟ್ ಮಾಡುವ ಕಾರ್ಯವನ್ನು ಸಂತೋಷ್ ಅವರಿದ್ದ ತಂಡಕ್ಕೆ ವಹಿಸಲಾಗಿತ್ತು. ಅದಾದ ಬಳಿಕ ಎಂದಿನಂತೆ ಕಾರ್ಯಾಚರಣೆ ನಡೆಸುತ್ತಿದ್ದಾಗ ಜಮ್ಮು ಕಾಶ್ಮೀರ ರಾಷ್ಟ್ರೀಯ ಹೆದ್ದಾರಿಯ ಪಾಂಪೋರ್‌ನಲ್ಲಿರುವ ಸರಕಾರಿ ಕಟ್ಟಡವೊಂದರಲ್ಲಿ ಭಯೋತ್ಪಾದಕರು ಅಡಗಿದ್ದಾರೆ ಎನ್ನುವ ಸುಳಿವಿನ ಹಿನ್ನೆಲೆಯಲ್ಲಿ ಇವರಿದ್ದ 6 ಜನರ ಕಮಾಂಡೋ ಕಾರ್ಯ ಪಡೆಗೆ ಶೋಧ ಕಾರ್ಯ ವಹಿಸಲಾಗಿತ್ತು. ಕಟ್ಟಡ ಮತ್ತು ಕಟ್ಟಡದ ಪಕ್ಕದಲ್ಲಿದ್ದ ಗುಡ್ಡದಲ್ಲಿ ಭಯೋತ್ಪಾದಕರಿದ್ದ ಮಾಹಿತಿ ಸಿಕ್ಕಿತ್ತು. ಅಷ್ಟೊತ್ತಿಗೆ ಎರಡೂ ಕಡೆಯಿಂದ ಗುಂಡಿನ ದಾಳಿ ಪ್ರಾರಂಭವಾಗಿತ್ತು.
‘‘ನಾವು ಗುಡ್ಡದಲ್ಲಿದ್ದ ಮೂವರು ಭಯೋತ್ಪಾದಕರನ್ನು ಮತ್ತು ಕಟ್ಟಡದಲ್ಲಿ ಅಡಗಿದ್ದ ಓರ್ವ ಭಯೋತ್ಪಾದಕನನ್ನು ಕೊಲ್ಲುವಲ್ಲಿ ಯಶಸ್ವಿಯಾದೆವು. ಕಟ್ಟಡದಲ್ಲಿದ್ದ ಭಯೋತ್ಪಾದಕರು ನಮ್ಮ ಮೇಲೆ ದಾಳಿ ನಡೆಸಿದಾಗ ನನ್ನ ಎದೆಗೆ ಎರಡು ಗುಂಡು ಹಾಗೂ ಕಾಲಿಗೆ ಮೂರು ಗುಂಡು ತಗುಲಿತ್ತು. ನಾವಿದ್ದ ಆರು ಜನರಲ್ಲಿ ಉತ್ತರ ಪ್ರದೇಶದ ಜ್ಞಾನೆಂದರ್ ಮತ್ತು ಒಡಿಶ್ಶಾದ ಬಿಸ್ವಾಸ್ ಸಾವನ್ನಪ್ಪಿದ್ದರು. ಎದೆಗೆ ಗುಂಡು ಬಿದ್ದ ಬಳಿಕ ಏನಾಯಿತೆಂದು ಗೊತ್ತಾಗಲಿಲ್ಲ. ಎರಡೂವರೆ ವಾರ ಕೋಮಾದಲ್ಲಿದ್ದೆ. ಎಚ್ಚರವಾದಾಗ ಆಸ್ಪತ್ರೆಯಲ್ಲಿ ಇರುವುದು ತಿಳಿಯಿತು. ಭಯೋತ್ಪಾದಕರೊಂದಿಗೆ ಸಂಘರ್ಷ 56 ಗಂಟೆಗಳ ಕಾಲ ನಡೆದಿದ್ದು,  ಸಹೋದ್ಯೋಗಿಗಳು ಅಲ್ಲಿನ ಆರು ಅಂತಸ್ತಿನ ಕಟ್ಟಡ ಸ್ಪೋಟಿಸಿ ಭಯೋತ್ಪಾದಕರನ್ನು ಕೊಂದಿದ್ದಾರೆ ಎಂಬುದು ತಿಳಿಯಿತು.

‘ಕಳೆದ 13 ವರ್ಷಗಳ ಸೇನಾ ಸೇವೆಯಲ್ಲಿ ಹಲವು  ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡು ನಾಲ್ಕು ಬಾರಿ ಸಾವಿನ ದವಡೆಯಿಂದ ಪಾರಾಗಿದ್ದೇನೆ. ಮಣಿಪುರದಲ್ಲಿ ಮಾವೋವಾದಿಗಳು ದಾಳಿ ನಡೆಸಿ ನಮ್ಮ ತಂಡದ ಮೂರು ವಾಹನಗಳನ್ನು ಸ್ಪೋಟಿಸಿದ್ದು, ಅದರಲ್ಲಿ 14 ಸೈನಿಕರು ಹುತಾತ್ಮರಾಗಿದ್ದರು. ನಾಲ್ಕನೆ ವಾಹನದಲ್ಲಿದ್ದ ನಾವು ಕೂದಲೆಳೆ ಅಂತರದಲ್ಲಿ ಪಾರಾಗಿದ್ದೆವು. ಎರಡನೇ ದಾಳಿ ನಾಗಲ್ಯಾಂಡ್‌ನಲ್ಲಿ ರೈಲು ನಿಲ್ದಾಣದಲ್ಲಿ ಸಂಭವಿಸಿತ್ತು. ಈ ದಾಳಿಯಲ್ಲಿ ನನ್ನ ಕಾಲಿಗೆ ಗಾಯವಾಗಿತ್ತು. ಮೂರನೆ ದಾಳಿ ಪೂಂಛ್‌ನಲ್ಲಿ ನಡೆದಿದ್ದು, ತಲೆಗೆ ಗುಂಡು ತಗಲಿತ್ತು. ನಾಲ್ಕನೇಯದಾಗಿ ನಡೆದ ಪಾಂಪೋರ್ ದಾಳಿಯಲ್ಲಿ ಐದು ಗುಂಡು ತಗುಲಿ ಸಾವಿನ ದವಡೆಯಿಂದ ಪಾರಾಗಿ ಬಂದಿದ್ದೇನೆ. ಇನ್ನೂ ಎರಡು ವರ್ಷ ಸೇವಾವಧಿ ಬಾಕಿಯಿದ್ದು, ಗುಣಮುಖರಾಗಿ ದೇಶ ಸೇವೆಗೆ ಮರಳಬೇಕೆಂದಿದ್ದೇನೆ’ ಎಂದು ಸಂತೋಷ್ ಹೇಳಿದ್ದಾರೆ.

ಮನೆಯ ಏಕೈಕ ಆಧಾರಸ್ತಂಭ:
ಸಂತೋಷ್ ಮದುವೆಯಾಗಿ ಮೂರು ವರ್ಷ ಕಳೆದಿದೆ. ಪತ್ನಿ ಖಾಸಗಿ ಶಾಲೆಯಲ್ಲಿ ತಾತ್ಕಾಲಿಕ ನೆಲೆಯಲ್ಲಿ ಶಿಕ್ಷಕಿ, ಬಡ ಕುಟುಂಬಕ್ಕೆ ಸಂತೋಷ್ ಅವರೇ ಆಧಾರ ಸ್ತಂಭ. ತಾಯಿ, ಸಹೋದರಿ, ಸಹೋದರಿಯ ಮಗುವನ್ನು ನೋಡುವ ಜವಾಬ್ದಾರಿ ಸಂತೋಷ್ ಅವರಿಗಿದೆ. ಆದರೆ ಗಂಭೀರವಾಗಿ ಗಾಯಗೊಂಡು ಸೇನೆಯಿಂದ ಮನೆಗೆ ವಾಪಸ್ಸಾಗಿರುವ ಸಂತೋಷ್ ಕುಟುಂಬಕ್ಕೆ ಆರ್ಥಿಕ ಚೈತನ್ಯ ನೀಡುವ ಕಾರ್ಯ ಆಗಬೇಕಾಗಿದೆ.


ಮನೆಗೆ ತಿಳಿಸಿರಲಿಲ್ಲ:

ಕಳೆದ ಸಪ್ಟೆಂಬರ್‌ನಲ್ಲಿ ಮನೆಗೆ ಬಂದಿದ್ದ ಸಂತೋಷ್ ಕೆಲವೇ ದಿನಗಳಲ್ಲಿ ಕರ್ತವ್ಯದ ಕರೆಗೆ ಓಗೊಟ್ಟು ತೆರಳಿದ್ದರು. ಅ. 12ರಂದು ನಡೆದ ದಾಳಿಯಲ್ಲಿ ತನಗೆ ಮಾರಣಾಂತಿಕ ಗಾಯವಾಗಿದೆ ಎನ್ನುವ ವಿಚಾರವನ್ನು ಪತ್ನಿ, ತಾಯಿ ಹಾಗೂ ಸಹೋದರಿಗೆ ತಿಳಿಸಿರಲಿಲ್ಲ. ಪತ್ನಿಯ ಸಹೋದರನಿಗೆ ಮಾತ್ರ ಮಾಹಿತಿ ನೀಡಿದ್ದರು. ಜಮ್ಮುವಿನ ಪಠಾನ್‌ಕೋಟ್ ಆಸ್ಪತ್ರೆಯಲ್ಲಿದ್ದ ಸಂತೋಷ್ ಬಳಿಕ ದಿಲ್ಲಿಯ ಕಮಾಂಡೋ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದರು. ದಿಲ್ಲಿಯಿಂದ ವಿಮಾನ ಮೂಲಕ ಬೆಂಗಳೂರಿಗೆ ತಲುಪಿ, ಬೆಂಗಳೂರಿನಿಂದ ಸೇನಾ ವಾಹನದಲ್ಲಿ ಏ.3ರಂದು ಮನೆಗೆ ತಲುಪಿದಾಗಲೇ ಪತ್ನಿ, ತಾಯಿ, ಸಹೋದರರಿಗೆ ಕಾರ್ಯಾಚರಣೆಯಲ್ಲಿ ಗಾಯಗೊಂಡ ವಿಚಾರ ತಿಳಿದದ್ದು. ಕೋಮಾ ಸ್ಥಿತಿಯಿಂದ ಹೊರಬಂದ ಬಳಿಕ ಮನೆಯವರೊಂದಿಗೆ ದೂರವಾಣಿ ಮೂಲಕ ಸಂಭಾಷಣೆ ನಡೆಸಿದ್ದರು. ಆದರೆ, ಗಾಯಗೊಂಡಿರುವುದರ ಬಗ್ಗೆ ತಿಳಿಸಿರಲಿಲ್ಲ.

ಕಾಳುಮೆಣಸು ಬೆಳೆ ಮಾಹಿತಿ ಕಾರ್ಯಾಗಾರ

ಉತ್ತರ ಕನ್ನಡ ಜಿಲ್ಲೆ ಸಿದ್ದಾಪುರ ತಾಲೂಕಿನ ಇಟಗಿ ರಾಮೇಶ್ವರ ದೇವಾಲಯದ ಸೀತಾರಾಮ ಹೆಗಡೆ ಸಭಾಭವನದಲ್ಲಿ ಕಾಳುಮೆಣಸು ಬೆಳೆ ಮಾಹಿತಿ ಕಾರ್ಯಾಗಾರ ನಡೆಯಿತು. ಇಟಗಿ ವ್ಯವಸಾಯ ಸೇವಾ ಸಹಕಾರಿ ಸಂಘದ ಅಧ್ಯಕ್ಷ ರಮೇಶ ಹೆಗಡೆ ಕೊಡ್ತಗಣಿ ಮಾತನಾಡಿ, ನಮ್ಮ ತೋಟಗಳಲ್ಲಿ ಬೆಳೆಯುವ ಕಾಳುಮೆಣಸು ಗುಣಮಟ್ಟದಲ್ಲಿ ಹೆಚ್ಚಿನದಾಗಿದ್ದು, ಇತ್ತೀಚಿನ ವರ್ಷಗಳಲ್ಲಿ ಸೊರಗು ರೋಗದಿಂದ ಸಂಪೂರ್ಣ ನಾಶವಾಗಿದೆ. ಈಗ ವೈಜ್ಞಾನಿಕವಾಗಿ ಆಧುನಿಕ ತಂತ್ರಜ್ಞಾನದೊಂದಿಗೆ ಕಾಳುಮೆಣಸು ಬೆಳೆಯಲು ತೋಟಗಾರಿಕಾ ಇಲಾಖೆಯಿಂದ ಈ ಕಾರ್ಯಾಗಾರ ಹಮ್ಮಿಕೊಂಡಿದ್ದೇವೆ. ರೈತರಿಗೆ ಹೆಚ್ಚಿನ ಉಪಯೋಗವಾಗಬೇಕೆಂಬುದು ನಮ್ಮ ಸಂಕಲ್ಪವಾಗಿದೆ ಎಂದರು.
ಕಾಳುಮೆಣಸು ಕಿರುಹೊತ್ತಿಗೆಯನ್ನು ಪ್ರಗತಿಪರ ಕೃಷಿಕ ರವಿಲೋಚನ್ ಮಡಗಾಂವಕರ್ ಬಿಡುಗಡೆ ಮಾಡಿದರು. ಅಧ್ಯಕ್ಷತೆ ವಹಿಸಿದ್ದ ಜಿ.ಕೆ. ಭಟ್ ಕಶಿಗೆ ಮಾತನಾಡಿ, ಪರಂಪರೆಯಿಂದಲೂ ನಾವೆಲ್ಲರೂ ಕಾಳುಮೆಣಸು ಬೆಳೆಗಾರರು. ಈ ಪ್ರದೇಶದಲ್ಲಿ 3000 ಮಿ.ಮೀ ನಿಂದ 12,000 ಮಿ.ಮೀ ಮಳೆ ಬೀಳುತ್ತದೆ. ಹೀಗಿರುವಾಗ ನೀರು ಹೆಚ್ಚಾಗಿ ಅಥವಾ ನೀರಿಲ್ಲದೆ ಕಾಳುಮೆಣಸಿಗೆ ಸೊರಗು ರೋಗ ಬರುತ್ತದೆಂದು ತಜ್ಞರು ಹೇಳುವುದು ಅವಾಸ್ತವ. ಪರಂಪರೆಯಿಂದ ಬಂದ ತಳಿಗಳು ಚೆನ್ನಾಗಿದ್ದವು. ಪಣಿಯೂರ್ ಎಂಬ ಹೊಸ ತಳಿಯನ್ನು ತೋಟಗಾರಿಕಾ ಇಲಾಖೆ ತಂದುಕೊಟ್ಟ ಮೇಲೆ ಸೊರಗುರೋಗ ಬಂದಿತು ಎಂದರು.

ಡಾ ವಿ.ಎಂ. ಹೆಗಡೆ ಕಾಳುಮೆಣಸು ಸಸಿ ಮಾಡುವುದು, ನಾಟಿ ಮಾಡುವುದು, ಕಾಲಕಾಲಕ್ಕೆ ಗೊಬ್ಬರ, ನೀರು ಹಾಕುವುದು, ಔಷಧ ಸಿಂಪರಣೆಗಳ ಕುರಿತು ಉಪನ್ಯಾಸ ನೀಡಿದರು. ಡಾ ಲಕ್ಷ್ಮೀನಾರಾಯಣ ಹೆಗಡೆ ಕಾಳುಮೆಣಸಿನ ತಳಿಗಳು, ಇಳುವರಿ ಕುರಿತು ಸಾಕ್ಷಚಿತ್ರದೊಂದಿಗೆ ವಿವರಿಸಿದರು. ರೈತರೊಂದಿಗೆ ಸಂವಾದ ನಡೆಸಿದರು. ನಾರಾಯಣಮೂರ್ತಿ ಹೆಗಡೆ ಸ್ವಾಗತಿಸಿ, ನಿರೂಪಿಸಿದರು.

ಅನಾಥ ಯುವತಿಯರಿಗೆ ಬಾಳು ನೀಡಿದ ಬ್ರಾಹ್ಮಣ ಯುವಕರು

ಹುಬ್ಬಳ್ಳಿಯಲ್ಲಿ ಮೊನ್ನೆ ನಡೆದ ಮದುವೆಯಲ್ಲಿ ಇಬ್ಬರು ಅನಾಥ ಯುವತಿಯರಿಗೆ ಬ್ರಾಹ್ಮಣ ಯುವಕರು ಬಾಳು ನೀಡಿದರು. ಅರ್ಪಿತಾ ಮಂಗಳೂರು ಪೆರ್ಮುದೆಯ ಸೀತಾರಾಂ ಶಾಸ್ತ್ರಿ ಅವರ ಪುತ್ರ ಗಿರೀಶ ಶಾಸ್ತ್ರಿ ಅವರನ್ನು ವರಿಸಿದರೆ, ಸುನೀತಾ ಕುಂದಗೋಳ ತಾಲೂಕಿನ ಯರಗುಪ್ಪಿಯ ಹನುಮಂತರಾವ್ ಅವರ ಪುತ್ರ ನರಸಿಂಹರಾವ್ ಅವರೊಂದಿಗೆ ಹಸೆಮಣೆ ಏರಿದರು.
ಗಣಪತಿ ಹೋಮ, ಬ್ರಾಹ್ಮಣ ಸಂಪ್ರದಾಯದಂತೆ ಮಂತ್ರ ಪಠಣ ಮಾಡಿಸುವ ಮೂಲಕ ಹಸೆಮಣೆ ಏರಿದ ನವದಂಪತಿಗಳು ವೈವಾಹಿಕ ಜೀವನಕ್ಕೆ ಕಾಲಿರಿಸಿದರು. ಇದಕ್ಕೂ ಮೊದಲು ವಧುಗಳಿಗೆ ಅರಿಷಿಣ ಕಾರ್ಯಕ್ರಮ, ಬಳೆ ಇಡಿಸುವುದು ಸೇರಿದಂತೆ ವಿವಿಧ ಸಂಪ್ರದಾಯ ಬದ್ಧ ಕಾರ್ಯಕ್ರಮಗಳು ನಡೆದವು.
ಈ ಸಂದರ್ಭದಲ್ಲಿ ಮಾತನಾಡಿದ ಗಿರೀಶ ಶಾಸ್ತ್ರೀ, ತಾನು ಅಡುಗೆ ಗುತ್ತಿಗೆದಾರರಾಗಿದ್ದು ಹಲವು ಕಡೆ ಹೆಣ್ಣು ನೋಡಿದರೂ ಅಡುಗೆ ಗುತ್ತಿಗೆದಾರರು ಎನ್ನುವ ಕಾರಣಕ್ಕೆ ಹೆಣ್ಣು ನೀಡುತ್ತಿರಲಿಲ್ಲ. ಈ ಕುರಿತು ಅನಾಥ ಯುವತಿಗೆ ಬಾಳು ನೀಡಬೇಕೆಂಬ ಇಚ್ಚೆಯಿಂದ ಮನೆಯ ಹಿರಿಯರೊಂದಿಗೆ ಚರ್ಚಿಸಿದಾಗ ಮನೆಯವರು ಇದಕ್ಕೆ ಸಮ್ಮತಿಸಿದರು. ಅದರಂತೆ ಇಂದು ಅರ್ಪಿತಾಳನ್ನು ಕೈ ಹಿಡಿಯುವ ಮೂಲಕ ಬಾಳಸಂಗಾತಿಯನ್ನಾಗಿ ಮಾಡಿಕೊಂಡಿದ್ದು ಸಂತಸ ತಂದಿದೆ. ಅರ್ಪಿತಾ ಇನ್ನು ಹೆಚ್ಚಿನ ವಿದ್ಯಾಭ್ಯಾಸಕ್ಕೆ ಬಯಸಿದರೆ ಯಾವುದೇ ತೊಂದರೆಯಾಗದಂತೆ ಅವಳ ವಿದ್ಯಾಭ್ಯಾಸಕ್ಕೆ ಪ್ರೋತ್ಸಾಹಿಸುವುದಾಗಿ ತಿಳಿಸಿದರು.

ಕುಂದಗೋಳ ತಾಲೂಕಿನ ಯರಗುಪ್ಪಿಯ ಹನುಮಂತರಾವ್ ಅವರ ಪುತ್ರ ನರಸಿಂಹರಾವ್, ಒಂದು ಅನಾಥ ಹೆಣ್ಣು ಮಗಳಿಗೆ ಎಲ್ಲರಂತೆ ಕುಟುಂಬದವರೊಂದಿಗೆ ವಾಸಿಸುವ ರಸ ಗಳಿಗೆ ಸಿಗುವಂತಾಗಲಿ ಹಾಗೂ ಎಲ್ಲರೊಂದಿಗೆ ನಲಿಯುತ ಬಾಳುವಂತಾಗಲಿ ಎಂಬ ಮಹದಾಸೆಯಿಂದ ಸುನೀತಾಳನ್ನು ಬಾಳಸಂಗಾತಿಯನ್ನಾಗಿ ಮಾಡಿಕೊಂಡಿದ್ದೇನೆ. ಅವಳನ್ನು ಚೆನ್ನಾಗಿ ನೋಡಿಕೊಳ್ಳಲಾಗುವುದು ಎಂದರು.

ಮದುವೆ ಸಮಾರಂಭಕ್ಕೆ ಡಾ ಗಂಗೂಬಾಯಿ ಹಾನಗಲ್ಲ ಮ್ಯೂಜಿಕ್ ಫೌಂಡೇಶನ್ ವಿದ್ಯಾರ್ಥಿಗಳಿಂದ ನಡೆದ ಸಂಗೀತ, ನೃತ್ಯಗಳು ಮೆರುಗು ನೀಡಿದವು.

ಸಾಧಕರಿಗೆ ‘ಹವ್ಯಕ’ ಪ್ರಶಸ್ತಿ ಪ್ರಕಟ

ಖ್ಯಾತ ಹೃದ್ರೋಗ ತಜ್ಞ ಡಾ ದಿವಾಕರ ಭಟ್ಟ ಸೇರಿದಂತೆ ಹಲವು ಸಾಧಕರಿಗೆ ಅಖಿಲ ಹವ್ಯಕ ಮಹಾಸಭಾದ ಹವ್ಯಕ ಪ್ರಶಸ್ತಿ ಪ್ರಕಟಿಸಲಾಗಿದೆ.
ಉತ್ತರ ಕನ್ನಡ ಜಿಲ್ಲೆಯ ಸಿದ್ದಾಪುರ ತಾಲೂಕಿನ ಹೆಗ್ಗರಣಿ ಮೂಲದ ಖ್ಯಾತ ಹೃದ್ರೋಗ ತಜ್ಞ ಡಾ ದಿವಾಕರ ಭಟ್ಟ ಬೆಂಗಳೂರು ನಗರದ ಪ್ರತಿಷ್ಠಿತ ಆಸ್ಪತ್ರೆಯಲ್ಲಿ ಸಾವಿರಾರು ರೋಗಿಗಳಿಗೆ ಚಿಕಿತ್ಸೆ ನೀಡಿದ ಕೀರ್ತಿ ಪಡೆದಿದ್ದಾರೆ. ಇವರು ಹವ್ಯಕ ಭೂಷಣ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಮೂಲತಃ ಶಿರಸಿ ತಾಲೂಕಿನ ಗೋಳಗೋಡಿನವರಾದ ಹಿಂದೂಸ್ತಾನಿ ಶಾಸೀಯ ಸಂಗೀತದಲ್ಲಿ ವಿಶೇಷ ಸಾಧನೆ ಮಾಡಿದ ವಿದುಷಿ ವಸುಧಾ ಶರ್ಮಾ ಸಾಗರ ಅವರಿಗೆ, ಭಾರತೀಯ ರಕ್ಷಣಾ ಕ್ಷೇತ್ರದ ತೇಜಸ್ ಯುದ್ಧ ವಿಮಾನದ ಯೋಜನಾ ಮುಖ್ಯಸ್ಥರಾಗಿ ಜವಾಬ್ದಾರಿಯಿಂದ ಕೆಲಸ ನಿರ್ವಹಿಸುತ್ತಿರುವ ಕುಮಟಾ ಮೂಲದ ಕೃಷ್ಣ ಭಟ್ ಮೂರೂರು ಅವರಿಗೆ ಹವ್ಯಕ ಶ್ರೀ ಪ್ರಶಸ್ತಿ ಪ್ರಕಟಿಸಲಾಗಿದೆ.

ಸಾಗರದ ಎಂ.ಹರನಾಥ ರಾವ್ ಮತ್ತಿಕೊಪ್ಪ, ದಕ್ಷಿಣ ಕನ್ನಡದ ಗಂಗಾ ಪಾದೇಕಲ್ಲಿಗೆ ಹವ್ಯಕ ಭೂಷಣ ಪ್ರಶಸ್ತಿ ಘೋಷಿಸಲಾಗಿದೆ. ಮೇಲುಕೋಟೆ ಸಂಸ್ಕೃತ ವಿದ್ಯಾಲಯದಲ್ಲಿ ಸಂಸ್ಕೃತ ಪ್ರಾಧ್ಯಾಪಕರಾಗಿ ಯಕ್ಷಗಾನ ಹಾಗೂ ತಾಳಮದ್ದಳೆ ಕ್ಷೇತ್ರದಲ್ಲಿ ಪ್ರಸಿದ್ಧಿ ಪಡೆದ ಖ್ಯಾತ ವಾಗ್ಮಿ ಹಾಗೂ ಉತ್ತಮ ಲೇಖಕ, ಸಂಸ್ಕೃತ ಮತ್ತು ಕನ್ನಡದಲ್ಲಿ ಹಲವಾರು ಮೌಲಿಕ ಕೃತಿಗಳನ್ನು ರಚಿಸಿ ಪ್ರಕಟಿಸಿದ ಉಮಾಕಾಂತ ಭಟ್ಟರಿಗೆ ಹವ್ಯಕ ಮಹಾಸಭಾ ‘ಹವ್ಯಕ ಭೂಷಣ’ ಪ್ರಶಸ್ತಿಗೆ ಆಯ್ಕೆ ಮಾಡಿದೆ. ಇದೇ ಸಂದರ್ಭದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ಮಕ್ಕಳಿಗೆ ಸಾಂಕೇತಿಕವಾಗಿ ಪಲ್ಲವ ಪುರಸ್ಕಾರ ನೀಡಿ ಗೌರವಿಸಲಾಗುತ್ತಿದ್ದು, ಏ.9ರಂದು ಬೆಂಗಳೂರಿನಲ್ಲಿ ನಡೆಯುವ ಸಮಾರಂಭದಲ್ಲಿ ಪ್ರಶಸ್ತಿ ಪ್ರದಾನ ಮಾಡಲಾಗುತ್ತಿದೆ.





ಗೋರೆಯ ಪಾದುಕಾ ಮಂದಿರಕ್ಕೆ ತಾಮ್ರಪರ್ಣ ಆಚ್ಛಾದನೆ

ಉತ್ತರ ಕನ್ನಡ ಜಿಲ್ಲೆ ಕುಮಟಾ ಸಮೀಪದ ಧಾರೇಶ್ವರನ ಸನ್ನಿಧಿಯಿಂದ ಕೇವಲ ಎರಡು ಕಿಮೀ ದೂರದಲ್ಲಿರುವ ಗೋರೆ ಗುಡ್ಡ ಕೇವಲ ಕಲ್ಲು ಗುಡ್ಡೆಯಲ್ಲ, ಶಿವ ಸಂಕಲ್ಪದ ತಪೋಭೂಮಿ ಎಂಬುದು ಜನಜನಿತ. ಇತಿಹಾಸದಲ್ಲಿ ಮಾಂಧಾತ ರಾಜರೊಬ್ಬರ ಕಾಲಕ್ಕೆ ಶ್ರೀಗೋಪಾಲಕೃಷ್ಣ ದೇವರ ಸಾನ್ನಿಧ್ಯ ಸ್ಥಾಪನೆಯಾಗಿ ಬಳಕೆಯಲ್ಲಿತ್ತು. ಇದಕ್ಕೂ ಮುನ್ನವೇ ಸ್ವತಃ ಶಿವನ ಅಪ್ಪಣೆಯಂತೆ ನಂದಿಕೇಶ್ವರನೇ ತನ್ನ ಶೃಂಗದಿಂದ ನಿರ್ಮಿಸಿದ ಎನ್ನಲಾಗುವ ತೀರ್ಥೋದಕ ಇಂದಿಗೂ ನಂದಿಶೃಂಗತೀರ್ಥವೆಂದು ಐತಿಹ್ಯ ಹೊಂದಿದೆ.
ಕಾಲಾಂತರದಲ್ಲಿ ದುಷ್ಟಶಕ್ತಿಗಳಿಂದ ಜೀರ್ಣಗೊಂಡ ಗುಡಿ, ಕಲುಷಿತಗೊಂಡ ತೀರ್ಥವನ್ನು ಸ್ವತಃ ದತ್ತಾತ್ರೇಯ ಅವತಾರವೆಂದೇ ಖ್ಯಾತರಾದ ಶ್ರೀಧರ ಸ್ವಾಮಿಗಳೇ ಪುನರುದ್ಧಾರಗೊಳಿಸಿದ್ದರು. ಗುಡಿಗೋಪುರಗಳು ನಿರ್ಮಾಣಗೊಂಡು ರಥೋತ್ಸವಗಳು ಆರಂಭವಾದವು. ದಿನದಿಂದ ದಿನಕ್ಕೆ ಚೇತೋಹಾರಿಯಾಗಿ ಬೆಳೆದ ಗೋರೆ ಕ್ಷೇತ್ರದಲ್ಲಿ ಶ್ರೀಧರರು ತಮ್ಮ ಶಿಷ್ಯರಾದ ಈಶ್ವರ ಸಾಧುಗಳನ್ನು ಕಳುಹಿದರು. ಶ್ರೀಧರರು ಮಹಾಸಮಾಧಿಸ್ತರಾದ ನಂತರ ಈಶ್ವರ ಸಾಧುಗಳು ಗೋರೆಯಲ್ಲಿಯೇ ತುರ್ಯಾಶ್ರಮ ಸ್ವೀಕರಿಸಿ ಗೋಪಾಲ ಸದಾನಂದ ಸ್ವಾಮಿಗಳೆಂಬ ಯೋಗ ಪಟ್ಟ ಪಡೆದರು.
ಗೋಪಾಲಕೃಷ್ಣ  ಗುಡಿಯ ಸನಿಹದಲ್ಲೇ ಶ್ರೀಧರ ಪಾದುಕಾ ಮಂದಿರ ನಿರ್ಮಾಣವಾಯಿತು. ಉತ್ತರ ದಿಕ್ಕಿನಲ್ಲಿ ದಕ್ಷತುಂಡ ಗಣಪತಿ ಮೂರ್ತಿಯ ಉದ್ಭವವಾಯಿತು. ಗಣಪತಿಗೆ ಗುಡಿಯ ನಿರ್ಮಾಣವಾಯಿತು. 1984 ರಲ್ಲಿ ಶ್ರೀ ಸದಾನಂದ ಸ್ವಾಮಿಗಳು ಐಕ್ಯರಾದ ನಂತರ ಪಾದುಕಾ ಮಂದಿರದಲ್ಲಿಯೇ ಸಮಾಧಿ ಮಾಡಲಾಯಿತು.
ಗುರು ಪ್ರೇರಣೆಯಂತೆ ಪರಿವ್ರಾಜಕರಾಗಿದ್ದ ಶ್ರೀ ನಿತ್ಯಾನಂದ ಸ್ವಾಮಿಗಳನ್ನು ಭಕ್ತಾದಿಗಳು ಗೋರೆಕ್ಷೇತ್ರಕ್ಕೆ ಸ್ವಾಗತಿಸಿ ನೆಲೆಯಾಗಿಸಿದರು. ಕೃಷ್ಣ ಸೇವೆ, ಪಾದುಕಾಸೇವೆ, ಭಕ್ತರ ಇಷ್ಟಾರ್ಥ ಸಿದ್ಧಿಯೂ ಮುಂದುವರೆಯಿತು. ಗೋಶಾಲೆ, ಯಾಗಶಾಲೆ ಸೇರಿದಂತೆ ಹಲವು ಕಟ್ಟಡಗಳು ನಿರ್ಮಾಣಗೊಂಡವು. 2005ರಲ್ಲಿ ಸಹಸ್ರ ಚಂಡಿಕಾ ಮಹಾಯಾಗವೂ ನಡೆಯಿತು. ನಂತರ ಬ್ರಹ್ಮೈಕ್ಯರಾದ ನಿತ್ಯಾನಂದ ಸ್ವಾಮಿಗಳನ್ನೂ ಪಾದುಕಾ ಮಂದಿರದಲ್ಲೇ ಸಮಾಧಿಸ್ತಗೊಳಿಸಲಾಯಿತು.

ಹೀಗೆ, ಸಹಸ್ರಾರು ವರ್ಷಗಳ ಭವ್ಯ ಐತಿಹ್ಯದೊಂದಿಗೆ, ಸಿದ್ಧಿಸಾಧನೆಯ ತಾಣವಾಗಿ ಗುರುತಿಸಿಕೊಂಡ ಗೋರೆ ಕ್ಷೇತ್ರದಲ್ಲಿ ಗುರು ಪ್ರೇರಣೆ ಹಾಗೂ ಭಕ್ತರ ಇಷ್ಟದಂತೆ ಶ್ರೀ ಶ್ರೀಧರ ಪಾದುಕಾ ಮಂದಿರಕ್ಕೆ ತಾಮ್ರಪರ್ಣ ಆಚ್ಛಾದನೆ ಹಾಗೂ ಶಿಖರ ಕಲಶ ಪ್ರತಿಷ್ಠೆ, ಕಲಾವೃದ್ಧಿ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿದೆ. ಏಪ್ರೀಲ್ 8 ರಂದು ವೈದಿಕ ಕೈಂಕರ್ಯಗಳು ಆರಂಭಗೊಳ್ಳಲಿದ್ದು ಗಣಹವನ, ವಾಸ್ತುಹವನ ಮುಂತಾದವು ನಡೆಯಲಿವೆ. ಮರುದಿನ ಏಪ್ರೀಲ್ 9ರಂದು ಶುಭ ಮುಹೂರ್ತದಲ್ಲಿ ಶಿಖರ ಕಲಶ ಪ್ರತಿಷ್ಠೆ, ಕಲಾವೃದ್ಧಿ ಹೋಮ ಸೇರಿದಂತೆ ಹಲವು ಪ್ರಮುಖ ಹವನಗಳು ನಡೆಯಲಿವೆ. ಮಧ್ಯಾಹ್ನ ಮಹಾಮಂಗಳಾರತಿ, ಪ್ರಸಾದ ವಿತರಣೆ ಹಾಗೂ ಮಹಾ ಸಂತರ್ಪಣೆ, ಮಂತ್ರಾಕ್ಷತೆ ನಡೆಯಲಿದೆ. ಏಪ್ರೀಲ್ 12 ಮತ್ತು 13ರಂದು ಭಗವಾನ ಶ್ರೀಧರ ಸ್ವಾಮಿಗಳ 44ನೇ ಆರಾಧನಾ ಸ್ಮರಣಾರ್ಥ ಕಾರ್ಯಕ್ರಮಗಳು ನಡೆಯಲಿವೆ. ಹಾಗೆಯೇ ಏಪ್ರೀಲ್ 21 ಮತ್ತು 22 ರಂದು ಶ್ರೀ ಸದಾನಂದ ಸ್ವಾಮಿಗಳ 32ನೇ ಆರಾಧನಾ ಮಹೋತ್ಸವ ಕಾರ್ಯಕ್ರಮಗಳು ನಡೆಯಲಿವೆ. 

ಸಂತರಿಂದ ಆತ್ಮಲಿಂಗಕ್ಕೆ ಪೂಜೆ

ರಾಘವೇಶ್ವರ ಭಾರತೀ ಸ್ವಾಮೀಜಿ ಮಾರ್ಗದರ್ಶನದಲ್ಲಿ ಲೋಕಕಲ್ಯಾಣಾರ್ಥ ದಾವಣಗೆರೆ ಸಿದ್ಧಾಶ್ರಮದ ಪ್ರಭುಲಿಂಗ ಮಹಾಸ್ವಾಮೀಜಿ ಗೋಕರ್ಣದ ಆತ್ಮಲಿಂಗಕ್ಕೆ ಪೂಜೆ ನರವೇರಿಸಿದರು.